Biiyaʼ guiraʼ ni nuu lu sitiu riʼ

guyé lu índice

 CAPÍTULO 7

Ñee rusisácanu guendanabani casi rusisaca Dios ni la?

Ñee rusisácanu guendanabani casi rusisaca Dios ni la?

«Ra nuuluʼ cadá guendanabani.» (SALMO 36:9.)

1, 2. Xi ti cosa nabé risaca bidii Dios laanu, ne xiñee.

BIXHÓZENU ni nuu guibáʼ bisigaʼdeʼ laanu ti cosa nabé risaca: bidiibe laanu guendanabani casi binni nuu xpiaaniʼ ti ganda gusihuínninu ca guenda stibe (Génesis 1:27). Ne pur bíʼnibe laanu binni nuu xpiaaniʼ zanda guiníʼ íquenu ca principiu zeeda lu Biblia ne gúninu cani lu xquendanabáninu. Pa gúninu zacá zanda chuʼnu jma gaxha de laabe. Laaca zanda gúninu ni jneza ne zannaxhiinu Jiobá purtiʼ «ma nanna[nu] uná nga jneza ne uná nga ni cadi jneza» (Hebreos 5:14).

2 Cumu nuu stale cosa ni runi binni yanna riʼ la? naquiiñeʼ guiníʼ íquenu ximodo zanda chinándanu ca principiu ni zeeda lu Biblia, purtiʼ qué gápanu xiixa ley ni gabi laanu xipeʼ zanda gúninu lu cada cosa. Guzéʼtenu ti ejemplu. Ca dxi stinu riʼ, ca doctor ca ziyánnacaʼ jma de medicina. Nga runi qué zabézadinu chuʼ ti ley ni gabi laanu xi naquiiñeʼ guicaanu o cadi guicaanu, jmaruʼ si pa chigudiicabe laanu xiixa medicina ni napa rini o chiguiquiiñecabe rini stinu. Naquiiñeʼ gánnanu xi gúninu purtiʼ racaláʼdxinu guzúʼbanu stiidxaʼ Jiobá. Ximodo zanda gánnanu xi gúninu ti cadi guchiiñaʼ xconciéncianu laanu ne cadi guixélenu de Dios ni nadxii laanu yaʼ. Caquiiñeʼ guiénenu ca principiu zeeda lu Biblia (Proverbios 2:6-11). Guidúʼyanu chupa chonna de laaca ni.

 NABÉ RISACA GUENDANABANI NE RINI NEZALÚ DIOS

3, 4. Padxí bizeeteʼ Stiidxaʼ Dios primé biaje risaca rini para Dios, ne xi textu cayabi laanu zacá ni.

3 Para Jiobá biaʼca risaca guendanabani biaʼ queca risaca rini. Primé biaje bisihuínnibe risaca cani para laabe nga despué de biiti Caín Abel. Dios gudxi Caín ca diidxaʼ riʼ: «¡Bicaadiaga! Rini stiʼ bíʼchiluʼ cucaa ridxi naa dede layú ca» (Génesis 4:10). Para Jiobá rini ni bixii que zeeda gaca ni xquendanabani Abel. Casi ñaca cucaa rini que ridxi Jiobá para guquíxebe Caín ni biʼniʼ que (Hebreos 12:24).

4 Gudiʼdiʼ si nisaguié naroʼbaʼ que, Dios na maʼ zanda gó binni xpeela ca maniʼ ca, peru ti cosa si qué zúnicabe: «Cadi naquiiñeʼ goto beela napa rini, purtiʼ rini ca nga guendanabani. Ne zanabaʼ cuenta pur rini stiluʼ» (Génesis 9:4, 5). Ca dxi stinu riʼ, laaca naquiiñeʼ gúninu ni na ley ni bidii Dios Noé que, purtiʼ zanu de laa. Ca diidxaʼ ni zeeda lu ley ca cusihuinni chaahuiʼ cani ni gudxi Dios Caín que: rini ca zeeda gaca ni guendanabani stiʼ binni o stiʼ ti maniʼ. Ley que laaca na, Jiobá, ni cudii guendanabani, zanabaʼ cuenta guiráʼ cani qué guni respetar guendanabani ne rini (Salmo 36:9).

