Biiyaʼ guiraʼ ni nuu lu sitiu riʼ

guyé lu índice

 Apéndice

Pora naquiiñeʼ guchii tuuxa ique, ne xiñee

Pora naquiiñeʼ guchii tuuxa ique, ne xiñee

Pablu bisiene nuu tiru naquiiñeʼ guchii ti gunaa Testigu ique para guni xiixa dxiiñaʼ ndaaniʼ xquidxi Jiobá. Pora naquiiñeʼ gúnibe ni ne xiñee. Guidúʼyanu ca diidxaʼ ni guníʼ Pablu lu 1 Corintios 11:3-16 ra zeeda caadxi conseju ni zanda gacané ca gunaa ca gánnacaʼ xi naquiiñeʼ gúnicaʼ para gusisácacaʼ Dios. Laabe bizeetebe chonna cosa: 1) ora gúnicabe xiixa dxiiñaʼ ra caquiiñeʼ guchiicabe íquecabe; 2) paraa nuucabe ora chigúnicabe dxiiñaʼ ca, ne 3) xiñee naquiiñeʼ chinándacabe mandatu riʼ.

Ora gúnicabe xiixa dxiiñaʼ. Pablu bizeeteʼ chupa de laani: ora guiniʼné ca gunaa ca Dios ne ora chigusiidicaʼ (versículo 4, 5). Nánnanu cayuni adorarnu Jiobá ora runi orarnu laa; ne laaca cayuni adorarnu laabe ora rusíʼdinu cani zeeda lu Biblia. Yanna, ñee caníʼ Pablu caquiiñeʼ guchii ca gunaa ca íquecaʼ cada guni orarcaʼ o gusiidicaʼ cani zeeda lu Biblia la? Coʼ. Naquiiñeʼ gúʼyacabe paraa nuucabe ti gánnacabe xi gúnicabe.

Paraa nuucabe. Pablu na zanda gúnicabe ni ora maʼ nuucabe ndaaniʼ lídxicabe ne ndaaniʼ neza binni ridagulisaa. Laabe nabe: «Hombre nga xaíque sti gunaa [...] peru tutiisi gunaa iníʼ né Dios o güi né binni ni biluíʼ Dios laa xie ique la? rusituí lú xheelaʼ» (versículo 35). Jiobá gudixhe gaca xheelaʼ ca gunaa ca xaíque sticaʼ. Peru xi zazaaca pa guni ti gunaa ti dxiiñaʼ ni bidii Jiobá guni xheelasibe yaʼ. Pa qué gusihuínnibe runi respetarbe xheelabe casi xaíque stibe la? zusituibe lú. Guidúʼyanu chupa chonna ejemplu. Ti gunaa Testigu naquiiñeʼ guchii ique ora chiguundané tuuxa Biblia pa nuu xheelaʼ raqué, ti gusihuínnibe runi respetarbe laa. Naquiiñeʼ gúnibe ni neca caʼruʼ chúʼnisa xheelabe, purtiʼ laa nga  naca xaíque ndaaniʼ lídxicabe. * Yanna, xi naquiiñeʼ guni ti gunaa Testigu pa nuu ti xiiñibe nahuiiniʼ ni maʼ guyuunisa ora chiguni orarbe o chigusiidibe tuuxa yaʼ. Laaca caquiiñeʼ guchiibe íquebe, neca cadi naca xiiñibe xaíque ndaaniʼ lídxibe. Xiñee yaʼ. Purtiʼ zacá zusihuínnibe runi respetarbe cani maʼ gudixhe Dios guni ca hombre ni maʼ guyuunisa ni nuu ndaaniʼ neza binni ridagulisaa.

Guidúʼyanu xi guníʼ Pablu naquiiñeʼ gaca ndaaniʼ ca neza binni ridagulisaa ca: «Pa nuu tuuxa qué na guni irá nga la? ganna dxichi nga ca runi irá ca xpinni Dios, laadu ne ca [neza binni ridagulisaa]» (versículo 16). Maʼ gudixhe Jiobá sániruʼ ca hombre ni maʼ guyuunisa ndaaniʼ ca neza binni ridagulisaa ca (1 Timoteo 2:11-14; Hebreos 13:17). Nga runi, hombre si nga naquiiñeʼ gaca binnigola ne siervu ministerial para gápacaʼ ca dendxuʼ stiʼ Dios (Hechos 20:28). Peru nuu tiru zuni ti gunaa Testigu dxiiñaʼ ni naquiiñeʼ si guni ti hombre ni maʼ guyuunisa. Zándaca gúnibe ti guendaridagulisaa ni raca ante gucheechenu diidxaʼ purtiʼ qué guinni ti hombre ni zanda gúnini. Nga runi naquiiñeʼ guchiibe íquebe purtiʼ laaca rusiidicabe lu guendaridagulisaa riʼ, ne hombre si nga naquiiñeʼ gúnini. Zaqueca naquiiñeʼ guni gunaa riʼ pa chiguundanebe tuuxa binni nezalú ti hombre ni maʼ guyuunisa. * Naquiiñeʼ gúnibe zacá para gusihuínnibe cayúnibe ti dxiiñaʼ ni runi ti hombre.

