Biiyaʼ guiraʼ ni nuu lu sitiu riʼ

guyé lu índice

 CAPÍTULO 10

Guendaxheelaʼ: ni bisigaʼdeʼ Dios ni nadxii laanu

Guendaxheelaʼ: ni bisigaʼdeʼ Dios ni nadxii laanu

«Ti doo de chonna xcuaa qué zaruuguʼ diʼ nagueenda.» (ECLESIASTÉS 4:12.)

1, 2. 1) Ora riuunu ti guendaxheelaʼ, xi zándaca rinabadiidxanu laca laanu, ne xiñee. 2) Xi guendarinabadiidxaʼ zacábinu lu capítulo riʼ.

ÑEE riuuláʼdxiluʼ cheluʼ ti guendaxheelaʼ la? Stale binni riuulaʼdxiʼ cheʼ cani, purtiʼ riuucaʼ nayecheʼ. Cani cachaganáʼ ca rácucaʼ lari jma galán sticaʼ ne lucaʼ rusihuinni nuucaʼ nayecheʼ. Nabé riuucaʼ nayecheʼ dxi riʼ ne ruxuíʼ lucaʼ zabánicaʼ galán.

2 Peru naquiiñeʼ gánnanu cadiʼdiʼ ca guendaxheelaʼ ca lu stale guendanagana ca dxi stinu riʼ. Nga runi, neca riuunu ca guendaxheelaʼ ca ne racaláʼdxinu guibani cani cachaganáʼ ca nayecheʼ, nuu tiru rinabadiidxanu laca laanu: «Ñee zabánicabe nayecheʼ la? Ñee zandaa xquendaxheelacabe la?». Zaca ni zacá pa chinándacabe ca conseju ni zeeda lu Biblia ne gúnicabe stipa pur gúnicabe ni na cani. Biblia na: «Gupa confianza Jiobá de guidubi ladxidoʼloʼ, ne cadi chinándaluʼ ni na xpiaaniluʼ. Lu guiráʼ ni gúniluʼ biiyaʼ xi nabe, ne laabe zúnibe ca neza stiluʼ derechu» (Proverbios 3:5, 6). Pa gúnicabe stipa ca zabánicabe nayecheʼ ne qué zaxélecabe de Dios ni nadxii laacabe. Yanna, pa maʼ bichagananu o caʼruʼ guichagananu, galán guidúʼyanu ximodo cacabi Biblia tapa guendarinabadiidxaʼ zeeda raríʼ: Xiñee richaganáʼ binni. Ximodo zanda ganna chaahuiʼ binni tupeʼ guichaganáʼ. Xi guiráʼ caquiiñeʼ ganna ti binni para guichaganáʼ. Xi zacané ca guendaxheelaʼ ca chuʼcaʼ nayecheʼ biaʼ dxi nabánicaʼ.

 XIÑEE RICHAGANÁʼ BINNI

3. Xiñee zusihuinni tuuxa huaxiéʼ nuu xpiaaniʼ pa guichaganáʼ pur xiixa cosa ni qué risaca.

3 Nuu tu riníʼ para ganda chuʼ binni nayecheʼ caquiiñeʼ guichaganáʼ ne qué zanda guibánicaʼ nayecheʼ pa qué guidxélacaʼ tu guichaganacaʼ. ¡Peru cadi dxandíʼ ni riníʼcabe ca! Guiníʼ íquenu de Jesús. Laabe qué ñuu dxi nichaganabe ne guniʼbe nuu tu zanda guibani nayecheʼ neca qué guichaganáʼ ne cani zanda guiaana sin guichaganáʼ guluube gana laacaʼ para guiaanacaʼ zacá (Mateo 19:11, 12). Apóstol Pablu laaca bizeeteʼ xi ribeendú cani qué richaganáʼ (1 Corintios 7:32-38). Peru Pablu ne Jesús qué ñuu dxi niniʼcaʼ cadi lica guichaganáʼ binni; ne Biblia na tobi de ca cosa ni rusiidiʼ ca demonio ca nga cadi «ichaganá binni» (1 Timoteo 4:1-3). Cani racalaʼdxiʼ guni xhiiñaʼ Jiobá jma zanda gúnicaʼ ni pa qué guichaganacaʼ. Nga runi, cadi galán diʼ guichaganáʼ binni pur xiixa cosa ni qué risaca, casi ora chuʼ tu gabi laa xiñee caʼruʼ guichaganáʼ.

