Biiyaʼ guiraʼ ni nuu lu sitiu riʼ

guyé lu índice

 CAPÍTULO 17

«Lauyubi uzuhuaa chaahui tu lu ni runi cre tu»

«Lauyubi uzuhuaa chaahui tu lu ni runi cre tu»

«Lauyubi uzuhuaa chaahui tu lu ni runi cre tu. [...] Cadi ixele tu de Dios ni nadxii laatu.» (JUDAS 20, 21.)

1, 2. Xi naquiiñeʼ gúninu para chuʼnu nazaaca, ne xiñee caquiiñeʼ gúninu zacá.

GUIRANU racaláʼdxinu chuʼnu nazaaca. Peru para ganda guiniisinu nazaaca la? naquiiñeʼ guidoʼno guendaró ni gacané laanu, gúninu ejerciciu ne cadi gusaana de gápanu laanu. Pa gúninu zacá, zanda gacané cani laani chuʼnu nazaaca. Zaqueca laaca naquiiñeʼ guiniisinu lu sti cosa. Xi laani yaʼ.

2 Discípulo Judas guníʼ de laani ora bicaa ra nuu ca xpinni Cristu: «Cadi ixele tu de Dios ni nadxii laatu». Ne laaca guniʼbe xi caquiiñeʼ gúnicabe para cadi guixélecabe de Dios. Laabe nabe caquiiñeʼ guzuhuaa chaahuicabe lu ni runi crécabe (Judas 20, 21). Yanna, xi naquiiñeʼ gúninu para iguidxi fe stinu ne cadi guixélenu de Dios ni nadxii laanu yaʼ. Guidúʼyanu chonna cosa ni zanda gacané laanu.

GUNI CRENU DE GUIDUBI LADXIDOʼNO ZACANÉ CA LEY STIʼ DIOS LAANU

3-5. 1) Ximodo racalaʼdxiʼ Binidxabaʼ guidúʼyanu ca ley stiʼ Jiobá. 2) Bisiene né ti ejemplu ximodo naquiiñeʼ guidúʼyanu cani rinabaʼ Jiobá laanu ne ximodo zuni sentirnu ora guidúʼyanu cani zacá.

3 Primé la? naquiiñeʼ guni crenu zacané ca mandamientu stiʼ Dios laanu, purtiʼ ora gúninu zacá zaniisi fe stinu. Lu libru riʼ maʼ bidúʼyanu xi guiráʼ rinabaʼ Dios guni binni lu xquendanabani. Yanna, xi riníʼ íquenu de cani canabaʼ Dios laanu ca yaʼ. Binidxabaʼ racalaʼdxiʼ guidúʼyanu ca ley stiʼ Jiobá, ca principiu ne cani canábabe laanu casi ti cosa ni cucueeza  laanu de gúninu guiráʼ ni racaláʼdxinu. Cumu biiyabe gunda biaba ca binni ni guyuu Edén que lu trampa riʼ la? riquiiñerube ni dede yanna (Génesis 3:1-6). Peru, ñee raʼbuʼ zanda gusábabe laanu né trampa ca la? Qué zucaadibe laanu gucheʼnu pa rúninu guiráʼ ni rinabaʼ Dios laanu.

4 Guzéʼtenu ti ejemplu. Guiníʼ íquenu zizanu ndaaniʼ ti parque ne nuu ti lugar ndaaniʼ ni nabé sicarú, peru nuu ti leʼ raqué ne qué zanda tiidinu ni purtiʼ nasoo ni. Zándaca guidxiichinu xiñee nuu ni raqué. Peru ora guʼyaʼ chaahuinu ndaaniʼ ni nuu ti lión naduxhuʼ ni cabeza si tu guxuuxe la? rudiʼnu cuenta nuu leʼ que raqué para gulá ni laanu de lión que. Yanna, ñee nuu tuuxa binni ni racalaʼdxiʼ guiaaxha luguianu ne nuu guxuuxe laanu la? Nuu pue, ne Stiidxaʼ Dios caguixhená laanu de binni ca: «Lacuu xpiaani tu ne lagataná, purti canazá binidxabaʼ, enemigu stitu, canananda laatu casi ti lion ni canaguu beedxeʼ, canayubi tu uxuuxe» (1 Pedro 5:8).

