Biiyaʼ guiraʼ ni nuu lu sitiu riʼ

guyé lu índice

 LECCIÓN 34

Biʼniʼ ganar Gedeón ca madianita

Biʼniʼ ganar Gedeón ca madianita

Gudiʼdiʼ si tiempu, bisaana de guni adorar ca israelita Jiobá ne bizulú biʼniʼ adorarcaʼ dios falsu sti biaje. Gadxe iza gulaʼnaʼ ca binni de Madián ca maniʼ stiʼ ca israelita ne binitilucaʼ ca cosecha stícabe. ¿Xi biʼniʼ ca israelita para cadi guninácabe laacaʼ yaʼ? Bicachilucaʼ ndaaniʼ cueva ne lu ca dani que. Últimu la? gunábacabe Jiobá gulá laacabe. Ngue runi biseendaʼ Jiobá ti ángel stiʼ para gabi ti joven láʼ Gedeón: «Maʼ gulí Jiobá lii para gácaluʼ ti hombre nadipaʼ ne ni nanna tinde lu guerra». Gedeón gunabadiidxaʼ: «¿Xiñee naapiaʼ nga gulaʼyaʼ guidxi Israel pa nacaʼ ti binni ni qué risaca yaʼ?».

Racalaʼdxiʼ Gedeón ganna pa dxandíʼ maʼ gulí Jiobá laa. ¿Xi bíʼnibe yaʼ? Gudíxhebe ti pedazu guicha ladi dendxuʼ (o lana) layú ne gúdxibe Jiobá: «Pa guixíʼ ora guirá gueelaʼ nadxéʼ ni ne nabidxi xhuxhu layú, óraque zannaʼ maʼ guliluʼ naa para gulaʼyaʼ Israel». Sti dxi que, biiyabe nadxéʼ daataʼ guicha ladi dendxuʼ que peru layú que nabidxi xhuxhu. Óraque, gunabaʼ Gedeón Jiobá, ora guirá gueelaʼ sti dxi cadi gadxe guicha ladi dendxuʼ que neca gadxe daataʼ layú que. Biʼniʼ Jiobá ni gunabaʼ Gedeón laa sti biaje. Yanna huaxa maʼ nuu Gedeón seguru maʼ gulí Jiobá laa. Ngue runi bichíñabe guiráʼ soldadu stibe para tindenécabe ca madianita.

Gudxi Jiobá Gedeón: «Chigacaniáʼ ca israelita para guni ganarcaʼ. Peru cumu nápacabe stale  soldadu la? zándaca gueeda guiníʼ íquecabe stubisícabe biʼniʼ ganárcabe. Gudxi cani cadxibi guibiguétacaʼ ra lídxicaʼ». Ngue runi bibiguetaʼ 22 mil hombre ne biaana chii mil si. Óraque ná Jiobá rabi laabe: «Stalerúcabe. Yené laacabe ruaa ti arroyo ne gudxi laacabe guécabe nisa. Ca hombre ni gúʼyaluʼ gueʼ nisa, peru guuyadxicaʼ pa cadi zeeda enemigu la? laacaʼ nga cani guiaananeluʼ». Chonna gayuaa si hombre bisihuinni nuu listu ora cayéʼ nisa. Biʼniʼ prometer Jiobá zacané grupuhuiiniʼ riʼ para guni ganarcaʼ 135 mil soldadu de Madián.

Gueelaʼ que gudxi Jiobá Gedeón: «Maʼ zanda tindenetu ca madianita». Bidii Gedeón cachu ne ti antorcha ni nuu ndaaniʼ ti jarru ca soldadu stiʼ ne rábibe laacaʼ: «Ni gúʼyatu guneʼ ngaca laguni». Bixhidxi Gedeón cachu stiʼ, gundaabe jarru naazebe que, gundisanabe luguiáʼ ne biniibibe antorcha naazebe que cheríʼ chericaʼ ne bicaabe ti ridxi: «¡Espada stiʼ Jiobá ne stiʼ Gedeón!». Óraque chonna gayuaa hombre que bíʼnicaʼ zaqueca. Guizáʼ bidxibi ca madianita, dede zeʼ xpiaanicaʼ ne maʼ qué nidxélacaʼ pa ladu ñecaʼ. Cumu qué nidxélacaʼ xi ñúnicaʼ, biitisaacaʼ laca laacaʼ. Sti biaje ca gucané Jiobá ca israelita para guni ganarcaʼ ca enemigu sticaʼ.

«Ti guihuinni jma nadipaʼ poder ni cudii Dios laadu que poder stidu» (2 Corintios 4:7TNM).