4. Xiñee ndaaniʼ ti guendaxheelaʼ nga galán gusiniisi binni xiiñiʼ.

4 Yanna, ñee nuu razón para guichaganáʼ binni la? Nuu pue. Purtiʼ Dios gudixhe guichaganáʼ binni ne laaca rapa cani richaganáʼ ca stale ndaayaʼ ne ribánicaʼ nayecheʼ. Biblia na: «De raqué guníʼ Jiobá Dios: “Cadi galán diʼ chuʼ hombre stubi si. Chiguneʼ tobi ni gacané laabe, biáʼsipeʼ para laabe”» (Génesis 2:18). Lu ti guendaxheelaʼ nga galán gusiniisi binni xiiñiʼ, purtiʼ caquiiñecabe gannaxhii bixhózecabe ne jñaacabe laacabe, gusiidicaʼ ne gulídxicaʼ laacabe (Salmo 127:3; Efesios 6:1-4). Peru nuuruʼ xcaadxi razón para guichaganáʼ binni.

5, 6. 1) Casi na Eclesiastés 4:9-12, xi ribeendú binni ora napa xhamigu. 2) Ximodo zanda gaca ti guendaxheelaʼ casi ti doo de chonna xcuaa.

5 Guidúʼyanu xi cusiene versículo ni cá ra ruzulú capítulo riʼ laanu: «Jma galán chuʼ chupa binni que tobi, purtiʼ ra gúnicabe dxiiñaʼ jma stale ni ribeendúcabe. Purtiʼ pa guiaba tobi de laacabe, stobi ca zanda guindisaʼ laabe. Peru, ximodo zie  ni tuuxa ora nuu stubi ne guiaba yaʼ. Guirutiʼ tu zandisaʼ laa. Ne pa gata chupa binni juntu zanda guidxaacaʼ; peru, ximodo zanda guidxaa tuuxa pa nuu stubi yaʼ. Ora stubi binni zanda gucaalú tuuxa laa, peru ora chúpacabe zanda gudxiilúcabe. Ne ti doo de chonna xcuaa qué zaruuguʼ diʼ nagueenda» (Eclesiastés 4:9-12).

6 Ni jma caníʼ ca versículo riʼ nga pabiáʼ risaca gapa binni xhamigu. Peru, ñee zanda gaca ni ná ca versículo ca lu ti guendaxheelaʼ la? Zanda pue, purtiʼ lu ti guendaxheelaʼ nga jma raca xhamigu chupa binni, ne zanda gacané saacabe laacabe, uguusaacabe gana ne gapasaacabe laacabe casi na textu ca. Peru para cadi guilaa ti guendaxheelaʼ caquiiñeʼ chuʼ sti cosa luni. Óraca zeeda gaca ni casi ti doo de chonna xcuaa, ne casi na libru stiʼ Eclesiastés, jma naguidxi zaca ni que ti doo de chupa xcuaa. Tuu nga zeeda gaca casi sti xcuaa ni racané gaca ni jma naguidxi yaʼ. Nga nga Jiobá. Ora guirópacabe runi adorárcabe Jiobá casi modo na ne rúnicabe stipa pur guzuubacabe stiidxaʼ, jma naguidxi riuu xquendaxheelacabe.

7, 8. 1) Xi conseju bidii Pablu para cani raca nagana para laacaʼ gucueezacaʼ laacaʼ de gatanecaʼ tuuxa. 2) Xiná Biblia zapa cani racalaʼdxiʼ guichaganáʼ.

7 Ora si maʼ bichaganáʼ binni nga zanda gatané xheelaʼ. Ne lú guendaxheelaʼ ca si nga zanda chuʼ binni nayecheʼ ora gatané xheelaʼ (Proverbios 5:18). Nga runi, pa raca nagana para ti hombre o ti gunaa gucueeza laa de gatané tuuxa neca maʼ huaniisi, o maʼ gudiʼdiʼ tiempu ra nabé ruquiinde laa gatané tuuxa la? galán gúnibe ni na conseju ni bidii Pablu riʼ: «Pa qué ganda guiaana ca stubi ca la? zaa ichaganá caʼ, purti jma galán ichaganá cabe pa qué ganda guni huantar cabe stubi cabe» (1 Corintios 7:9, 36; Santiago 1:15).