5 Dxandíʼ, ni racalaʼdxiʼ Binidxabaʼ nga guxuuxe laanu. Ne para cadi guiábanu lu guiráʼ ca trampa stibe, Jiobá cudii laanu caadxi ley ni zanda gapa laanu (Efesios 6:11). Nga runi, cada guiníʼ íquenu de ca ley ni maʼ bidii Bixhózenu ni nuu guibáʼ laanu rudiʼnu cuenta nadxiibe laanu. Xiñee yaʼ. Purtiʼ nánnanu rudiibe cani laanu para gapa cani laanu ne para chuʼnu nayecheʼ. Nga runi, discípulo Santiago na ziuʼnu nayecheʼ pa «iziʼdi chaahui nu ley sti Cristu ni jma risaca, ne izaalaʼdxi nu guni nu ni na ni, sin usiaʼnda nu ni ma bina diaga nu» (Santiago 1:25).

6. Xi zacané laanu iguidxi fe stinu lu ca ley stiʼ Dios, ne ximodo rusihuínninu cayúninu ni na ca ley ca.

6 Ni jma zanda gacané laanu guni crenu ley stiʼ Jiobá ne iguidxi fe stinu nga gúninu ni na ca ley stibe lu xquendanabáninu, purtiʼ laabe gudixhestibe cani. Rusihuínninu cayúninu ni na Jiobá ora rúninu ni na ca ley «ni gudixhe Cristu» ni cayabi laanu naquiiñeʼ gusíʼdinu binni guiráʼ ni nabe (Gálatas 6:2; Mateo 28:19, 20). Laaca ruzúʼbanu diidxaʼ ra qué rusaana de guidagulisaanu para guni adorarnu Dios ne uguusaanu  gana laanu (Hebreos 10:24, 25). Sti cosa ni rinabaʼ Dios laanu nga cadi gusaana de guni orarnu laa de guidubi ladxidoʼno (Mateo 6:5-8; 1 Tesalonicenses 5:17). Ora gúninu guiráʼ ni canabaʼ Jiobá laanu riʼ la? rudiʼnu cuenta pabiáʼ nadxiibe laanu. Laaca rudiʼnu cuenta racané cani laanu para chuʼnu nayecheʼ ne ridxá tipa ladxidoʼno jma que cani cudii guidxilayú riʼ laanu. Ora guiníʼ íquenu xi zabeendunu ra gúninu ni na ca ley stiʼ Dios jma zaguidxi fe stinu.

7, 8. Ximodo riguixhedxí Biblia ladxidóʼ ca binni ni riníʼ ique qué zanda gúnicaʼ ni na Dios lu guidubi naca xquendanabánicaʼ.

7 Nuu tu laa riníʼ ique qué zanda guni ni na ca ley stiʼ Jiobá lu guidubi naca xquendanabani ne ridxibi gucheené laabe. Pa guiníʼ íquenu zacá la? galán guietenaláʼdxinu ca diidxaʼ riʼ: «Naa, Jiobá, naa nga Dios stiluʼ, ni cusiidiʼ lii para cueenduluʼ ni galán. Ni cayabi lii gunáʼ nga neza ra naquiiñeʼ saluʼ. ¡Pa lii dxandíʼ nucaadiaʼguʼ ca mandamientu stinneʼ! Óraque ñeeda gaca guendariuudxi stiluʼ cásipeʼ ti guiiguʼ, ne guendaruni jneza stiluʼ casi ola nisadóʼ» (Isaías 48:17, 18). Ñee maʼ huaníʼ íquenu pabiáʼ riguixhedxí textu riʼ ladxidoʼno la?

