Biiyaʼ guiraʼ ni nuu lu sitiu riʼ

guyé lu índice

 LECCIÓN 49

Guca castigar ti reina guizáʼ mala

Guca castigar ti reina guizáʼ mala

De ra ventana stiʼ palaciu ni nuu guidxi Jezreel, randa ruuyaʼ rey Acab ti layú uva stiʼ ti hombre láʼ Nabot. Gucalaʼdxiʼ Acab ñaca stiʼ layú que ne guyuu nizíʼ ni. Peru qué niná Nabot nutoo ni lube purtiʼ Ley stiʼ Jiobá que ná, qué zanda gutoo ca israelita ca layú ni gucuaacaʼ de herencia. Jneza ngue ni biʼniʼ Nabot. ¿Ñee rábiluʼ biʼniʼ respetar Acab decisión stiʼ Nabot la? Coʼ. Guizáʼ bidxiichi Acab. De tantu bidxiichibe bideguyoobe ndaaniʼ cuartu stibe ne qué ninabe ñobe.

Xheelaʼ Acab nga ti reina guizáʼ mala ni biree lá Jezabel. Gudxi gunaa riʼ Acab: «Lii nga rey stiʼ Israel, zanda gápaluʼ intiica ni gacaláʼdxiluʼ. Naa gudieeʼ lii layú ca». Ngue runi bicaa Jezabel caadxi carta ne biseendaʼ ni ra nuu ca binnigola de guidxi que. Lu ca carta que biʼniʼ mandarbe laacaʼ guiniʼcaʼ guníʼ Nabot mal de Dios ne guchácabe guié laabe dede ra gátibe. Biʼniʼ ca binnigola que ni biʼniʼ mandar Jezabel laacaʼ. Despué, gudxi gunaa riʼ rey Acab: «Maʼ guti Nabot, yanna maʼ zanda guicaaluʼ layú uva stibe».

Cadi Nabot si nga binni nachaʼhuiʼ ni biiti Jezabel. Laaca biitibe stale binni ni bizuubaʼ stiidxaʼ Jiobá. Laaca biʼniʼ adorarbe stale bidóʼ ne bíʼnibe stale cosa malu. Peru biiyaʼ Jiobá guiráʼ ca cosa malu bíʼnibe. ¿Ñee rábiluʼ zuni Jiobá xiixa la?

Gudiʼdiʼ ti tiempu despué de guti Acab, bizulú biʼniʼ mandar xiiñibe Jehoram. Óraque biseendaʼ Jiobá ti hombre láʼ Jehú para guni castigar Jezabel né familia stiʼ.

Gudxiʼbaʼ Jehú lu carru stiʼ ne zeʼ Jezreel ra nabeza Jezabel. Laaca gudxiʼbaʼ Jehoram lu carru stiʼ ne yechagalú laabe. Ora biʼyaʼ Jehoram Jehú, gunabadiidxaʼ laabe: ¿Ñee nuu guendariuudxi la? Para bicabi Jehú laabe: «Ximodo chuʼ guendariuudxi pa  cayuni Jezabel, jñaaluʼ stale cosa malu». Óraque gucalaʼdxiʼ Jehoram nuxooñeʼ, ora bidiibe buelta né carru stibe bicuí Jehú ti flecha laabe ne biiti laabe.

De raqué, guyé Jehú ra palaciu stiʼ Jezabel. Gunna Jezabel zeeda Jehú, ngue runi bitiee lú, biguudaʼ guicha ique ne gulézabe Jehú ra ventana stiʼ guiropa pisu stiʼ palaciu que. Yendá si Jehú ra nuube, nabé feu modo bigapadiuxi Jezabel laabe, óraque bicaa Jehú ti ridxi rabi cani runi xhiiñaʼ Jezabel: «Laguzaba laabe». Óraque bilaanácabe laabe de ra ventana que, biábabe ne gútibe.

Despué de ngue, biiti Jehú ca 70 xiiñiʼ Acab ne guleebe guiráʼ cani runi adorar Baal. ¿Maʼ bidiiluʼ cuenta, ruuyaʼ Jiobá guiráʼ ni runi binni ne runi castigarbe cani runi cosa malu ora caquiiñeʼ gaca ni la?

«Ti binni gachelú ti herencia ne guicaa ni nagueenda la? qué zabeendú gastiʼ né laani» (Proverbios 20:21).