8 Intiica razón gapa binni para guichaganáʼ, laaca naquiiñeʼ ganna xi zadxagalú. Pablu na «zaca ni nagana para cani ichaganáʼ» (1 Corintios 7:28). Xiñee yaʼ. Purtiʼ rápacabe guendanagana ni qué rapa cani caʼruʼ guichaganáʼ. Nga runi, xi zanda guni tuuxa ni racalaʼdxiʼ guichaganáʼ para cadi gapa  stale guendanagana ne gapa stale ndaayaʼ lu xquendaxheelaʼ yaʼ. Naquiiñeʼ guʼyaʼ chaahuibe tu zanda guichaganabe.

XIMODO ZANDA GANNA CHAAHUIʼ BINNI TUPEʼ GUICHAGANÁʼ

9, 10. 1) Xi ejemplu biquiiñeʼ Pablu para bisihuinni cadi galán guichagananu ti binni ni qué runibiáʼ Dios. 2) Xi rizaaca cani qué runi ni ná ca conseju zeeda lu Biblia ne richaganacaʼ binni ni qué runibiáʼ Dios.

9 Pablu bicaa xi naquiiñeʼ guni ca binni ni cuyubi tu guichaganáʼ. Biquiiñebe ti ejemplu stiʼ ca binni ni runi dxiiñaʼ lu layú, laabe guniʼbe: «Cadi gaca né tu cani qué runi cre tobi si, purti zacá zeda gaca tu casi ti buey ni cadi cá né xcompañeru» (2 Corintios 6:14). Xi rizaaca ora rundiibicabe chupa yuze para gucaa surcu yaʼ. Pa tobi de laacame jma naroʼbaʼ o jma nadipaʼ que stobi que la? zacanácame ne qué zanda diʼ gúnicame dxiiñaʼ galán. Ngapeʼ nga rizaaca ora ti xpinni Cristu richaganáʼ ti binni ni qué runi ni na Jiobá. Guendaxheelaʼ ca rapa stale guendanagana, purtiʼ tobi de laacabe ruyubi modo cadi guixeleʼ de Dios ni nadxii laa, ne stobi ca qué rucaa ique chuʼ gaxha de Dios. Ne ni rizaaca nga qué randa ribánicabe galán. Nga runi Pablu guníʼ pa racalaʼdxiʼ tuuxa guichaganáʼ naquiiñeʼ «gaca ni ti xpinni Señor» (1 Corintios 7:39).

10 Peru nuu tu runi sentir nuu stubi ne nacaʼ jma galán guichaganacaʼ ti binni ni «qué runi cre» Dios que guiaanacaʼ stúbicaʼ. Nuu tiru qué rúnicabe ni na ca conseju zeeda lu Biblia ne richaganácabe ti binni ni qué runi ni na Jiobá. Peru despué rudiicabe cuenta xi bíʼnicabe. Nin qué rindaa rudiicabe cuenta bichaganácabe ti binni ni qué zanda gacané laacabe para guyúbicabe ni jma risaca lu xquendanabánicabe, ne zándaca guni sentírcabe jma nuucabe stúbicabe que ante guichaganácabe. Nabé riéchenu ora gánnanu stale de ca xpinni Cristu qué richaganacaʼ cani qué runi na Dios, sínuque runi crecaʼ zanda gacané Jiobá laacaʼ para guidxélacaʼ xheelacaʼ, ruzuubacaʼ stiidxabe ne qué rusaanacaʼ laabe. Biblia na: «Zudieeʼ lii guendariene, ne zusiideʼ lii saluʼ lu neza  ni naquiiñeʼ cheluʼ. Zudieeʼ conseju lii ne qué zaxhaluáʼ luguialuʼ» (Salmo 32:8). Stale de laacaʼ caʼruʼ guichaganacaʼ ne cabézacaʼ guidxélacaʼ tuuxa ndaaniʼ xquidxi Dios.

11. Xi zanda gacané laanu para gánnanu tu guichagananu (biiyaʼ cuadru ra ná: « Cani zacané laanu para ganna chaahuinu tu guichagananu»).

