Biiyaʼ guiraʼ ni nuu lu sitiu riʼ

guyé lu índice

 CAPÍTULO 12

Cadi gusaana de guininu diidxaʼ ni gacané binni

Cadi gusaana de guininu diidxaʼ ni gacané binni

«Cadi iníʼ tu diidxa ni guniná stobi, sínuque lainíʼ diidxa jneza ni zanda acané stobi.» (EFESIOS 4:29.)

1-3. 1) Xi bisigaʼdeʼ Jiobá laanu ne xi rusihuinni cadi jneza riquiiñeʼ binni ni nuu tiru. 2) Ximodo naquiiñeʼ guininu pa qué racaláʼdxinu guixélenu de Dios ni nadxii laanu.

BIXUIʼLÚ nusigáʼdeluʼ ti carru ti binni ni nadxiiluʼ ne laa gusá ni modo gapa gana ne iquiiñeʼ ni para guniná binni. Ximodo ñuni sentirluʼ yaʼ. Ñee cadi dxandíʼ ñuuluʼ triste la?

2 Jiobá nga Dios ni rudii «irá ni nachaʼhui ne irá ni dxandí sicarú» (Santiago 1:17). Laabe bisigáʼdebe laanu ti cosa sicarú: nga nga ruaanu para guininu, ne laani rusihuinni ni gadxé laanu de ca maniʼ ca ne racané ni laanu guininu xi nápanu ndaaniʼ íquenu ne xi runi sentirnu. Peru laaca nuu tiru qué riquiiñeʼ binni ni jneza cásica binni ni bidiicabe laa carru ni bizéʼtenu que. Nuu tu laa riquiiñeʼ ni modo rapa gana ne dede runinacaʼ xcaadxi binni pur ni riniʼcaʼ. Yanna, ñee rudiiluʼ cuenta pabiáʼ triste riuu Jiobá ora qué iquiiñeʼ binni ni bisigáʼdebe laa ca jneza la?

3 Pa qué racaláʼdxinu guixélenu de Dios ni nadxii laanu la? galán iquiiñenu ni bisigáʼdebe laanu ca casi modo racaláʼdxibe. Lu Biblia cayeeteʼ xi canabaʼ Jiobá laanu gúninu: «Cadi iníʼ tu diidxa ni guniná stobi, sínuque lainíʼ diidxa jneza ni zanda acané stobi uzuhuaa chaahuiʼ, ne ni acané tutiica guna diaga ni iníʼ tu» (Efesios 4:29). Nga runi, guidúʼyanu xii nga cadi naquiiñeʼ guininu ne ximodo iquiiñenu ni bisigaʼdeʼ Dios laanu ca para gacanenu stobi. Peru  ante la? guidúʼyanu xiñee naquiiñepeʼ nga gucueezanu ruaʼnu ora guininu.

XIÑEE NAQUIIÑEʼ GUCUEEZANU RUAANU

4, 5. Ximodo rusihuinni stale de ca proverbio zeeda lu Biblia pabiáʼ nadipaʼ ca diidxaʼ riníʼ binni.

4 Primé razón ni nápanu para gucueezanu ruaanu nga, purtiʼ zanda guniná stiidxanu binni o gacané ni laacaʼ. Proverbios 15:4 na: «Diidxaʼ nadóʼ zeeda gaca casi ti yaga ni rudii guendanabani, peru diidxaʼ huati runiná». Diidxaʼ nadóʼ ni riree ruaa ti binni zeeda gaca ni casi gupa riaba guiráʼ siadóʼ ne casi ti pomada ni rixuubi ladi binni. Peru ca diidxaʼ ni qué riníʼ ique binni para guiníʼ runiná cani. Casi maʼ bidúʼyanu, ca diidxaʼ ni guiníʼ binni zanda guniná cani ne zanda gacané cani (Proverbios 18:21).