5, 6. Ximodo bisihuinni Ley ni gucuaa Moisés que nabé risaca rini para Dios (laaca zanda gúʼyaluʼ cuadru ra na « Guni respetarnu xquendanabani ca maniʼ».)

5 Lu Ley ni gucuaa Moisés que laaca bizeeteʼ Jiobá nabé risaca para laa rini ne guendanabani. Lu Levítico 17:10, 11 Jiobá guníʼ: «Ne tutiica binni [...] gó guiráʼ clase rini, dxandipeʼ zucaaluáʼ binni ni cayó rini ca ne zuniteluáʼ laabe de ndaaniʼ xquídxibe. Purtiʼ rini ca nga guendanabani, ne naapeʼ maʼ gudixheʼ ni lu altar para laatu ti gusiá ni xquendanabánitu, purtiʼ rini ca nga ni rusiá guendanabani» (biiyaʼ cuadru ra ná: « Rini ni bisiá stonda binni»). *

 6 Lu altar que si nga biquiiñeʼ rini stiʼ ti maniʼ, peru pa qué iquiiñecabe ni raqué la? naquiiñeʼ guixii ni layú. Ora guni ca israelita que zacá, casi ñaca cudxiguétacabe xquendanabani maniʼ que Dios (Deuteronomio 12:16; Ezequiel 18:4). Peru ca diidxaʼ ca cadi na diʼ cani ora guuticabe ti maniʼ naquiiñeʼ guxhiicabe dede últimu gota rini nápame. Ni gunabaʼ si Dios laacabe gúnicabe nga guxhiicabe rini stiʼ maniʼ ca ora guuticabe laame ti cadi guchiiñaʼ xconciénciacabe laacabe ora gócabe laame, purtiʼ zacá cusihuínnicabe runi respetárcabe Dios ni rudii laanu guendanabani.

7. Ximodo bisihuinni David runi respetar modo ruuyaʼ Dios rini.

7 David, tobi hombre ni guyuulaʼdxiʼ Dios modo laa, biene chaahuiʼ ca principiu ni zeeda lu ca ley stiʼ Dios ni caníʼ de rini (Hechos 13:22). Ti biaje bizeeteʼ David cayati nisa. Ora binadiaga chonna de ca hombre ridinde stibe xi racaláʼdxibe, yechuucaʼ lu layú stiʼ xhenemígucaʼ neca guyuu xquendanabánicaʼ ra naxoo ne guleecaʼ nisa ndaaniʼ ti cisterna para bidiicaʼ ni laabe. Xi biʼniʼ David óraque yaʼ. Laa guníʼ: «Ñee cadi casi ñaca ñeeʼ rini stiʼ ca hombre riʼ purtiʼ guluucaʼ xquendanabánicaʼ ra naxoo la?». Para David, nisa ni yecaa ca hombre ridinde stibe que zeeda gaca ni rini sticaʼ, o xquendanabánicaʼ. Ngue runi, neca cayátibe nisa bixhiibe ni para Jiobá (2 Samuel 23:15-17).

8, 9. Ñee bichaa modo biʼyaʼ Dios guendanabani ne rini lu primé siglu que la? Bisiene.

8 Gudiʼdiʼ biaʼ chupa mil tapa gayuaa iza de gudxi Jiobá Noé nabé risaca rini para laa, ne biaʼ ti mil gaayuʼ gayuaa iza de bíʼninebe ca israelita que ti pactu, pur espíritu santu gúdxibe grupu ni zaniruʼ ni guyuu lu primé siglu gucaa ca diidxaʼ riʼ: «Para laadu ruluíʼ cadi galán uguá du laatu jma que biaʼ nexhe guni tu, ne nga ca gudxi Espíritu Santu laadu. Casi cadi go to ni ma udixhe cabe lu bidóʼ, nin rini, nin tutiica mani ni bixii yanni, ne cadi chuʼ né tu ni cadi xheela tu» (Hechos 15:28, 29).

 9 Grupu ni zaniruʼ ni guyuu lu primé siglu que biene pabiáʼ risaca rini para Dios, ne pa tuuxa qué iquiiñe ni jneza la? zucheené Dios ne casi ñaca nuzuxibi xañee bidóʼ o ñuuné ni cadi xheelaʼ. Zacaca rúninu ca dxi stinu riʼ. Ridúʼyanu xiná ca principiu zeeda lu Biblia ti gánnanu modo iquiiñenu rini stinu para chuulaʼdxiʼ Dios ni gúninu.

