Biiyaʼ guiraʼ ni nuu lu sitiu riʼ

guyé lu índice

 Apéndice

Modo gaca chaahuiʼ guendanagana gapa binni lu negocio

Modo gaca chaahuiʼ guendanagana gapa binni lu negocio

Apóstol Pablu bizeeteʼ lu 1 Corintios 6:1-8 xi naquiiñeʼ gúninu ora laaca ti xpinni Cristu guni demandar laanu. Primé la? bidxiichibe purtiʼ guyuu xpinni Cristu de guidxi Corinto ni  guyé «ra nuu justicia»(versículo 1). Oraqueruʼ gúdxibe laacaʼ guni chaahuicaʼ guendanagana sticaʼ ndaaniʼ neza binni ridagulisaa ne cadi ra nuu juez. Yanna, guidúʼyanu chupa chonna de ca razón ni bicaabe lu carta stibe ra bisiénebe xiñee cadi jneza chinécabe ca bíʼchicabe nezalú juez. De racá laaca zadúʼyanu pora nga cadi naquiiñepeʼ chinándanu cani bicaabe ca.

Ora tinde chupa xpinni Cristu pur xiixa negocio, Jiobá ribeza guni chaahuicabe guendanagana stícabe casi modo racalaʼdxiʼ ne cadi casi modo nácabe (Proverbios 14:12). Jesús guníʼ jma galán guni chaahuiʼ binni guendanagana stiʼ nagueendaca pacaa jma zaroobaʼ ni (Mateo 5:23-26). Triste guininu ni, peru nuu de ca xpinni Cristu riuuláʼdxipecaʼ tíndecaʼ dede riecaʼ ra nuu juez para gaca chaahuiʼ guendanagana sticaʼ. Peru Pablu gudxi ca xpinni Cristu de Corinto que ca diidxaʼ riʼ: «Ra cadinde tu ca la? racá nga riree chu tu lu neza sti Dios». Xiñee guniʼbe zacá pue. Purtiʼ zándaca guiníʼ binni mal de lá Dios ni runi adorarnu ne de neza binni ridagulisaa stinu. Para cadi gaca nga la? galán gúninu ni na ca diidxaʼ guniʼbe riʼ: «Jma galán ñaca ni [pa] qué nidxiichi tu ra nuchee né cabe laatu» (versículo 7).

Pablu laaca bizeeteʼ maʼ gudixhe Dios ximodo gaca chaahuiʼ ca guendanagana ni gapa ca xpinni Cristu. Laabe nabe ndaaniʼ ca neza binni ridagulisaa ca nuu hombre ni nanna stale pur guiráʼ ni maʼ biziidiʼ de lu Biblia. Laacabe nga ca binnigola ni zanda «quixhe dxí intiica aca lade ca» xpinni Cristu ora chuʼ xiixa guendanagana (versículo 3-5). Jesús laaca bizeeteʼ chonna cosa ni naquiiñeʼ gaca ora tinde binni pur guiniʼcaʼ xiixa ni cadi dxandíʼ de stobi o gusiguiicaʼ binni para cuánacaʼ. Primé la? binni ni gucaná ca naquiiñeʼ gabi biʼchiʼ xi biʼniʼ, peru guirópasicaʼ. Pa qué naʼ bíʼchibe gucaadiaga laabe la? zanda gábibe chupa o chonna binni para chinecaʼ laabe ti gúʼyacaʼ racaláʼdxibe guni chaahuibe guendanagana ni napanebe bíʼchibe. Peru pa nin né nga qué nabe guiénebe la? naquiiñeʼ gábibe ni ca binnigola ni zaniruʼ ndaaniʼ neza binni ridagulisaa stibe (Mateo 18:15-17).

Ca binnigola ca cadi nácacaʼ abogadu ne cadi naquiiñeʼ  guiníʼcabe ximodo guni ti xpinni Cristu xiixa negocio purtiʼ cadi nga diʼ nga xhiiñacabe. Zaqueca cadi jneza quíxhecabe xi naquiiñeʼ guni ca xpinni Cristu ti gusaana de tíndecaʼ pur negocio sticaʼ. Ni caquiiñeʼ gúnicabe nga gacanécabe guiropaʼ binni riʼ chinándacaʼ ca conseju ni zeeda lu Biblia para guni chaahuicaʼ guendanagana sticaʼ peru sin gusaana de guidxaagacaʼ. Pa qué ganna ca binnigola ca ximodo zanda gacanecaʼ ca binni riʼ la? zanda guinábacabe superintendente de circuito o Betel para gacané laacabe. Peru ziuu ora qué zanda diʼ gúninu ni na ca conseju bidii Pablu ca. Guidúʼyanu pora nga qué zanda gúninu ni na ca conseju ca.

Ora guni demandarnu tuuxa cadi riníʼ diʼ nga cayúninu ni para guninanu laabe. Zándaca gúninu ni purtiʼ zacá rinabaʼ ley ni laanu o para gaca chaahuiʼ guendanagana stinu. Casi para ganda gaca divorciar tuuxa, gúʼyacaʼ tu laa guiaanané xiiñicaʼ, guʼyaʼ tuuxa gunaa cadi gusiaadxaʼ xheelaʼ bidxichi ni iquiiñeʼ ca xiiñiʼ pa maʼ cadi nabézacaʼ o gaca cobrar ti seguru. Laaca zanda gaca demandar xiixa negocio ni maʼ nuu lu quiebra ti ganda quixe ni nuzaabiʼ; o para guihuinni xi testamento nga ni dxandíʼ. Ne pa chuʼ tu guni demandar ti xpinni Cristu laaca zanda guni demandarbe binni ca para cadi guni laabe gastiʼ. *

Ora guizaaca ti xpinni Cristu tobi de ca cosa ni maʼ bizéʼtenu ca la? cadi cucheenebe conseju bidii Pablu pa chebe ra nuu juez gacané laabe gaca chaahuiʼ guendanagana stibe, peru cadi naquiiñeʼ gúnibe ni purtiʼ si racaláʼdxibe tíndebe. * Cadi gusiaandanu xii nga cani jma risaca para laanu: gusisácanu lá Jiobá ne guyúbinu modo chuʼnu tobi si ne cani ridagulisaanenu. Ca xpinni Cristu runibiáʼ binni laacaʼ purtiʼ nadxiisaacaʼ ne qué ruyúbicaʼ para laasicaʼ (1 Corintios 13:4, 5; Juan 13:34, 35).

^ párrafo 1 Huaxiéʼ si biaje runadiáganu guni ti xpinni Cristu cosa malu casi guilaxoo, quiñe tuuxa, guuti o cuanaʼ xiixa ni nabé risaca. Peru pa gúnibe tobi de laacani la? cadi cuchee diʼ tuuxa pa guni demandar laabe, neca gabi juez laabe gúnibe xiixa o guseguyoo laabe.

^ párrafo 2 Pa racaláʼdxiluʼ gánnaluʼ jma la? biiyaʼ La Atalaya 15 stiʼ marzo 1997, yaza 17-22, ne 15 stiʼ octubre 1991, yaza 25-28.