5 Lu Proverbios 12:18 laaca cayeeteʼ pabiáʼ nadipaʼ ca diidxaʼ ni rininu. Racá cayeeteʼ pa tuuxa guiníʼ xiixa sin guiníʼ ique la? zuniná stiidxabe casi runiná ti espada. Ora gundaa ruaanu xiixa sin guiníʼ íquenu runiná stiidxanu binni ne dede zándaca gunítinu ca xhamígunu. Ca diidxaʼ ca zanda guniná cani laanu jma que nidiʼdiʼ ti espada ladxidoʼno. Peru libru stiʼ Proverbios na: «Diidxaʼ ni riníʼ binni nuu  xpiaaniʼ zeeda gaca casi remediu». Binni ni runi stipa pur gusihuinni riníʼ ique casi Dios riguubiáʼ ni riníʼ. Ora guininu diidxaʼ jneza racanenu sti binni ne riuʼnu gaxha de ca xhamígunu. Guiranu nánnanu pa iquiiñenu ca diidxaʼ stinu jneza zanda gacanenu binni. Biblia na: «Diidxaʼ sicarú zeeda gaca casi ti campana ra daʼ dxiña bizu, nanaxhi para xhialma binni ne zeeda gaca casi ti remediu para dxita ladi binni» (Proverbios 16:24). Nadipaʼ ca diidxaʼ ni rininu, nga runi, galán iquiiñenu cani para gacanenu stobi ne cadi para guninanu laacaʼ.

Ca diidxaʼ nadóʼ ni rininu reeda gaca cani casi gupa ni rusigaandaʼ siadóʼ

6. Xiñee raca nagana para laanu gucueezanu ruaanu.

6 Peru nuu tiru runinanu binni pur ca diidxaʼ ni rininu, neca rúninu stipa para cadi guininu xiixa ni guniná laacaʼ. Ne pur nga guiropa razón riʼ cayabi laanu naquiiñeʼ chuʼnu cuidadu pur cani rininu: cumu binni gulené donda laanu la? nga runi qué riquiiñenu ca diidxaʼ stinu jneza. Raca nagana para laanu gucueezanu ruaʼnu purtiʼ de ndaaniʼ ladxidoʼno riree diidxaʼ ni cadi jneza. Ne Biblia na «ladxidóʼ hombre puru cosa malu rinabaʼ guni» (Génesis 8:21; Lucas 6:45; biindaʼ Santiago 3:2-4). Yanna, neca raca nagana para laanu gucueezanu ruaʼnu purtiʼ nácanu binni ruchee, zanda iquiiñenu ni jneza. Caquiiñeʼ gúninu stipa casi stipa runi binni ni caxuubaʼ ora cudxiilú ti corriente nisa.

7, 8. Xiñee zanabaʼ Jiobá cuenta binni pur ni guiníʼ.

7 Guionna razón nuu para gucueeza binni ruaa nga purtiʼ zanabaʼ Jiobá cuenta binni pur ni guiníʼ. Pa guininu diidxaʼ ni cadi jneza cadi zuxheleʼ si ni laanu de binni, sínuque laaca zuxheleʼ ni laanu de Dios. Zacá cuzeeteʼ Santiago 1:26 ni: «Pa nuu tobi de laatu zácaxa runi ni na Dios, peru qué rucueeza ruaa de iníʼ ni cadi jneza la? caguite laca laa, purti cadi dxandí cayuni ni na Dios». * Casi bizíʼdinu lu capítulo 11 que, cadi jneza guiníʼ íquenu gadxé nga modo  runi adorarnu Jiobá ne gadxé nga modo iquiiñenu ca diidxaʼ stinu. Pa qué gucueezanu ruaanu ne guininu diidxaʼ ni guniná binni qué zasaca guiráʼ dxiiñaʼ ni gúninu nezalú Dios. Nga naquiiñeʼ gucaa laanu guiníʼ íquenu ximodo riquiiñenu ca diidxaʼ stinu (Santiago 3:8-10).

8 Maʼ bidúʼyanu chonna razón para gucueezanu ruaanu. Yanna guidúʼyanu xi diidxaʼ cadi lica naquiiñeʼ guininu ne gunáʼ nga ca diidxaʼ ni zanda guininu para gacanenu sti binni.