8 Lu textu ca Jiobá cayabi laanu pa guzúʼbanu stiidxaʼ zabeendunu chupa cosa. Primé, zeeda gaca ladxidoʼno casi ti guiiguʼ, purtiʼ laani nexhedxí ni, ziáʼ ni ne qué rusaana de guxooñeʼ  ni. Guiropa, guiráʼ ca cosa ni gúninu jneza zeeda gaca cani casi ca ola stiʼ nisadóʼ. Ximodo yaʼ. Ora maʼ zuhuaʼnu ruaa nisadóʼ ridúʼyanu qué riaana dxí de guiasa ola lu ni, ne nánnanu qué ziuu dxi gusaana de gaca nga. Nga runi, textu riʼ cayabi laanu caquiiñeʼ gúninu stipa para qué chuʼ dxi gusaana de gúninu ni jneza biaʼ dxi nabáninu. Pa gúninu stipa pur gúninu ni na Jiobá la? qué zudiibe lugar guchéʼnenu laabe. Biblia na: «Bilaa ni nualuʼ luguiáʼ Jiobá ne laabe zanaazebe lii. Qué ziuu dxi gudiibe lugar guiaba ni runi ni jneza» (Salmo 55:22). Guiráʼ cani cayabi Dios laanu riʼ racané cani laanu para cadi gusaana de guni crenu Jiobá ne gúninu cani canábabe laanu.

«UCÁʼ IQUE NU INIISI NU LU STIIDXA DIOS»

9, 10. 1) Xiñee galán quixhe ique ca xpinni Cristu chuʼcaʼ jma gaxha de Dios. 2) Xiñee riuu ca xpinni Cristu nayecheʼ ora gúnicaʼ ni na Dios yaʼ.

9 Guiropa cosa ni naquiiñeʼ gúninu nga ni na ca diidxaʼ riʼ: «Ucáʼ ique nu iniisi nu lu stiidxa Dios» (Hebreos 6:1). Nánnanu ca dxi stinu riʼ qué zanda diʼ ugaandanu gácanu binni sin donda, peru guiranu zanda quixhe íquenu guiniisinu lu Stiidxaʼ Dios. Ne ora jma gúninu ni na Dios jma nayecheʼ ziuʼnu. Xiñee rininu zacá yaʼ.

10 Ora ti xpinni Cristu chuʼ gaxha de Dios riníʼ ique casi modo riníʼ íquebe (Juan 4:23). Pablu guníʼ «cani nabani casi na ique la? ruyubi guni ni riulaʼdxi si, peru cani nabani casi na Espíritu la? ruyubi guni ni na Espíritu» (Romanos 8:5). Ca binni ni qué ruuyaʼ ca cosa ca casi ruuyaʼ Dios cani qué ribánicaʼ nayecheʼ, purtiʼ racaláʼdxicaʼ para laasicaʼ, qué ruuyaʼ chaahuicaʼ xii nga ni jneza ne ricá íquecaʼ gápacaʼ jma bidxichi. Peru ca binni ni cayuni ni na Dios nabé riuucaʼ nayecheʼ, purtiʼ rúnicaʼ ni na ti Dios nayecheʼ biaʼ dxi nabánicaʼ (1 Timoteo 1:11). Riguixhe íquecaʼ gúnicaʼ ni nabe ne riuucaʼ nayecheʼ neca guidxagalucaʼ xiixa guendanagana pur rúnicaʼ ni nabe. Peru xiñee riuucabe nayecheʼ yaʼ. Purtiʼ  nánnacabe pa guni huantárcabe ca guendanagana ca zusihuínnicabe rusiguii Binidxabaʼ ne zusiéchecabe ladxidóʼ Bixhózecabe ni nuu guibáʼ (Proverbios 27:11; biindaʼ Santiago 1:2, 3).

11, 12. 1) Bisiene xi naquiiñeʼ gúninu ti ganda guiniisinu lu stiidxaʼ Dios, ne xi riníʼ diidxaʼ griegu ni biquiiñeʼ Pablu. 2) Bisiene ximodo zanda iziidiʼ binni iquiiñeʼ xcuerpu.