11 Binni ni rábinu guichagananu ca cadi caquiiñeʼ si gúnibe ni na Jiobá. Laaca caquiiñeʼ chuuláʼdxinu modo laabe ne chuuláʼdxibe modo laanu, guiníʼ íquebe cásica riníʼ íquenu, ugaandabe cani racaláʼdxinu ugaandanu ndaaniʼ xquidxi Dios ne gannaxhiibe Dios casi modo nadxiinu laa. Mozo ni nuu xpiaaniʼ huadii laanu stale conseju de laani lu guiráʼ ca guiʼchiʼ ni ribee, nga runi, naquiiñeʼ guʼndaʼ chaahuinu cani, guni orarnu de ni cayabi ni laanu ne gúninu ni na cani. Biblia na: «Stiidxaluʼ zeeda gaca ti lámpara para ñeeʼ, ne ti biaaniʼ neza rizayaʼ» (Salmo 119:105). *

12. Ximodo runi binni ndaaniʼ stale guidxi, ne xi ejemplu zeeda lu Biblia ni zanda chinanda ca binni ca.

12 Ndaaniʼ stale guidxi bixhoze binni ribí tu guichaganáʼ xiiñiʼ. Xiñee rúnicabe nga yaʼ. Purtiʼ nácabe bixhoze binni jma nuu xpiaaniʼ ne jma nanna tu laa zanda guichaganáʼ xiiñiʼ. Cásica guca dxiqué, ca binni ni ruyúbicabe xheelaʼ ca ribánicaʼ nayecheʼ. Bixhoze binni zanda guiziidiʼ de ejemplu stiʼ Abrahán pa racalaʼdxiʼ guyubi tu guichaganáʼ xiiñiʼ. Dxi gudixhe ique Abrahán guyubi xheelaʼ Isaac, qué nuyúbibe ti baʼdudxaapaʼ ni zeeda de ti familia ni napa stale bidxichi, sínuque biyúbibe ti gunaa ni runi adorar Jiobá, ne biseendabe tobi de ca binni runi xhiiñabe para yeyubi gunaa que (Génesis 24:3, 67). *

 XI GUIRÁʼ CAQUIIÑEʼ GANNA TI BINNI PARA GUICHAGANÁʼ

13-15. 1) Ximodo racané Proverbios 24:27 ca hombre ni cuyubi tu guichaganáʼ. 2) Xi naquiiñeʼ guni ti gunaa ti guʼyaʼ pa maʼ zanda guichaganáʼ.

13 Pa maʼ racaláʼdxinu guichagananu, galán guinabadiidxanu laca laanu: «Ñee maʼ zanda guichaganayaʼ la?». Caquiiñeʼ gánnanu cadi purtiʼ si maʼ racaláʼdxinu gannaxhiinu o gatanenu tuuxa guiníʼ íquenu maʼ zanda guichagananu, o purtiʼ runi sentirnu nuunu stúbinu o maʼ racaláʼdxinu gápanu xiiñinu. Naquiiñeʼ gánnanu primeru xi zanda gúninu lu xquendanabáninu.

14 Guidúʼyanu xi caquiiñeʼ guni ti hombre ni cuyubi ti gunaa para guichaganáʼ. Naquiiñeʼ guiníʼ íquebe ni cayeeteʼ lu versículo riʼ: «Guníʼ ique xi guiráʼ dxiiñaʼ chigúniluʼ fuera ne gudixhe ximodo chigaca ni lu layú. Oracaruʼ naquiiñeʼ gucuiluʼ lídxiluʼ» (Proverbios 24:27). Xi rusiidiʼ ni cá lu textu riʼ laanu. Dxiqué, pa tuuxa racalaʼdxiʼ guichaganáʼ riquiiñeʼ guinabadiidxaʼ laca laa: «Ñee maʼ zanda gapaʼ ne guyaanaʼ ti gunaa ne ca xiiñeʼ la?». Ante guichaganabe primeru naquiiñeʼ gúnibe dxiiñaʼ lu layú stibe. Ne ngaca naquiiñeʼ guni ca hombre ca yanna. Pa maʼ racaláʼdxicabe guichaganácabe, naquiiñeʼ gánnacabe zudiicabe guiráʼ ni guibaniné binnilídxicabe biaʼ dxi chúʼcabe nazaaca. Biblia na pa ti hombre qué gudii ni gó ne ni gacu binnilidxi, qué gúʼyabe xi cayuni sentircaʼ ne qué gúʼndanebe laacaʼ Stiidxaʼ Dios la? binni ca «zeda aca jma nadxaba que ni qué runi cre» (biindaʼ 1 Timoteo 5:8).