 NI RUNI CA DOCTOR CA NÉ RINI

Ximodo nusieneʼ ti doctor modo ruuyaʼ ca cosa ni jma nahuiiniʼ zeeda lu rini

10, 11. 1) Ñee ricá ca testigu stiʼ Jiobá rini o tobi de ca guidapaʼ cosa zeeda luni la? 2) Xi nga ni naquiiñeʼ guʼyaʼ cada tobi de laanu pa zacaa.

10 Cumu runi respetarnu mandatu ni na «cadi go to [nin guicatu] rini» la? ca testigu stiʼ Jiobá qué rudiʼnu rini stinu para guicá sti binni, qué ricanu rini ninca qué riguu chaahuinu ni para guicanu ni sti ora. Zaqueca qué ricanu guidapaʼ cosa ni zeeda lu rini: glóbulo rojo, glóbulo blanco, plaqueta ne plasma.

11 Ca dxi stinu riʼ maʼ qué raca nagana para ca científicu ca cueecaʼ ca cosa ni jma nahuiiniʼ zeeda lu glóbulo rojo, glóbulo blanco, plaqueta ne plasma. Ñee naquiiñeʼ guidúʼyanu ca cosa ni jma nahuiiniʼ zeeda lu rini ca casi rini la? Zanda guicaanu cani la? Maʼ cada tobi de laanu guʼyaʼ pa zacaa cani o coʼ. Ora chigúnicabe laanu ti hemodiálisis, hemodilución ne ni rábicabe recuperación de sangre maʼ de laanu riaana pa zacaanu cani, ne pa guicaanu cani la? zanda iquiiñecabe rini stinu ni qué ñuu chaahuiʼ (biiyaʼ ni na apéndice «Ca cosa jma nahuiiniʼ zeeda lu rini ne modo riquiiñeʼ ca doctor rini stiʼ binni para gusiándacaʼ».)

12. Ora cada tobi guni ni naa xconciencia, xi naquiiñeʼ gánnanu ne gúninu ante guidúʼyanu xi zanda guicaanu.

12 Ñee huaxiéʼ rusisaca Jiobá cani racaláʼdxinu gúninu ca la? Coʼ, purtiʼ laabe rizaaláʼdxibe gánnabe xi riníʼ íquenu ne xiñee racaláʼdxinu gúninu xiixa. Biblia na: «Pa guiniʼluʼ: “Biaa, qué gánnadidu ni”, ñee raʼbuʼ qué zanna ni ruuyaʼ xi nuu ndaaniʼ ladxidóʼ binni pa dxandíʼ ni o coʼ la? Dxandíʼ, ni cayuuyaʼ lii ca zanna ni ne zuni juzgar cada binni pur ni guni» (Proverbios 24:12). Pa rizaalaʼdxiʼ Jiobá ni rúninu, xi naquiiñeʼ gúninu ante guicaanu o gucáʼnanu xiixa medicina o tobi de ca modo riquiiñeʼ ca doctor ca rini stiʼ binni yaʼ. Caquiiñeʼ guni orarnu Dios ne ganna chaahuinu de laacani ti gúninu ni na Stiidxabe (Romanos 14:2, 22, 23). Cadi jneza diʼ gudiʼnu lugar gabi stobi laanu xi gúninu, laaca cadi galán diʼ guinabadiidxanu: «Lii xi ñúniluʼ». Purtiʼ lu ca cosa riʼ «cada  tobi zuaʼ donda stiʼ» (Gálatas 6:5; Romanos 14:12; biiyaʼ cuadru ra ná: « Ñee rusisacaʼ rini la?»). *

