Biiyaʼ guiraʼ ni nuu lu sitiu riʼ

guyé lu índice

 LECCIÓN 51

Jefe stiʼ ti ejércitu ne ti dxaapahuiiniʼ

Jefe stiʼ ti ejércitu ne ti dxaapahuiiniʼ

Ndaaniʼ guidxi Siria guyuu ti dxaapahuiiniʼ israelita ni guleza zitu de ra lidxi ne de familia stiʼ. Ca soldadu de Asiria nga yenecaʼ laabe, ne yanna rúnibe dxiiñaʼ ra lidxi Naamán jefe stiʼ ti ejércitu de Asiria. Dxaapahuiiniʼ riʼ biʼniʼ adorar Jiobá neca ca binni ra gulézabe qué ñúnicaʼ ni.

Gupa Naamán ti guendahuará feu ladi, ne nabé bininá ni laabe. Racalaʼdxiʼ dxaapahuiiniʼ que gacané laabe, ngue runi gúdxibe xheelaʼ Naamán: «Runebiaʼyaʼ tuuxa ni zanda gacané xheelaluʼ. Ndaaniʼ guidxi Israel nuu ti profeta stiʼ Jiobá ni láʼ Eliseo. Laabe zanda gusiándabe xheelaluʼ».

Gudxi gunaa riʼ Naamán guiráʼ ni gudxi dxaapahuiiniʼ que laa. Racalaʼdxiʼ Naamán guni intiica cosa para guianda, ngue runi guyebe guidxi Israel ne yeyúbibe Eliseo. Guníʼ ique Naamán zadxaagalú Eliseo laa casi rúnicabe ti binni risaca. Peru lugar de niree Eliseo ne  nidxaagalú laabe la? laga biseendaʼ ti binni ni racané laa guidxaagalú Naamán ne gabi laabe ca diidxaʼ riʼ: «Guyé ne guyuu gadxe biaje ndaaniʼ guiiguʼ Jordán, pa gúniluʼ ni la? ziándaluʼ».

Qué ñuulaʼdxiʼ Naamán ndiʼ ngue runi guníʼ: «Naa rabeʼ niree profeta riʼ, nindisanáʼ, niniʼné Dios stiʼ ne nusianda naa. Peru lugar de nga gúdxibe naa chaaʼ ra guiiguʼ stiʼ Israel, ¿Cadi xa jma galán ca guiiguʼ nuu Siria, ñee qué ñanda ñaaʼ raqué la?». Guizáʼ bidxiichi Naamán, ngue runi bireebe de ra lidxi Eliseo ne zebe.

Gucané ca hombre ni runi xhiiñaʼ Naamán laa guiníʼ ique chaahuiʼ xi chiguni. Gúdxicaʼ laabe: «¿Cadi dxandíʼ ñúniluʼ intiica cosa para ñándaluʼ la? Cadi nagana nga ni canabaʼ profeta riʼ lii. ¿Xiñee qué guʼnuʼ ni yaʼ?». Bicaadiaga Naamán ni gúdxicabe laa, ngue runi guyebe ra guiiguʼ Jordán ne guyuube ndaaniʼ ni gadxe biaje. Ra bizaa gadxe biaje que, ora biree Naamán maʼ bianda. Guizáʼ biéchebe ngue runi biguétabe zigudiibe xquixe Eliseo. Gúdxibe Eliseo: «Yanna huaxa maʼ nannaʼ Jiobá nga Dios ni dxandíʼ». Maʼ bianda Naamán ora biguetaʼ ra lidxi. ¿Ximodo raʼbuʼ biʼniʼ sentir dxaapahuiiniʼ israelita que ora biʼyaʼ laabe yaʼ?

«Gudixhe lu usihuinni ca xcuidi huiini ne ca badu huiini enda nandxóʼ stiuʼ» (Mateo 21:16).