Biiyaʼ guiraʼ ni nuu lu sitiu riʼ

guyé lu índice

 LECCIÓN 19

Ca primé chonna plaga

Ca primé chonna plaga

Guca ca israelita esclavu, ne ca egipciu que rucaacaʼ laacabe gúnicabe dxiiñaʼ nadipaʼ. Biseendaʼ Jiobá Moisés ne Aarón chitidxi Faraón ca diidxaʼ riʼ: «Bidii lugar cheʼ xquidxeʼ chiguni adorar naa lu desiertu». Cumu guizáʼ orgulloso Faraón la? sicaríʼ bicabi: «Que runi importar diʼ naa ni guiníʼ Jiobá. Qué zudieeʼ lugar cheʼ ca israelita». Guca si ndiʼ, bicaa Faraón ca israelita gúnicaʼ dxiiñaʼ jma nadipaʼ. ¿Xi biʼniʼ Jiobá yaʼ? Biʼniʼ castigarbe Faraón ra biseendabe chii plaga Egipto. Gudxi Jiobá Moisés: «Cadi culabi Faraón naa. Guixi siadóʼ ziebe ra guiiguʼ Nilo. Guyé ne gudxi laabe zaca nisa ca rini purtiʼ cadi cudiibe lugar guiree xquidxeʼ». Biiyaʼ Faraón ora gudxibi Aarón bastón stiʼ lu guiiguʼ Nilo, ne nisa que guca ni rini. Bizulú bindáʼ yuudxuʼ ni, maʼ qué ñanda ñéʼcabe nisa que ne guti guiráʼ benda nuu ndaaniʼ ni. Neca zaqué qué nudii Faraón lugar ñé xquidxi Dios lu desiertu.

 Gadxe gubidxa despué, biʼniʼ mandar Jiobá Moisés cheʼ ra nuu Faraón ne gabi laabe: «Pa qué gudiiluʼ lugar guiree xquidxeʼ, zadxá Egipto de bidxiʼ ». Cumu qué nuzuubaʼ Faraón diidxaʼ la? gundisaʼ Aarón bastón stiʼ ne guidubi guidxi que bidxá de bidxiʼ. Guyuu ca bidxiʼ que ndaaniʼ lidxi ca binni que, lu cama sticaʼ, ndaaniʼ bladuʼ guendaró... ¡Guiráʼ ladu! Gudxi Faraón Moisés: «Gunabaʼ Jiobá gucueezadxí plaga riʼ. Ti gudieeʼ lugar cheʼ ca israelita». Ngue runi bicueezadxí Jiobá plaga que, ne ca egipciu que bitópacaʼ ca bidxiʼ ni maʼ gutiʼ que ne bicuicaʼ stale montón de laacame. Bizulú bindáʼ yuudxuʼ guidxi que, peru sti biaje ca, qué nudii Faraón lugar ñé guidxi que lu desiertu.

Despué, gudxi Jiobá Moisés: «Gudxi Aarón guchenda bastón stiʼ layú. Ora gúnibe ni zaca yú ca biuxíhuiiniʼ». Ne zaqué guca ni, guiráʼ laadu biree jma biuxíhuiiniʼ ne gudxírucame binni. Ca egipciu que gúdxicaʼ Faraón: «¡Zeeda plaga riʼ de Dios!». Neca zaqué qué nudii Faraón lugar ñé ca israelita.

«Chigudieeʼ lugar gánnatu xiixa tobi si tiru: zunibiaʼtu poder ne stipa stinneʼ, ne napa xidé gánnatu Jiobá nga laʼyaʼ» (Jeremías 16:21).