CA LEY STIʼ JIOBÁ RUSIHUINNI CANI NADXIIBE LAANU

13. Xi rusihuinni ca ley ne ca principiu ni zeeda lu Biblia de modo naca Jiobá. Bidii ti ejemplu.

13 Ca ley ne ca principiu zeeda lu Biblia rusihuinni cani Jiobá nga naca ti Dios ni riguixhe ley ne zeeda gácabe casi Bixhoze binni ni ruyubi modo guibani ca xiiñiʼ galán (Salmo 19:7-11). Dxi bidii Jiobá mandatu de cadi guidoʼno nin guicanu rini cadi bidiidibe ni para cadi gaca huaranu, peru ora  rúninu ni na ni la? racané ni laanu cadi gápanu ca guendahuará ni rapa binni ora ricá rini (Hechos 15:20). Stale doctor huazeetecaʼ jma galán cadi iquiiñecabe rini ora guni operárcabe. Ora gánnanu nga rudiʼnu cuenta pabiáʼ nadxii Bixhózenu Jiobá laanu ne guizáʼ nuu xpiaanibe. Biblia na: «Purtiʼ cásica jma nasoo guibáʼ que guidxilayú zacaca nga jma nasoo ca neza stinneʼ de ca neza stitu, ne cani riníʼ iqueʼ de cani riníʼ íquetu» (Isaías 55:9; Juan 14:21, 23).

14, 15. 1) Xi ley bidii Dios xquidxi ni bisihuinni rizaaláʼdxibe laacaʼ. 2) Ximodo zanda gúninu ni na ca principiu stiʼ ca ley ca lu xquendanabáninu.

14 Nabé rizaalaʼdxiʼ Jiobá chuʼ xquidxi nazaaca. Zacá bisihuinni ca ley ni bidiibe ca israelita que. Guidúʼyanu caadxi ejemplu. Gúdxibe laacaʼ gúnicaʼ ti pretil ique yoo sticaʼ. Cumu nabé biquiiñecabe ique lídxicabe la? ngue runi ley que gunabaʼ ni laacabe gúnicabe ti pretil para cadi guiábacabe (Deuteronomio 22:8; 1 Samuel 9:25, 26; Nehemías 8:16; Hechos 10:9). Laaca gúdxibe laacaʼ pa nápacaʼ yuze naduxhuʼ naquiiñeʼ chuʼcaʼ cuidadu ti cadi guniname binni (Éxodo 21:28, 29). Tu laa qué guni ni na ca ley stiʼ Dios zusihuinni qué gapa respetu xcaadxi binni ne zándaca gueeda gapa donda pa gati tuuxa.

15 Ximodo zanda gúninu ni na ca principiu stiʼ ca ley ca lu xquendanabáninu yaʼ. Caquiiñeʼ guidúʼyanu modo nuu xcárrunu, gusanu ni né guendabiaaniʼ, guni chaahuinu lídxinu, guidúʼyanu modo nuu ra rúninu dxiiñaʼ, gápanu ca maniʼ stinu ne ora chichítenu, galán guidúʼyanu pa qué zacananu. Ndaaniʼ caadxi guidxi rati stale hombrehuiiniʼ lu accidente purtiʼ qué runilucaʼ modo rusacaʼ carru sticaʼ. Nga runi, ca hombrehuiiniʼ ni qué racalaʼdxiʼ guixeleʼ de Dios ni nadxii laa ne rusisaca xquendanabani qué riuucaʼ ra naxoo purtiʼ si racaláʼdxicaʼ gúnicaʼ xiixa. Qué zaniʼcaʼ qué ziuu dxi guizaacacaʼ xiixa. Ne cumu qué riguucabe xquendanabánicabe ra naxoo la? ribánicabe jma galán (Eclesiastés 11:9, 10).

16. Xi principiu zeeda lu Biblia ni rusihuinni modo ruuyaʼ Dios ora gusaba binni baʼduʼ (biiyaʼ nota).

 16 Dios nabé rusisaca xquendanabani binni ne zaqueca ca baʼduhuiiniʼ ni caʼruʼ gale. Ley ni gucuaa Moisés que bisihuinni ni xi naquiiñeʼ gaca binni ni guniná ti gunaa ni nacaxiiñiʼ. Ley que na pa gatiʼ gunaa que o xiiñibe la? ziaba donda ique ni bininá laacabe que ne zuuticabe laa. Biblia na: «Ne pa tinde chupa hombre ne guninacaʼ ti gunaa nacaxiiñiʼ ne guni nga gale xiiñibe ante guizaa xpeeuʼ peru qué gatiʼ tuuxa la? ni napa donda ca napa xidé quixe guiráʼ ni biʼniʼ biaʼ naʼ xheelaʼ gunaa ca; ne napa xidé quíxebe biaʼ na ca juez. Peru pa gueeda gati tobi de laacabe la? óraque napa xidé gudiiluʼ guendanabani pur guendanabani» (Éxodo 21:22, 23). * Nga rusihuinni ximodo runi sentir Jiobá ora guʼyaʼ guiráʼ iza gatiʼ millón de baʼduhuiiniʼ ni caʼruʼ gale, stale biaje bínnipeʼ rusaba laacabe purtiʼ qué racaláʼdxicaʼ guchiiñacabe laacaʼ o para ganda gatanecaʼ gadxé gadxé gunaa o gadxé gadxé hombre.