15 Gunaa ca laaca naquiiñeʼ ganna xi guiráʼ dxiiñaʼ zuni ora maʼ guichaganáʼ. Biblia ruzeeteʼ xi guiráʼ naquiiñeʼ guni ti gunaa ti ganda gacané xheelaʼ ne guni dxiiñaʼ ndaaniʼ lidxi (Proverbios 31:10-31). Guiráʼ hombre o gunaa ni qué guʼyaʼ primeru pa maʼ zanda guichaganáʼ rusihuínnicaʼ racaláʼdxicaʼ para laasicaʼ. Xiñee yaʼ. Purtiʼ qué riníʼ íquecaʼ ximodo zanda gacanecaʼ xheelacaʼ. Peru ni jma risaca ganna cani racalaʼdxiʼ guichaganáʼ nga ximodo gúnicaʼ ni na ca conseju ni zeeda lu Biblia ca lu xquendanabánicaʼ. Guidúʼyanu xi naquiiñeʼ gúnicabe.

16, 17. Xi conseju zeeda lu Biblia naquiiñeʼ guiníʼ ique cani racalaʼdxiʼ guichaganáʼ.

 16 Ante guichaganáʼ tuuxa la? naquiiñeʼ ganna xi dxiiñaʼ canabaʼ Dios guni hombre ne gunaa ora maʼ bichaganacaʼ. Hombre ca naquiiñeʼ ganna chaahuiʼ xi dxiiñaʼ guni ora maʼ gaca xaíque stiʼ binnilidxi. Cadi galán diʼ gácabe naduxhuʼ né binnilídxibe, sínuque naquiiñeʼ chinándabe ejemplu stiʼ Cristu (Efesios 5:23). Zaqueca, ca gunaa ca naquiiñeʼ gánnacaʼ xi guiráʼ dxiiñaʼ naquiiñeʼ gúnicaʼ ora maʼ guichaganacaʼ. Nga runi, galán guinabadiidxacaʼ laca laacaʼ: «Ñee zuzuubaʼ stiidxaʼ xheelaʼ la?» (Romanos 7:2). Ti gunaa ni caʼruʼ guichaganáʼ maʼ cuzuubaʼ stiidxaʼ Jiobá ne stiidxaʼ Cristu (Gálatas 6:2). Ne pa guichaganabe la? laaca naquiiñeʼ guzuubabe stiidxaʼ xheelabe. Nga runi, laaca naquiiñeʼ guinabadiidxabe laca laabe: «Ñee zuzuubaʼ stiidxaʼ ti hombre ruchee ne gacaniáʼ laa la?». Pa huaxiéʼ riuulaʼdxiʼ ti gunaa guzuubaʼ diidxaʼ, jma galán guni pa qué guichaganáʼ.

17 Binni ni guichaganáʼ ca laaca naquiiñeʼ ganna napa xidé gudii ni iquiiñeʼ xheelaʼ, neca gadxé ni racaláʼdxibe gúnibe (biindaʼ Filipenses 2:4). Pablu bicaa: «Naquiiñe ganaxhii hombre xheela casi nadxii laca laa, ne irá gunaa guni ni na xheelaʼ». Ne ca diidxaʼ ca Pablu biene ribeza ca hombre ca guni respetar xheelacaʼ laacaʼ ne ca gunaa ca ribézacaʼ gannaxhii xheelacaʼ laacaʼ (Efesios 5:21-33).

Stale de cani napa novio rusihuínnicaʼ riníʼ íquecaʼ jneza ora guinábacaʼ tuuxa guireené laacaʼ

18. Xiñee naquiiñeʼ ganna binni gucueeza laa ora maʼ napa novio.

18 Nga runi, ora chupa binni maʼ nácacaʼ novio galán gánnacaʼ cadi para chúʼsicaʼ nayecheʼ nga nácacaʼ novio, sínuque caquiiñeʼ gúnicaʼ stipa pur gunibiáʼ chaahuicaʼ ti gúʼyacaʼ pa zanda guichaganacaʼ. Laaca naquiiñeʼ gápacaʼ laacaʼ. Xiñee yaʼ. Cumu riuulaʼdxisaacaʼ la? qué zaca nagana para laacaʼ gusihuínnicaʼ pabiáʼ nadxiicaʼ ne dede gúnicaʼ cosa malu. Peru pa dxandíʼ nadxiicaʼ, zúnicaʼ stipa pur cadi gucheenecaʼ Dios (1 Tesalonicenses 4:6). Nga runi, cani maʼ napa novio naquiiñeʼ gúnicaʼ stipa pur gucueezacaʼ laacaʼ, ne pa gúnicaʼ nga la? zacané ni laacaʼ lu xquendanabánicaʼ, cásica pa guichaganacaʼ o cadi guichaganacaʼ.