Peru cadi guiráʼ diʼ ora zuchiibe íquebe para guni adorarbe Jiobá. Casi ora chiguicábibe lu ti guendaridagulisaa, chigucheechebe diidxaʼ de yoo pur yoo (neca zinebe xheelabe o sti hombre ni maʼ guyuunisa) ne ora guni orarbe o gúʼndanebe ca xiiñibe ni caʼruʼ chúʼnisa. Peru pa qué gánnabe xi gúnibe yaʼ. Caquiiñeʼ guyúbibe lu xiixa libru o revista ni gacané laabe gánnabe xi gúnibe. * Peru pa nin ne zacá qué gánnabe xi gúnibe ne cuchiiñaruʼ  xquendabiaanibe laabe la? gastiʼ naca guchiibe íquebe.

Xiñee naquiiñeʼ chinándacabe mandatu riʼ. Lu versículo 10 nuu chupa razón ni rucaa ca gunaa ca gúnicaʼ ni ná mandatu ca: «Napa gunaa xidé utaagu ique para ihuinni napa tu runi mandar laa, purti cayuuya ca ángel laa». Primé razón ni nuu para guchiicabe íquecabe nga purtiʼ nápacabe tu runi mandar laacabe. Ora quíxhecabe lari ca íquecabe rusihuínnicabe runi respetárcabe guiráʼ ni maʼ gudixhe Jiobá guni ca hombre si ni maʼ guyuunisa ndaaniʼ neza binni ridagulisaa. Zacá zusihuínnicabe nadxiicabe Jiobá ne qué racaláʼdxicabe gucheenécabe laa. Guiropa razón nga purtiʼ cayuuyaʼ ca ángel ca laacabe. Ni runi ca gunaa ca, ñee zanda gacaneni ca ángel ca la?

Ca ángel ca ruuyacaʼ xi runi ca binni ni nuu ndaaniʼ xquidxi Jiobá, cásica cani nuu guibáʼ zaqueca cani nuu ndaaniʼ Guidxilayú riʼ, ne cayuuyacabe ximodo runi respetar ca binni riʼ Jiobá. Ca ángel ca riziidicaʼ stale de laanu, purtiʼ neca nácanu binni ruchee ruzúʼbanu diidxaʼ. Zanda gacaneni laacabe purtiʼ laaca naquiiñeʼ guzuubacabe stiidxaʼ Jiobá. Xiñee yaʼ. Purtiʼ guyuu de laacabe qué ñúnini dxiqué (Judas 6). Ora de guidubi ladxidóʼ ti gunaa guzuubaʼ stiidxaʼ ti hombre ni maʼ guyuunisa neca jma maʼ biziidiʼ stale cosa lu xquendanabani, jma nanna o jma nuu xpiaaniʼ la? riguixhe ti ejemplu ni zanda chinanda ca ángel. Ne jma ridxagayaacabe ora gúʼyacabe cayuni ti gunaa ni bibí pur espíritu santu zacá. Xiñee yaʼ. Purtiʼ gunaa riʼ zácabe tobi de cani chiguni mandarné Cristu guibáʼ ne zápabe ti dxiiñaʼ jma risaca que ca ángel ca. Casi maʼ bidúʼyanu ca, ca gunaa ca zanda gusihuínnicaʼ pur modo laacaʼ ruzuubacaʼ diidxaʼ de guidubi ladxidoʼcaʼ ne qué rinacaʼ gucheenecaʼ Dios. Ne ni rúnicabe ca racaneni ca ángel ca para cadi gudxiibacaʼ laca laacaʼ ne guzuubacaʼ diidxaʼ.

^ párrafo 3 Ora guni orar ti gunaa Testigu ni maʼ bichaganáʼ cadi naquiiñeʼ guni ni nadipaʼ nezalú xheelaʼ ni naca Testigu. Peru pa huará xheelabe ne qué ganda guiníʼ la? óraca zanda gúnibe ni nadipaʼ.

^ párrafo 1 Cadi naquiiñeʼ guchii ti hermana ique ora chiguundané ti binni de Biblia pa nezalú ti publicador ni caʼruʼ chúʼnisa chigúnibe ni, peru zuchiibe íquebe pa xheelabe nga publicador ca.

^ párrafo 2 Pa racaláʼdxiluʼ gánnaluʼ jma la? biiyaʼ xiná Torre stiʼ ni rapa 15 stiʼ febrero 2015, yaza 30, ne La Atalaya 15 stiʼ julio 2002, yaza 26, 27, ne 15 stiʼ julio 1977, yaza 445-448.