17. Ximodo zanda gacanenu ti binni pa bisaba baʼduʼ ante guʼndaʼ Biblia.

17 Peru pa guyuu tu bisaba baʼduʼ ante guʼndaʼ Biblia yaʼ. Ñee naquiiñeʼ guiníʼ íquebe qué zutiidilaʼdxiʼ Dios xtóndabe la? Coʼ. Guiráʼ tu gaca arrepentir de guidubi ladxidóʼ zutiidilaʼdxiʼ Jiobá xtóndacaʼ pur rini ni bixhii Jesús (Salmo 103:8-14; Efesios 1:7). Jesús peʼ guníʼ cadi bedayubi «cani nachaʼhui sínuque cani cuchee, para inaba ca perdón Dios» (Lucas 5:32).

CUEENU GUIRÁʼ GUENDAQUÉIQUIIÑEʼ NUU NDAANIʼ LADXIDOʼNO

18. Casi na Biblia, xi rucaa binni guuti.

18 Cadi canabaʼ si Jiobá laanu cadi guninanu binni, sínuque laaca canábabe cueenu de ndaaniʼ ladxidoʼno ni rucaa  stale binni guuti: guendaracananalaʼdxiʼ. Apóstol Juan caguixhená laanu: «Ni nanalaʼdxi stobi la? zeda aca casi cani ruuti binni» (1 Juan 3:15). Juan cadi caníʼ diʼ pa qué riaba tuuxa  laanu, sínuque pa rinábanu gati binni ca. Ora nanaláʼdxinu tuuxa zaninu mal de laa o zanábanu gusabanáʼ Dios laabe pur xiixa ni qué ñúnibe jneza (Levítico 19:16; Deuteronomio 19:18-21; Mateo 5:22). Nga rusihuinni nabé risaca gúninu stipa pur cueenu guiráʼ guendaquéiquiiñeʼ nuu ndaaniʼ ladxidoʼno (Santiago 1:14, 15; 4:1-3).

19. Ca binni ni runi ni ná ca principiu stiʼ Biblia, xi zanda guiziidicaʼ de Salmo 11:5 ne Filipenses 4:8, 9.

19 Pa para laanu risaca guendanabani casi risaca ni para Dios, ne qué racaláʼdxinu guixélenu de laabe la? zúninu stipa pur cadi guninanu laanu ne cadi guninanu xcaadxi. Salmo 11:5 na Jiobá «nanalaʼdxiʼ tutiisi ni nadxii guendaridinde». Ca diidxaʼ riʼ cadi cusihuinni si cani xi runi sentir Dios; sínuque laaca cusiidiʼ cani laanu xi naquiiñeʼ gúninu lu xquendanabáninu: pa nadxiinu Dios, qué zaguítenu ne qué zadúʼyanu xiixa ni gucaa laanu chuuláʼdxinu guendaridinde. Ne ora guidúʼndanu lu Biblia ra na «zaguixhe dxí Dios ladxidóʼ[no]», rizíʼdinu caquiiñeʼ cuʼnu ndaaniʼ íquenu ne ndaaniʼ ladxidoʼno ni nachaʼhuiʼ, ni jneza, ni dxandíʼ risaca ne ni gucaa laanu chuʼnu tobi si (biindaʼ Filipenses 4:8, 9).

CA GRUPU NI MAʼ BIITI BINNI

20-22. Xi qué runi cani dxandíʼ xpinni Cristu, ne xiñee.