 XIMODO ZANDA GUINDAA TI GUENDAXHEELAʼ

19, 20. Biquiiñeʼ ejemplu ni zeeda raríʼ para gusiéneluʼ modo ruuyaʼ stale binni guendaxheelaʼ ne ximodo naquiiñeʼ guʼyaʼ ca xpinni Cristu ni.

19 Para cadi guilaa ti guendaxheelaʼ caquiiñeʼ gánnacabe cadi guendariguite ni. Cada guiluxe ti película o ti libru riluxené ni ti guendaxheelaʼ ra rihuinni nuu ca novio ca nayecheʼ. Peru ni dxandíʼ la? cadi racá diʼ nga riluxe ti historia, sínuque racá nga cuzulú ti guendaxheelaʼ ni gulaquistí Jiobá ne naquiiñeʼ guindaa ni (Génesis 2:24). Peru nabé triste nga ni raca, purtiʼ stale binni qué ruuyaʼ ni casi modo ruuyaʼ Dios ni. Nuu guidxi ruuyacabe guendaxheelaʼ ca casi chupa ndaa doo ni zanda guiliibi ne zanda guixadxeʼ ora gacaláʼdxicabe. Ne ruluíʼ zacapeʼ nga modo ruuyaʼ binni ni, purtiʼ racaláʼdxicaʼ cuezanecaʼ xheelacaʼ ora nuusicaʼ galán, peru ora maʼ gápacaʼ guendanagana maca nuucaʼ gusaanacaʼ xheelacaʼ.

20 Stale binni ruuyaʼ guendaxheelaʼ ca para chupa chonna gubidxa si. Nga runi riuucabe nayecheʼ ora maʼ chichaganácabe purtiʼ nánnacabe pa chuʼ xiixa guendanagana zanda gusaanacabe xheelacabe. Peru cadi guiaandaʼ laanu Stiidxaʼ Dios na guendaxheelaʼ ca zeeda gaca ni casi ti doo. Nuu doo nabé riuulaʼdxiʼ binni laa purtiʼ nin qué riruugu. Casi ca doo stiʼ ti barcu, runi huantar cani ora guidxaagalú barcu ca ti bi ne ti nisaguié naroʼbaʼ, qué riruuguʼ ni ne zaqueca qué riacha ni. Zacaca nga bizáʼ Jiobá guendaxheelaʼ, bizaʼbe ni para guindaa ni. Guietenaláʼdxinu ca diidxaʼ ni guníʼ Jesús: «Ni ma bichaaga Dios la? ma cadi indaa binni guidxilayú» (Mateo 19:6). Ca xpinni Cristu laaca zacaca naquiiñeʼ gúʼyacaʼ guendaxheelaʼ. Peru ñee qué reeda gaca guendaxheelaʼ ca casi ora ñuáʼcabe ti cosa ni nanaa la? Coʼ.

21. Xi naquiiñeʼ ganna cani maʼ bichaganáʼ ne xi ejemplu nuu para laacabe.

21 Guendaxheelaʼ ca zanda guedané ni stale guendanayecheʼ.  Ne para chúʼcabe nayecheʼ caquiiñeʼ gúʼyacabe ca cosa galán runi xheelacabe, stipa ni rúnicaʼ ne cadi gúʼyacabe paraa cucheecaʼ. Peru pa gúnicabe zacá, ñee cadi casi ñaca qué nácabe gúʼyacabe para cuchee xheelacabe la? Coʼ. Jiobá nanna paraa rucheʼnu, peru neca zacá racaláʼdxinu gúʼyabe ca cosa galán ni rúninu. Hombre ni bicaa salmo riʼ gunabadiidxaʼ: «Pa ra cuchee si binni nga ñuuyaluʼ la? Jah, Jiobá, tuu nga nuzuhuaa nezaluluʼ yaʼ» (Salmo 130:3). Cani maʼ bichaganáʼ naquiiñeʼ gúʼyacaʼ ca cosa galán ni runi xheelacaʼ ne  gúnicaʼ stipa pur gutiidiláʼdxicaʼ stóndacaʼ (biindaʼ Colosenses 3:13).