11 Para ganda chuʼnu gaxha de Dios ne guiníʼ íquenu casi riníʼ íquebe la? caquiiñeʼ gúninu ni nabe. Zacá cuzeeteʼ versículo riʼ: «Cani ma zanda go gueta la? nga cani ma nanna uná nga jneza ne uná nga ni cadi jneza, purti ma biaa ca guni ca jneza» (Hebreos 5:14). Pablu na caquiiñeʼ gusiaʼnu laanu gúninu ni jneza ti gúninu ni na Dios. Biquiiñebe ti diidxaʼ griegu ni nabé binibiáʼ binni ndaaniʼ ca gimnasio ni guyuu guidxi Grecia lu primé siglu que, ne diidxaʼ ni biquiiñebe que riníʼ ni «runi ejerciciu casi ti gimnasta». Guidúʼyanu xi guiráʼ naquiiñeʼ guni ti binni para gueeda gaca ti gimnasta.

Ca gimnasta rúnicaʼ stale ejerciciu para ganda gudiicaʼ bieque lu bi

12 Guirutiʼ rale maca nanna iquiiñeʼ xcuerpu. Casi ora gale ti baʼduhuiiniʼ la? qué ganna paraa nuu náʼ, lú o ñee ne qué ganna iquiiñeʼ cani jneza. Nga runi, nuu biaje rigápacaʼ lucaʼ dede ridxiichicaʼ ne ruyúbicaʼ tu gudapa laacaʼ. Peru chaahuidugá riziidicaʼ iquiiñecaʼ xcuérpucaʼ: primeru, rizanacaʼ, despué rundaacaʼ pasu ne qué rindaa ruxooñecaʼ. * Laanu zudiʼnu cuenta xi guiráʼ zanda guninenu xcuérpunu ora guidúʼyanu xi runi ti gimnasta. Ora ridúʼyanu maʼ cachésacabe, pabiáʼ galán rieequecabe lu bi ne biáʼsipeʼ modo rúnicabe ni la? riníʼ íquenu biquiiñecabe stale tiempu para biʼniʼ ensayárcabe. Biblia na «racané ejerciciu cuerpu stinu» para chuʼnu nazaaca, peru ruzeeteʼ ni jma galán guyúbinu modo chuʼnu gaxha de Dios (1 Timoteo 4:8).

13. Ximodo zanda gánnanu xii nga ni jneza ne xii nga ni cadi jneza.

 13 Lu libru riʼ maʼ bidúʼyanu stale cosa ni zanda gacané laanu para gánnanu xii nga ni jneza ne xii nga ni cadi jneza ti ganda chuʼnu jma gaxha de Jiobá ne cadi guchéʼnenu laa. Ante quixhe íquenu gúninu xiixa, galán guni orarnu Dios ti gacanebe laanu gánnanu xi conseju o xi ley zanda chinándanu. Galán guinabadiidxanu laca laanu: «Xi ley o conseju zeeda lu Biblia caníʼ de ni naguixhe iqueʼ guneʼ riʼ. Ximodo zanda guneʼ ni na cani. Ñee ziuulaʼdxiʼ Bixhozeʼ ni nuu guibáʼ ni naguixhe iqueʼ guneʼ riʼ la?». Biblia na: «Gupa confianza Jiobá de guidubi ladxidoʼloʼ, ne cadi chinándaluʼ ni na xpiaaniluʼ. Lu guiráʼ ni gúniluʼ biiyaʼ xi nabe, ne laabe zúnibe ca neza stiluʼ derechu» (Proverbios 3:5, 6; biindaʼ Santiago 1:5). Pa gatigá iquiiñenu ca guendarinabadiidxaʼ riʼ ante quixhe íquenu gúninu xiixa la? chaahuidugá zazíʼdinu xii nga ni jneza ne ni cadi jneza. Zacá ziuʼnu gaxha de Dios ne zadúʼyanu ca cosa ca casi ruuyabe cani.

14. Xi naquiiñeʼ gúninu pa racaláʼdxinu chuʼnu gaxha de Dios, ne xi cadi naquiiñeʼ gúninu pa nánnanu stale o nuu xpiaaninu.