20 Para Dios ca binni ni cayuni ni na Binidxabaʼ nabiidiʼ nuu nacaʼ purtiʼ huayuuticaʼ binni ni qué guzaabiʼ gastiʼ. Stiidxaʼ Dios na ca gobiernu ni nuu lu Guidxilayú riʼ zeeda gácacaʼ casi maniʼ duxhuʼ, ni huayuuti millón de binni, dede né ca xpinni Jiobá (Daniel 8:3, 4, 20-22; Apocalipsis 13:1, 2, 7, 8). Stale negocio ne stale científicu huayacanecaʼ ca guidxi nadipaʼ ni nuu lu Guidxilayú riʼ para gúnicaʼ guiibaʼ ni guuti stale binni ne huayuni ganarcaʼ stale bidxichi pur laacani. Nga rusihuinni «naaze dxiichi binidxaba idubi guidxilayú» (1 Juan 5:19).

 21 Peru guiráʼ ca xpinni Cristu zanda guibánicaʼ nayecheʼ sin guchiiñaʼ xconciénciacaʼ laacaʼ. Xiñee yaʼ. Purtiʼ cadi cayúnicabe ni runi binni guidxilayú, ne qué riuucabe lu política nin lu guendaridinde (Juan 15:19; 17:16). * Ne ora rizananda binni laacabe qué rucaalúcabe laacaʼ cásica qué nucaalú Cristu cani guzananda laa, sínuque rannaxhiicabe ca xhenemígucabe dede runi orárcabe pur laacaʼ (Mateo 5:44; Romanos 12:17-21).

22 Cani dxandíʼ xpinni Cristu qué lica ridxaagacaʼ «Babilonia guidxi roʼ», ni zeeda gaca guiráʼ ca religión ni rusiidiʼ ni cadi dxandíʼ, ne ni maʼ biiti stale binni. Biblia na «ndaani guidxi ca bixii rini sti cani byuíʼ stiidxa Dios ne ca xpinni be, ne rini sti irá cani biiti binni». Pur nga cayabi Dios laanu ca diidxaʼ riʼ: «Lairee de ndaani guidxi ca, xpinne caʼ» (Apocalipsis 17:6; 18:2, 4, 24).

23. Xiruʼ naquiiñeʼ guni cani racalaʼdxiʼ guiree de Babilonia guidxi roʼ.

 23 Guiráʼ cani guzuubaʼ stiidxaʼ Dios ne guireecaʼ de Babilonia guidxi roʼ ca cadi rinábasicaʼ guixá lacaʼ lu lista ra cá lá guiráʼ cani nuu ndaaniʼ ni. Runirúcabe xcaadxi cosa. Nanaláʼdxicabe guiráʼ ca guendaquéiquiiñeʼ ni na religión ca jneza ne guiráʼ ni rudii ni lugar guni binni, casi chúʼnecaʼ ni cadi xheelacaʼ, chuʼcaʼ lu política ne guicá íquecaʼ gápacaʼ jma bidxichi. Biblia na: «Laatu cani nadxii Jiobá, lagaca nanalaʼdxiʼ ni cadi jneza. Laabe cayápabe xquendanabani cani qué rusaana laabe, de lu náʼ ca binni qué iquiiñeʼ rulabe laacaʼ» (Salmo 97:10; Apocalipsis 18:7, 9, 11-17). Pur cani rúnicabe ca la? huayati stale binni.

24, 25. 1) Xi riquiiñeʼ Jiobá para guilaselaʼdxiʼ ca binni ni maʼ guca arrepentir. 2) Xi rusietenalaʼdxiʼ ni laanu.

24 Ante chuʼnu ndaaniʼ religión ni rusiidiʼ ni dxandíʼ, bíninu casi runi guidxilayú stiʼ Binidxabaʼ riʼ. Ne cumu guyuʼnu ndaaniʼ religión ca la? laaca gúpanu donda pur guiráʼ ni runi ni. Peru despué bidiʼnu cuenta cadi jneza ni cayúninu ne gúpanu fe lu guendaguti stiʼ Cristu ne bidiʼnu xquendanabáninu Dios. Pur nga, bilaseláʼdxibe ne cayápabe laanu de ca cosa ni zándaca guxheleʼ laanu de laabe (Hechos 3:19). Modo rápabe laanu ca rusietenalaʼdxiʼ ni laanu ca guidxi ra bixooñeʼ binni dxiqué (Números 35:11-15; Deuteronomio 21:1-9).