DIIDXAʼ NI RUNINÁ

9, 10. 1) Xi diidxaʼ nabé riquiiñeʼ binni dede maʼ qué ridxagayaanu gunadiáganu. 2) Xiñee cadi naquiiñeʼ guininu diidxaʼ guidxa (laaca zanda gúʼyaluʼ nota).

9 Diidxaʼ guidxa. Ca dxi nabáninu riʼ maʼ cadi guendaridxagayaa nga gunadiáganu guiníʼ binni diidxaʼ guidxa ne guiniʼcaʼ xiixa ni cadi dxandíʼ de sti binni. Stale de laacaʼ riquiiñecaʼ ca diidxaʼ riʼ para gudiicaʼ stipa ni caniʼcaʼ o purtiʼ qué gánnacaʼ xi diidxaʼ iquiiñecaʼ ora maʼ caniʼcaʼ. Ca artista ni rusixidxi binni riniʼcaʼ chiste ni napa diidxaʼ guidxa para chuulaʼdxiʼ binni ni caniʼcaʼ. Peru ca chiste de diidxaʼ guidxa ca cadi para gusixidxi cani laanu. Maʼ raca chupa mil iza de biseendaʼ Pablu ti carta ra nuu ca xpinni Cristu de Colosas ne gúdxibe laacaʼ cadi lica guiniʼcaʼ «diidxa guidxa» (Colosenses 3:8). Ne ca xpinni Cristu de Éfeso gúdxibe laacaʼ: «Cadi lica guiete [...] diidxa guidxa» ládetu (Efesios 5:3, 4).

10 Jiobá qué racalaʼdxiʼ guiníʼ binni diidxaʼ guidxa. Nga runi, laaca rixhacaláʼdxinu ne qué rininu cani. Nánnanu pa ininu cani casi ñaca cayúninu cosa dxabaʼ, ne Pablu bizeeteʼ cadi jneza guininu cani purtiʼ ca binni si ni runi ni na ique nga riníʼ cani (Gálatas 5:19-21). Nga cayabi laanu naquiiñeʼ gápanu laanu. Xi zazaaca ti xpinni Cristu pa nisi maʼ caníʼ diidxaʼ guidxa o cosa dxabaʼ ne nisi maʼ caníʼ de guendarapa  jnadxii ne qué guituí lú ora guiníʼ cani o iquiiñeʼ diidxaʼ ni zucaa binni guiníʼ ique sti cosa yaʼ. Primé la? zaniʼnécabe laabe chupa chonna biaje para guchaabe. Peru pa qué nabe guchaabe modo laabe ne qué gusaanaʼ de guiniʼbe ca cosa ca zabeecabe laabe de ndaaniʼ xquidxi Dios. *

11, 12. 1) Pora nga cadi jneza guininu binni. 2) Xiñee naquiiñeʼ gápanu laanu para cadi guininu xiixa ni cadi dxandíʼ de tuuxa.

11 Malu nga guininu xiixa ni guniná stobi o guininu xiixa ni cadi dxandíʼ de stobi. Cadi guiráʼ diʼ ora nga malu guininu de binni; casi pa caninu de ti binni ni guyuunisa o ni caquiiñeʼ chigánnanu para cuʼnu gana laa. Ca xpinni Cristu ni bibani lu primé siglu que guniʼcaʼ de ca bíʼchicaʼ ne ca bizáʼnacaʼ, peru qué ñúnicaʼ ni para ñuninacaʼ laacabe (Efesios 6:21, 22; Colosenses 4:8, 9). Yanna, pora nga malu guininu binni yaʼ. Ora guininu xiixa ni qué gánnanu pa dxandíʼ guca o guininu xiixa ni cadi naquiiñeʼ ganna sti binni. Pa maʼ biaʼnu gúninu zacá zucaa ni laanu gúninu sti cosa jma naxoo: guininu biʼniʼ tuuxa xiixa ni cadi jneza neca cadi dxandíʼ ni, o casi na ti diccionariu «guininu biʼniʼ tuuxa xiixa ni cadi jneza neca cadi dxandíʼ ne gúninu ni para si guninanu o gusaananu laa mal» (Diccionario del español usual en México). Nápanu ti ejemplu de modo bisiguii ca fariseu que para cadi guni cré ca binni que guiráʼ cani biʼniʼ Jesús. Laacaʼ guniʼcaʼ ni cadi dxandíʼ de laabe (Mateo 9:32-34; 12:22-24). Ni nánnanu nga ora guininu ti cosa ni cadi dxandíʼ de sti binni riuu stale guendanagana (Proverbios 26:20).