14 Para ganda guiniisi ti binni galán la? caquiiñeʼ gó ni gacané laa. Laanu laaca naquiiñeʼ guizíʼdinu jma de Jiobá para cadi gusaana de chuʼnu gaxha de laabe. Casi maʼ bidúʼyanu ca, caquiiñeʼ guidúʼndanu Stiidxaʼ Dios ti gueeda gácanu casi «cani ma zanda go gueta». Pa racaláʼdxinu iguidxi fe stinu la? cadi naquiiñeʼ gusaana de guidúʼndanu Stiidxaʼ Dios. Laaca caquiiñeʼ gúninu ni cazíʼdinu lu xquendanabáninu para gusihuínninu nuu xpiaaninu. Ne nabé risaca gúninu nga,  purtiʼ Biblia na «guendanuuxpiaaniʼ nga ni jma risaca». Nga runi guxhélenu ladxidoʼno ne guizíʼdinu guiráʼ ca cosa sicarú ni cusiidiʼ Dios laanu (Proverbios 4:5-7; 1 Pedro 2:2). Peru gastiʼ razón para guni crenu laca laanu purtiʼ si nánnanu stale o jma nuu xpiaaninu. Cadi gusaana de guidúʼyanu ximodo nuu ladxidoʼno para cadi guni crenu laca laanu o chuʼ xiixa cosa malu ndaaniʼ ni. Ne Pablu cayabi laanu naquiiñeʼ guidúʼyanu pa zuhuaa chaahuinu lu ni runi crenu ne guuyaʼ chaahuinu ximodo nuunu (2 Corintios 13:5).

15. Xiñee caquiiñeʼ gannaxhiinu ti ganda chuʼnu gaxha de Dios.

15 Para ganda chuʼ binni nazaaca la? cadi naquiiñeʼ gusaana de gó ni gudii stipa laa ne ni gacané laa. Zacaca naquiiñeʼ gúninu para ganda chuʼnu gaxha de Dios. Xi naquiiñeʼ gúninu para chuʼnu gaxha de Dios ne cadi guixélenu de laa yaʼ. Caquiiñeʼ gannaxhiinu. Ne ngapeʼ nga ni caquiiñeʼ gúninu. Ra zidiʼdiʼ dxi la? jma naquiiñeʼ gannaxhiinu Jiobá ne ca bíʼchinu ne ca bizáʼnanu. Peru pa cadi nadxiinu Jiobá ne ca xpinni la? pur gana si nánnanu stale ne nuu xpiaaninu (1 Corintios 13:1-3). Nga runi, ni zacané laanu chuʼnu gaxha de Jiobá nga gannaxhiinu laabe ne ca xpínnibe.

CADI GUSAANA DE GUNI CRENU ZUNI JIOBÁ CANI MAʼ GUNÍʼ

16. Xi rucaa Binidxabaʼ guni binni ne xi racané laanu guni huantarnu.

16 Guionna cosa ni naquiiñeʼ gúninu nga cadi gusaana de quixhe íquenu lu cani maʼ guníʼ Jiobá chiguni. Para gaca nga la? naquiiñeʼ chuʼnu cuidadu de cani riníʼ íquenu. Xiñee yaʼ. Purtiʼ Binidxabaʼ, ni cayuni mandar guidxilayú riʼ, nanna modo gucaa binni guiníʼ diidxaʼ ni cuee gana stobi ne iquiiñebe laa para guniná né ca stiidxaʼ, ne nánnabe modo gucaabe binni para cadi guni cré intiica si ne qué guidxela xi guni (Efesios 2:2). Nabé malu pa gácanu zacá, purtiʼ ziuʼnu ra naxoo, casi ti yoo de yaga ora maʼ cacá bandaa laa. Peru cumu zanda cuézanu guni chaahuiʼ Dios guiráʼ ca guendanagana stinu la? nga racané laanu para guni huantarnu.