25 Xi para guyuu ca guidxi que yaʼ. Ora guuti ti israelita tuuxa pur accidente naquiiñeʼ guxooñeʼ ndaaniʼ guidxi que ti ganda guilá. Ora chindabe ndaaniʼ tobi de ca guidxi riʼ, runi juzgar ca juez ni nuu ndaaniʼ guidxi que laabe ne gati si xaíque stiʼ cani ruzaaquiʼ guʼxhuʼ ni nabani dxi biitibe que maʼ zanda chindézabe ra gacaláʼdxibe. Cani gudixhe Dios riʼ bisihuinni ni nabé rilaseláʼdxibe binni ne risaca guendanabani stiʼ binni para laabe. Ca dxi stinu riʼ, xi zeeda gaca ca guidxi ra bixooñeʼ binni dxiqué para guilacaʼ. Laacani nga ni maʼ gudixhe Jiobá para gulá laanu pur guendaguti stiʼ Cristu.  Jiobá culá laanu de guendaguti ni naquiiñeʼ guicaanu purtiʼ nuu tiru qué rusisácanu guendanabani ne rini casi rinábabe ni laanu. Ximodo rusihuínninu rudiʼnu xquíxepeʼ Jiobá pur ni gudixhe para guilanu yaʼ. Ra gábinu binni chinanda cani maʼ gudixhe Jiobá para gulá laanu. Caquiiñeʼ gúninu ndiʼ nagueendaca purtiʼ maʼ zeeda dxiña ca dxi jma nagana (Mateo 24:21; 2 Corintios 6:1, 2).

ORA GUCHEECHENU DIIDXAʼ RUSIHUÍNNINU RUSISÁCANU GUENDANABANI

26-28. Xiñee zanda guininu nabáninu casi bibani profeta Ezequiel, ne xi caquiiñeʼ gúninu para cadi guixélenu de Dios ni nadxii laanu.

26 Ca dxi stinu riʼ, xquidxi Dios caguixhená binni cásica gudixhená Ezequiel xquidxi Dios dxiqué. Jiobá gudxi Ezequiel ca diidxaʼ riʼ: «Ora gabeʼ lii xiixa naquiiñeʼ chitídxiluʼ ni laacabe». Pa ñaca qué nizaalaʼdxiʼ Ezequiel ñuni dxiiñaʼ ni gucuaa riʼ, ñaba donda luguiabe ra binitilú ca binni de Jerusalén que (Ezequiel 33:7-9). Peru laanu nánnanu, bíʼnibe dxiiñaʼ bidii Dios laabe ne qué ñápabe donda stiʼ ca binni ni guti que.

27 Maʼ cadi candaa zanitilú guidxilayú stiʼ Binidxabaʼ riʼ. Nga runi ca testigu stiʼ Jiobá rininu ne stale guendanayecheʼ mayaca guidxiña dxi cuidxi Dios cuenta binni ne laaca rininu de Reinu stibe (Isaías 61:2; Mateo 24:14). Ñee rúninu dxiiñaʼ riʼ ne stale gana la? Pablu biʼniʼ ni zacá, ngue runi gunda guníʼ: «Ma cadi naa diaʼ napa donda pa initilú tu. Purti qué nusaana naya de ñue nia laatu irá ni na Dios» (Hechos 20:26, 27). Galán chinándanu ejemplu stiʼ Pablu.

28 Para cadi guixélenu de Dios ni nadxii laanu la? cadi caquiiñeʼ si gusisácanu guendanabani ne rini casi rusisácabe cani. Lu sti capítulo ca zadúʼyanu caquiiñeʼ chuʼnu nayá nezalube.

^ párrafo 5 Revista Investigación y Ciencia na: «Guiráʼ tipu de célula ni nuu lu rini caquiiñeʼ cani para ganda chuʼ guendanabani».

^ párrafo 12 Biiyaʼ revista ¡Despertad! stiʼ agosto 2006, yaza 3-12, ni biʼniʼ ca testigu stiʼ Jiobá.

^ párrafo 16 Caadxi binni ni nabé ruundaʼ modo gucuá Biblia nacaʼ pur modo cá ca diidxaʼ hebreu lu Éxodo 21:22, 23 qué zanda diʼ guiníʼ íquenu ora si gacaná gunaa ca nga naquiiñeʼ gaca ni na textu ca. Biblia na qué zuchaa diʼ Jiobá castigu ni naguixhe para tuuxa ni guuti ti baʼduhuiiniʼ ni cayáʼ o maʼ biluxe guyáʼ.