Biiyaʼ guiraʼ ni nuu lu sitiu riʼ

guyé lu índice

 LECCIÓN 53

Guca Jehoiadá nadxibalú

Guca Jehoiadá nadxibalú

Gupa Jezabel ti xiiñiʼ ni biree lá Atalía ne laaca guizáʼ qué iquiiñeʼ cásica laabe. Bichaganáʼ Atalía rey de Judá. Dxi gutiʼ rey riʼ, maʼ xiiñibe biʼniʼ mandar. Ne dxi gutiʼ xiiñibe, maʼ Atalía biʼniʼ mandar guidxi Judá. Para cadi gáxhacabe laabe reinu que la? gucaláʼdxibe ñuutibe guiráʼ ca xiiñiʼ rey que ne tutiica binni ni zanda guni mandar lugar stibe. ¡Dede né ca xhiágabe biitibe! Ngue runi, guiráʼ tu bidxibi laabe.

Sumo sacerdote Jehoiadá ne xheelabe Jehoseba, gúnnacabe nabé malu ngue ni cayuni Atalía. Ngue runi guluucabe xquendanabánicabe ra naxoo para bicaachicabe tobi de ca xhiaga Atalía, ti baʼduhuiiniʼ láʼ Jehoás. Bisiniisicabe laa ndaaniʼ templu que.

Dxi napa Jehoás gadxe iza, biʼniʼ reunir Jehoiadá guiráʼ jefe stiʼ ca guardia ne ca levita que. Ne gúdxibe laacaʼ: «Lagapa ra puertaʼ stiʼ templu riʼ. Cadi gudiitu lugar chuʼ guirutiʼ». De raqué, guluu Jehoiadá corona que ique Jehoás para gaca rey stiʼ Judá. Óraque guiráʼ ca binni que bicaacaʼ ti ridxi ne nacaʼ: «¡Viva rey stinu!».

Ora binadiaga Atalía ridxi stiʼ ca binni que ziguxooñeʼ zeʼ ra templu. Ora yendabe ne bíʼyabe rey cubi que, bicaabe ti ridxi: «¡Ndiʼ la? ti traición ndiʼ! ¡Ti traición!». Óraque, gunaazeʼ ca jefe stiʼ cani cayapa ra templu que reina qué iquiiñe riʼ, guleecaʼ laabe de raqué ne biiticaʼ laabe. Qué ñaca Atalía ti ejemplu galán para guidxi que. ¿Xi guizaaca yanna yaʼ?

Gucané Jehoiadá guidxi que para gúnicaʼ ti pactu né Jiobá. Lu pactu riʼ, biʼniʼ prometércabe Jiobá zuni adorárcabe laasi. Biʼniʼ mandar Jehoiadá guxiácabe templu stiʼ Baal ne gunitilúcabe guiráʼ bidóʼ que.  Guluube sacerdote ne levita para guni dxiiñaʼ ndaaniʼ templu stiʼ Jiobá, ti guni adorar binni Jiobá sti biaje raqué. Laaca guluube tu gapa ra templu que, ti cadi chuʼ nin ti israelita ni cadi nayá. Óraque, Jehoiadá ne ca jefe stiʼ cani rapa yenecaʼ Jehoás ra palaciu que ne bicuicaʼ laabe lu trono. Guizáʼ biecheʼ ca binni de Judá. Yanna huaxa maʼ zanda gúnicabe ni ná Jiobá, purtiʼ maʼ qué guinni Atalía nin cani runi adorar Baal. ¿Cadi dxandíʼ guca Jehoiadá nadxibalú la? ¿Maʼ biiyuʼ pur gúcabe nadxibalú gunda gucanebe stale binni la?

«Ne cadi idxibi tu cani ruuti cuerpu si, purti qué zanda guuti cabe alma, sínuque laidxibi ni zanda unitilú alma ne cuerpu ndaani [Gehena]» (Mateo 10:28).