17. Ximodo ruchaaga Biblia ne cani runi crenu zuni Jiobá.

 17 Ni zacané laanu gudxíʼlunu Binidxabaʼ ne ca xpinni nga guni crenu de guidubi ladxidoʼno zuni Dios cani maʼ guníʼ. Ne nga zeeda gaca ni casi ti cascu ni riguu ique ti soldadu (1 Tesalonicenses 5:8). Guzéʼtenu de ca soldadu ni bibani dxiqué. Ante chitíndecabe riguu íquecabe ti gorro de guidi ne óraca riguu íquecabe ti cascu de guiibaʼ luguiáʼ ni ti cadi gacanapeʼ íquecabe ora chinécabe xiixa golpe. Nánnacabe pa qué chinécabe cascu que ora chitíndecabe záticabe. Cásica rapa cascu ique ti soldadu la? zacaca qué zusaana de guiníʼ íquenu ni jneza pa guni crenu zuni Dios cani maʼ guníʼ.

18, 19. Ximodo bisihuinni Jesús qué nusaana de niníʼ ique xi guiráʼ zazaaca pa guzuubaʼ stiidxaʼ Bixhoze, ne ximodo zanda chinándanu ejemplu stibe.

18 Qué ñuu dxi nusaana Jesús de niníʼ ique xi guiráʼ zazaaca pa guzuubaʼ stiidxaʼ Bixhoze. Guietenaláʼdxinu guiráʼ yuubaʼ gudíʼdibe últimu gueelaʼ ante gátibe. Tobi de cani jma xhamígube bitoo laabe. Stobi de laacaʼ guníʼ nezalú stale binni qué runibiáʼ laabe. Ne xcaadxi de laacaʼ bisaanacaʼ laabe ne bixooñecaʼ. Laaca ca binni xquídxibe bicaalucaʼ laabe, gunábacaʼ guniná ca soldadu romanu que laabe ne guuticaʼ laabe. Ne zanda guininu gudíʼdibe lu stale guendanagana ni qué ziuu dxi guidxaagalunu. Xi gucané laabe para biʼniʼ huantarbe yaʼ. Hebreos 12:2 na: «Qué nizaalaʼdxi be gati be zaqué [lu ti yaga], purti nanna be nabé zieche be ora ma udiʼdi be ni. Ne zaqué uca ni, udiʼdi si irá enda naná stibe que la? ze be ibáʼ, ne ma zuba be cueʼ Dios ni nandxóʼ». Casi maʼ bidúʼyanu ca, biecheʼ Jesús pur guiráʼ guendanagana ni gudiʼdiʼ que.

19 Xiñee biéchebe yaʼ. Purtiʼ nánnabe xi zabeendube pa qué gucheenebe Dios: zacanebe guisaca lá Dios ne zusihuínnibe rusiguii Binidxabaʼ. ¡Gástiruʼ sti cosa ni jma nusiecheʼ Jesús que ni gudixhe ique guni que! Laaca nánnabe zudii Bixhózebe ni nuu guibáʼ laabe stale ndaayaʼ ne zabiguetaʼ ziuube gaxha de laa. Qué nusiaandaʼ Jesús guiráʼ ni chigudii Bixhoze laa ora gudiʼdiʼ lu guiráʼ ca guendanagana que. Laanu laaca naquiiñeʼ  gúninu zacaca. Qué chuʼ dxi gusiáʼndanu zudii Jiobá laanu guiráʼ ni maʼ guníʼ, neca tídinu lu guendanagana cásica gudiʼdiʼ Jesús. Rihuinni rusisaca Jiobá laanu purtiʼ cudiibe lugar gacanenu para guisaca labe ne gusihuínninu rusiguii Binidxabaʼ. Ximodo zanda gúninu nga yaʼ. Zanda gúninu ni pa qué guixélenu de Bixhózenu ni runi mandar guidubi naca guibáʼ ne Guidxilayú ne guyúbinu modo cadi gusaana de gannaxhiibe laanu neca guidxaagalunu intiica guendanagana.

