Biiyaʼ guiraʼ ni nuu lu sitiu riʼ

guyé lu índice

 LECCIÓN 38

Bidii Jiobá stipa Sansón

Bidii Jiobá stipa Sansón

Biguetaʼ biʼniʼ adorar stale israelita dios falsu. Ngue runi bidii Jiobá lugar guni mandar ca filisteu guidxi Israel. Peru guyuu israelita ni gunnaxhii Jiobá, casi Manóah. Laabe ne xheelabe qué gápacabe xiiñicabe. Ti dxi, biseendaʼ Jiobá ti ángel gabi xheelaʼ Manóah: «Zápaluʼ ti xiiñiluʼ ni zulá ca israelita de lu náʼ ca filisteu. Zácabe ti nazareu». ¿Nannuʼ tuu nga ti nazareu la? Laacabe nga xpinni Dios ni gupa ti privilegiu especial ne qué zanda ugácabe guicha íquecabe.

Qué nindaa, gule xiiñiʼ Manóah, ne gulee lácabe laa Sansón. Ora biniisibe, bidii Jiobá laabe stale stipa. ¡Dede biitibe ti lión ne násibe! Ne ti dxi, biitibe 30 filisteu stúbisibe. Ngue runi, gucananalaʼdxiʼ ca filisteu laabe ne biyúbicaʼ modo guuticaʼ laabe. Ti gueelaʼ, nisiaasiʼ Sansón ndaaniʼ guidxi Gaza. Guyé ca enemigu stibe ra puertaʼ guidxi que ne gulézacaʼ laabe raqué para guuticaʼ laabe sti dxi que. Peru, biaʼ galaa gueelaʼ, biasa Sansón, guyebe entrada guidxi que ne gúxhabe ca puertaʼ stini. De raqué bidxiibabe cani xayánnibe ne yenebe cani dede ique ti dani gaxha de guidxi Hebrón.

Despué guyé ca filisteu que ra nuu Dalila, xnovia Sansón, ne gúdxicabe laa: «Zaguíxedu lii stale mil pieza de plata pa gacaneluʼ laadu gánnadu xiñee nadipaʼ Sansón. Racaláʼdxidu guináʼzedu laabe ne cuʼdu laabe ndaaniʼ cárcel». Racalaʼdxiʼ Dalila guicaa bueltu que, ngue runi guniʼbe zacanebe laacaʼ. Primé la? qué ninagá Sansón ñabi laabe xiñee nadipaʼ. Peru de tantu caziñe Dalila gúdxibe laa secretu stibe. Sansón guníʼ: «Qué huayuu dxi igá guicha iqueʼ purtiʼ nazareu naa. Pa ugácabe ni la? zuniteʼ guiráʼ stipa stinneʼ». Bichee Sansón ora gúdxibe Dalila secretu stibe, ¿cadi dxandíʼ la?

Óraque gudxi Dalila ca filisteu que: «¡Maʼ nannaʼ secretu stibe!». Ngue runi biyúbibe modo gasiʼ Sansón lu ñeebe ne bicaa rídxibe  tuuxa gueeda ne ugá guicha ique Sansón. De raqué bicaa Dalila ti ridxi: «¡Sansón, maʼ zeeda ca filisteu!». Ora bibánibe bidiibe cuenta maʼ birá stipa stibe. Gunaazeʼ ca filisteu que laabe, bisicheepacaʼ lube ne guluucaʼ laabe ndaaniʼ cárcel.

Ti dxi, bidxiña stale mil filisteu ra templu stiʼ dios sticaʼ ni láʼ Dagón. Ne bicaacaʼ ridxi: «Maʼ bidii dios stinu laanu Sansón. Lacuee laabe para guxídxinu ti ratu». Bizuhuaacabe Sansón cueʼ chupa columna ne biʼniʼ búrlacabe laa. Óraque guníʼ Sansón reciu: «Jiobá, canabaʼ lii gudiiluʼ stipa naa sti biaje». Maʼ bigaa guicha íquebe sti biaje, ngue runi bicaanabe guiropaʼ columna stiʼ templu que né guiráʼ stipa stibe. Bixiá templu que ne guti guiráʼ cani nuu raqué, dede ne Sansón.

«Napaʼ stipa para guneʼ intiica cosa purtiʼ rudii Dios poder naa» (Filipenses 4:13TNM).