22, 23. Xi ejemplu bisaana Abrahán ne Sara para cani maʼ bichaganáʼ.

22 Ca guendaxheelaʼ ca zanda guibánicaʼ jma nayecheʼ ra tiidiʼ iza. Nápanu ejemplu stiʼ Abrahán ne Sara. Laaca gúpacabe stale guendanagana neca maʼ huaniisicabe. Dxi napa Sara biaʼ 60 iza, zándaca guca nagana para laa gusaana lidxi ndaaniʼ guidxi Ur, ti guidxi ra nabé gupa binni bidxichi, ne chindeza ndaaniʼ ti yoohuiiniʼ de lari. Peru bíʼnibe ni ne bizuubabe stiidxaʼ xheelabe. Ne gucanebe xheelabe para gunda bigaandacabe guiráʼ ni gudixhe íquecabe. Qué nusaanabe de ñacanebe Abrahán. Ne bíʼnibe ni cadi para gusihuínnisibe runi respetarbe laa, sínuque dede guniʼbe señor stibe laa (Génesis 18:12; 1 Pedro 3:6). Bizuubabe stiidxaʼ xheelabe de guidubi ladxidoʼbe.

23 Dxandíʼ, guyuu biaje qué niníʼ íquecabe tobi si. Ne bihuinni ni dxi gunabaʼ Sara Abrahán guni xiixa, neca qué ñuulaʼdxiʼ ni gunábabe laa que. Peru Jiobá gudxi Abrahán guni ni na xheelaʼ, ne bíʼnibe ni gudxi xheelabe laabe ne zaqué bisihuínnibe qué nudxiibabe laca laabe ne gucuaacabe stale ndaayaʼ (Génesis 21:9-13). Ca dxi stinu riʼ, cásica cani deruʼ bichaganáʼ zaqueca cani maʼ napa stale iza, zanda guiziidicaʼ de ca ejemplu riʼ.

24. Xi caquiiñeʼ guni ca guendaxheelaʼ ca para gusisácacaʼ Jiobá Dios, ne xiñee.

24 Ndaaniʼ ca neza binni ridagulisaa ca nuu stale guendaxheelaʼ ne rihuinni runi respetar ca gunaa ca xheelacaʼ, ca hombre ca rannaxhiicaʼ xheelacaʼ ne rusisácacaʼ laacabe, ne guirópacabe rúnicabe ni na Jiobá lu xquendanabánicabe. Dxandíʼ, ca guendaxheelaʼ ca zanda guibánicaʼ nayecheʼ. Casi maʼ bidúʼyanu, guiráʼ cani gacalaʼdxiʼ guibani nayecheʼ caquiiñeʼ gánnacaʼ tu guichaganacaʼ, xi gúnicaʼ ante guichaganacaʼ ne caquiiñeʼ gúnicaʼ stipa pur gannaxhiisaacaʼ ti ganda guibánicaʼ galán. Pa gúnicabe zacá la? zusisácacabe Jiobá, Dios ni nadxii laacabe, ne qué zaxélecabe de laa.

^ párrafo 11 Biiyaʼ capítulo 2 stiʼ libru Ximodo guibanineluʼ binnilídxiluʼ nayecheʼ, ni biʼniʼ ca testigu stiʼ Jiobá.

^ párrafo 12 Caadxi xaíque stiʼ ca familia ni guyuu dxiqué bichaganacaʼ chupa chonna gunaa. Peru cadi Dios diʼ gudixhestí ni. Jiobá bidii lugar bibánicabe zaqué dxi bibani ca xaíque stiʼ ca familia que, ne para tiempu stiʼ ca israelita que gudíxhebe caadxi ley para ganna ca binni que modo guibánicaʼ. Peru dxi beeda Cristu gudixhe maʼ qué zanda gapa ca xpinni chupa chonna xheelaʼ (Mateo 19:9; 1 Timoteo 3:2).