20. Xi cadi naquiiñeʼ gúninu para cadi gusiáʼndanu cani maʼ guníʼ Jiobá chigudii laanu.

20 Jiobá cadi racalaʼdxiʼ si uguu ndaayaʼ laanu purtiʼ ruzúʼbanu stiidxaʼ, sínuque racaláʼdxibe gúnibe ni de guidubi ladxidoʼbe. Biblia na: «Latané diezmu stitu ra almacén ti chuʼ guendaró ndaaniʼ lidxeʼ; ne laguuyaʼ, na Jiobá, Dios stiʼ ca ejércitu, pa qué zuxheleʼ ca compuerta stiʼ guibáʼ ne zundaateʼ ndaayaʼ stinneʼ luguiatu dede ora maʼ cadi cayaadxaʼ gastiʼ laatu» (Malaquías 3:10; Isaías 30:18). Riuuláʼdxibe gudiibe guiráʼ ni na ladxidóʼ cani runi ni nabe (Salmo 37:4). Nga runi, cadi gusiáʼndanu guiráʼ ni maʼ guníʼ Jiobá chigudii laanu. Qué chuʼ dxi gúninu ni cadi jneza, gúninu guendaquéiquiiñeʼ ne guiníʼ íquenu casi riníʼ ique cani qué runi ni na Dios. Pa gudiʼnu cuenta maʼ caníʼ íquenu o cayúninu casi runi ca binni ca la? galán guinábanu Jiobá quixhedxí ladxidoʼno ne zacá zatadxí xquendabiaaninu (Filipenses 4:6, 7).

21, 22. 1) Xi guiráʼ ndaayaʼ nabé galán chigudii Dios laanu. 2) Xi jma rusisácaluʼ de cani chigudii Dios ca xpinni, ne xi naguixhe íqueluʼ gúniluʼ.

 21 ¡Nabé galán cani chigudii Dios laanu riʼ! Guiníʼ íquenu xi guiráʼ ndaayaʼ chigudii Dios laanu pa nuunu lade ca binni ni chitiidiʼ lu ca dxi «jma nagana» ca (Apocalipsis 7:9, 14). Qué zanda diʼ guiníʼ íquenu ximodo ziuʼnu ora maʼ qué gucaa Binidxabaʼ ne ca demonio stiʼ laanu gúninu ni racaláʼdxicaʼ. Xiñee yaʼ. Purtiʼ guirutiʼ huabani sin qué gucaa Binidxabaʼ laa guni guendaquéiquiiñeʼ. Ora maʼ qué gucaa Binidxabaʼ laanu gúninu ni racalaʼdxiʼ la? guizáʼ galán zuni sentirnu, purtiʼ ora maʼ cayuni mandarné Cristu 144,000 binni dede guibáʼ, zanda gacanenu gaca Guidxilayú riʼ ti paraísu. ¡Ne ni jma racaláʼdxinu nga guiree guiráʼ guendahuará, guidúʼyanu guiasa ca binni ni nadxiinu de lade gueʼtuʼ ne guibáninu galán casi modo gudixhe ique Dios nibani binni dxiqué! Ora maʼ zedadxiña dxi gácanu binni ni qué gapa donda la? zudii Dios laanu ti cosa jma galán: ziuʼnu casi modo nuu ca xiiñibe (Romanos 8:21).

22 Ni racalaʼdxiʼ Jiobá nga cadi chuʼ xiixa ni guchiiñaʼ laanu ne chuʼnu cásica modo nuu ca xiiñibe guibáʼ. Para ganda chuʼnu zacá la? caquiiñeʼ guzúʼbanu diidxaʼ. Nga runi, naquiiñeʼ gúninu stipa pur cadi gusaana de guzúʼbanu stiidxaʼ Jiobá. Pa racaláʼdxinu guibáninu zacá la? ¡cadi gusaana de guzuhuaa chaahuinu lu cani runi crenu para cadi chuʼ dxi guixélenu de Dios ni nadxii laanu!

^ párrafo 12 Ca científicu ca nacaʼ nápanu ti sentidu ni racané laanu gánnanu paraa nuunu, paraa nuu nanu, ñeenu ne diáganu. Xi runi ni yaʼ. Sentidu riʼ racané ni laanu capananu neca deʼguʼ lunu. Peru pa maʼ qué guni ni dxiiñaʼ ora maʼ huaniisinu, zándaca zaca nagana para laanu guzuhuaʼnu, sanu o cuinu derechu.