12 Ximodo ruuyaʼ Jiobá ca binni ni rizá riníʼ cosa ni  cadi dxandíʼ de stobi o nisi maʼ cutinde si binni yaʼ. Qué riuuláʼdxibe ni rúnicaʼ. Ne nanaláʼdxibe guiráʼ cani maʼ cuyubi si gutinde ca biʼchiʼ ne ca bizaʼnaʼ (Proverbios 6:16-19). Bietenalaʼdxiʼ, diidxaʼ di·á·bo·los ni zeeda lu diidxaʼ griegu riníʼ ni «tuuxa ni riníʼ xiixa ni cadi dxandíʼ de stobi», ne laaca diidxaʼ ca nga riquiiñeʼ para guzeetecabe de Binidxabaʼ, purtiʼ laa riníʼ cosa ni cadi dxandíʼ de Dios (Apocalipsis 12:9, 10). Nin tobi de laanu qué racaláʼdxinu gácanu casi Binidxabaʼ (o ti binni ni riníʼ cosa ni cadi dxandíʼ de stobi). Ndaaniʼ ca neza binni ridagulisaa ca qué zanda diʼ chuʼ ti binni runi zacá o guni ni na ique, casi gutinde o guyubi modo para cadi chuʼ ca biʼchiʼ ne ca bizaʼnaʼ tobi si (Gálatas 5:19-21). Nga runi, ante guininu xiixa de ti xpinni Cristu naquiiñeʼ guinabadiidxanu laca laanu: «Ñee dxandíʼ ni chiguiniéʼ ca la? Ñee zusihuinneʼ nadxieeʼ laabe pa guiniéʼ ni la? Ñee caquiiñeʼ ganna xcaadxi binni ni la?» (biindaʼ 1 Tesalonicenses 4:11).

13, 14. 1) Xiñee cadi jneza iquiiñenu diidxaʼ guidxa ora maʼ caninu diidxaʼ. 2) Xi zazaaca binni ni qué náʼ guchaa modo laa.

13 Cadi guniná stiidxanu binni. Casi maʼ bidúʼyanu ca, zanda guniná stiidxanu binni. Ne cumu binni ruchee laanu la? nuu tiru rininu xiixa ne despué riuubaʼ ladxidoʼno xiñee guninu ni. Biblia cayabi laanu nuu diidxaʼ ni cadi naquiiñeʼ guiníʼ ca xpinni Cristu ra ridagulisaacaʼ ne ndaaniʼ lídxicaʼ. Pablu gudixhená ca xpinni Cristu: «Lausaana de aca nanalaʼdxi tu binni, ne de idxiichi né tu laacaʼ, ne de chuʼ tu xiana, ne de guni char tu tuuxa o cuʼ dí tu laa» (Efesios 4:31). Xcaadxi Biblia rutiixhi diidxaʼ «cuʼ dí» ca casi «guniná» ne «diidxaʼ naná». Ora tuuxa guiníʼ o guzeeteʼ xiixa diidxaʼ para guniná stobi, o nisi maʼ caníʼ mal de binni rindétebe binni ca ne rúnibe menu laa. Ne ora tuuxa gabi ca diidxaʼ riʼ ti baʼduhuiiniʼ jma racanacaʼ purtiʼ jma nadacaʼ (Colosenses 3:21).

14 Biblia na cadi jneza diʼ iquiiñeʼ binni diidxaʼ guidxa ora  guiníʼ, ne cuzeeteʼ ni zándaca chuʼ ca binni ni riníʼ zacá ra naxoo. Xi zazaaca ca binni ni maʼ biaa guiníʼ diidxaʼ guidxa, diidxaʼ naná o iquiiñeʼ diidxaʼ para guni menu stobi yaʼ. Primé la? zuyúbicabe modo gacanécabe laa. Peru pa qué náʼ guchaa modo laa zabeecabe laa de ndaaniʼ xquidxi Dios. Ne dede zándaca maʼ cadi guicaa guendanabani ni qué zaluxe ora guni mandar Reinu stiʼ Dios (1 Corintios 5:11-13; 6:9, 10). Nga rusihuinni pa qué racaláʼdxinu guixélenu de Dios ni nadxii laanu la? cadi jneza guininu diidxaʼ guidxa, gusiguiinu, cúʼdinu o guininu intiica cosa ni guniná sti binni.

DIIDXAʼ NI GACANÉ BINNI

15. Xi diidxaʼ zanda guininu para gacanenu sti binni.

15 Ximodo racalaʼdxiʼ Jiobá iquiiñenu ruaanu. Biblia na galán iquiiñenu diidxaʼ ni «acané stobi» (Efesios 4:29). Nabé riuulaʼdxiʼ Jiobá guʼyaʼ cayúninu stipa pur guininu diidxaʼ ni gacané binni. Peru lu Stiidxabe cadi zeeda diʼ ti lista ra cá xi diidxaʼ zanda guininu (Tito 2:8). Para gánnanu pa zacané ca diidxaʼ stinu binni la? naquiiñeʼ gaca cani jneza, dxandíʼ ne diidxaʼ naxhi. Guietenaláʼdxinu guionnaʼ cosa riʼ laga guidúʼyanu caadxi ejemplu (biiyaʼ cuadru ra ná: « Ñee racané ca diidxaʼ ni riniéʼ la?»).

16, 17. 1) Xiñee caquiiñeʼ gábinu tuuxa jneza ni cayuni. 2) Ximodo zanda gusihuínninu nuunu nayecheʼ né cani ridagulisaanenu ne binnilídxinu.

16 Gábinu tuuxa jneza ni cayuni. Jiobá ne Jesús nánnacaʼ caquiiñeʼ guiechenenu binni pur ni rúnicaʼ (Mateo 3:17; 25:19-23; Juan 1:47). Guiráʼ ca xpinni Cristu naquiiñeʼ gúninu zacá, purtiʼ ra gábinu binni xiixa orapeʼ caquiiñeʼ ni la? zaguu ni gana laa (Proverbios 15:23). Ora de guidubi ladxidóʼ binni guiechené laanu nabé riguu gana laanu. Ne runi sentirnu zacá purtiʼ cadúʼyanu cazaalaʼdxiʼ binni ca laanu ne ni cayúninu. Ora guiechené tuuxa laanu pur ni cayúninu racanebe laanu para cadi gusaana de gúninu dxiiñaʼ  stinu ne stale gana. Yanna, cumu guiranu riuuláʼdxinu guiechenécabe laanu la? laacaʼ naquiiñeʼ gúninu zacaca (biindaʼ Mateo 7:12).

17 Pa guidúʼyanu cosa galán ni runi xcaadxi binni, zadxélanu xiixa ni zucaa laanu cadi gusaana de guiechenenu laacabe. Casi xi zanda guidúʼyanu ndaaniʼ neza binni ridagulisaa stinu yaʼ. Zanda guiechenenu tuuxa ni bitiidiʼ ti libana sicarú, ti hombrehuiiniʼ o ti dxaapahuiiniʼ ni cayuni stipa pur ugaanda xiixa dxiiñaʼ ndaaniʼ xquidxi Dios o ti bíchinu o bizánanu ni qué riaadxaʼ nin ti guendaridagulisaa neca maʼ nagola. Zanda gábinu laacaʼ xiixa diidxaʼ ni cuʼ gana ne gusiecheʼ ladxidoʼcaʼ. Ximodo zanda gusihuínninu riechenenu cani nuu ndaaniʼ lídxinu yaʼ. Cani maʼ bichaganáʼ ca naquiiñeʼ guiniʼcaʼ diidxaʼ ni gacané laacaʼ ne guiniʼcaʼ diidxaʼ ni gusihuinni nuucaʼ nayecheʼ (Proverbios 31:10, 28). Ca baʼduhuiiniʼ ca naquiiñeʼ gannaxhii bixhózecaʼ laacaʼ ne gusihuinni bixhózecaʼ caquiiñeʼ laacaʼ. Cásica riquiiñeʼ ca yagahuiiniʼ ca nisa ne biaaniʼ zacaca caquiiñeʼ ca baʼduhuiiniʼ ca gabi bixhózecaʼ laacaʼ cayúnicaʼ ni jneza. Ca binni napa xiiñiʼ naquiiñeʼ guiechenecaʼ xiiñicaʼ pur modo laacaʼ ne ora gúnicaʼ xiixa jneza. Pa gúnicabe zacá la? qué ziuu xiiñicabe triste ne zacanécabe laacaʼ gúnicaʼ stipa pur gúnicaʼ ca cosa ca jneza.

18, 19. Xiñee naquiiñeʼ gúninu stipa pur quixhedxinu ladxidóʼ ca xpinni Cristu ne uguʼnu gana laacaʼ, ne ximodo zanda gúninu ni.

18 Quixhedxinu ladxidóʼ binni ne uguʼnu gana laacaʼ. Nabé rizaalaʼdxiʼ Jiobá ca binni ni qué rudxiibaʼ laca laa ne cani nuu triste ladxidóʼ (Isaías 57:15). Biblia cayabi laanu ca diidxaʼ riʼ: «Lausieche saa» laatu ne lagacané cani naná nuu ladxidóʼ (1 Tesalonicenses 5:11, 14). Nánnanu riechené Jiobá laanu pur stipa ni cayúninu para quixhedxinu ladxidóʼ binni ne uguʼnu gana laacaʼ.

Guizáʼ riecheʼ Jiobá ora guininu xiixa para uguu gana binni

19 Xi zanda gúninu pa guidúʼyanu nuu ti xpinni Cristu triste yaʼ. Primé la? galán guininu xiixa ni uguu gana laabe.  Zándaca ca diidxaʼ ni guininu ca qué zacané ni binni ca guiree ca guendanagana stiʼ, peru cadi chuʼnu xizaa. Ni jma risaca nga gusihuínninu rizaaláʼdxinu ne nuunu para gacanenu laabe. Laaca zanda guni orarnenu binni ca para guinábanu Jiobá gacané laabe ti gudiibe cuenta nadxiinu ne nadxii Jiobá laabe (Santiago 5:14, 15). Galán gánnabe caquiiñeʼ ne nadxii guiráʼ cani ridagulisaanenu laabe (1 Corintios 12:12-26). Sti cosa ni zanda gúninu nga guidúʼndanu ti textu ni gacané laabe ti gánnabe rizaalaʼdxiʼ Jiobá laabe (Salmo 34:18; Mateo 10:29-31). Pa cueenu tiempu para gábinu laabe xiixa diidxaʼ ni uguu gana laabe ne guiree ni de ndaaniʼ ladxidoʼno, zudiibe cuenta nadxiinu laabe ne rusisácanu laabe. Biblia na: «Ora nabé riuu ti hombre xizaa riuu triste, peru diidxaʼ ni riguu gana rusiecheʼ ni laa» (Proverbios 12:25).

20, 21. Xi chonna cosa naquiiñeʼ gúninu ora chigudiʼnu ti conseju.

20 Conseju ni gacané. Cumu guiranu nácanu binni ruchee la? nuu tiru caquiiñeʼ uguu jnézacabe laanu. Nga runi Biblia cayabi laanu: «Bicaadiaga conseju ne bidii lugar uguu jnézacabe lii, para gácaluʼ binni nuu xpiaaniʼ despué» (Proverbios 19:20). Ndaaniʼ ca neza binni ridagulisaa ca ricaanu stale conseju stiʼ ca binnigola ca. Peru cadi laasicabe nga zanda gudiicabe conseju. Cani napa xiiñiʼ laacaʼ zanda gulídxicaʼ xiiñicaʼ (Efesios 6:4). Ca gunaa Testigu  ni maʼ huaniisi ne ni jma riene zanda uguu jnézacaʼ ca gunaa jma nahuiiniʼ (Tito 2:3-5). Pa nadxiinu sti binni zuyúbinu modo para cadi guniná cani guininu laacaʼ. Guidúʼyanu chonna cosa ni zacané laanu para gudiʼnu ti conseju ni gacané binni: gánnanu xiñee racaláʼdxinu gudiʼnu ni, gánnacabe guiráʼ ni caninu zeeda cani de Stiidxaʼ Dios ne gudiʼnu ni jneza.

21 Primé cosa ni zacané laanu gudiʼnu ti conseju ni gacané stobi nga gánnanu xiñee racaláʼdxinu gudiʼnu ni. Qué raca nagana para laanu guicaanu ti conseju ora gusihuinni binni ca rizaalaʼdxiʼ laanu ne cadi cayúnibe ni purtiʼ nanaláʼdxibe laanu o qué riábanu laabe. Nga runi, xiñee qué gúninu zacaca ora gudiʼnu xiixa conseju tuuxa yaʼ. Sti cosa nga iquiiñenu Biblia para gudiʼnu conseju (2 Timoteo 3:16). Guiráʼ ni guininu naquiiñeʼ guiree ni de lu Biblia, cásica pa guidúʼndanu ti textu o guzéʼtesinu de laani. Ca binnigola riuucaʼ cuidadu para cadi gudiicaʼ xiixa conseju ni zeeda de ndaaniʼ íquecaʼ. Ne qué ruyúbicabe modo iquiiñecabe xiixa textu para guluíʼ jneza ni caníʼcabe, neca qué gápacabe razón. Ne guionna cosa ni zacané laanu para gudiʼnu ti conseju nga gudiʼnu ni jneza. Pa gudiʼnu ti conseju ne respetu ne diidxaʼ nadóʼ la? qué zaca nagana para binni ca guicaa conseju ni cudiʼnu laa (Colosenses 4:6).

22. Ximodo racaláʼdxinu iquiiñenu ni bisigaʼdeʼ Dios laanu.

22 Nabé nayecheʼ nga nuunu purtiʼ bisigaʼdeʼ Dios laanu ti cosa nabé sicarú, ne laani nga ruaanu ni riquiiñenu para guininu. Ne cumu nadxiinu Bixhózenu la? racaláʼdxinu iquiiñenu ni jneza. Galán guietenaláʼdxinu cani guininu zanda uguu cani gana binni o guniná cani laacaʼ. Nga runi, iquiiñenu ni modo racalaʼdxiʼ Jiobá: para uguʼnu gana sti binni. Pa gúninu zacá la? zacanenu guiráʼ ca binni nuu gaxha de laanu ne qué zaxélenu de Dios ni nadxii laanu.

^ párrafo 7 Diidxaʼ griegu ni riquiiñeʼ lu textu riʼ casi «cadi dxandí» laaca zanda guiníʼcabe ni «pur gana si» (1 Corintios 15:17).

^ párrafo 10 Biblia riquiiñeʼ diidxaʼ «nadxabaʼ» para guzeeteʼ de gadxé gadxé tipu pecadu. Ndaaniʼ xquidxi Dios cadi guiráʼ diʼ pecadu rinabaʼ gaca juzgar ti binni, peru tu guni ti cosa jma nadxabaʼ ne qué gaca arrepentir la? zabeecabe laa de ndaaniʼ xquidxi Dios (2 Corintios 12:21; Efesios 4:19; biiyaʼ «Ni rinabadiidxaʼ cani ruundaʼ» stiʼ revista Torre stiʼ ni rapa 15 stiʼ Julio 2006; ni biree diidxastiá).