Biiyaʼ guiraʼ ni nuu lu sitiu riʼ

guyé lu índice

 LECCIÓN 8

Bizuubaʼ Abrahán ne Sara stiidxaʼ Dios

Bizuubaʼ Abrahán ne Sara stiidxaʼ Dios

Gaxha de Babel guyuu sti guidxi ni biree lá Ur. Ca binni de raqué qué runi adorarcaʼ Jiobá, sínuque xcaadxi dios. Peru guyuu ti hombre ndaaniʼ guidxi que ni biʼniʼ adorar Jiobá, biree labe Abrahán.

Sicaríʼ gudxi Jiobá Abrahán: «Bisaana lídxiluʼ ne ca familia stiluʼ ne guyé guidxi ni chiguluéʼ lii». Despué biʼniʼ prometer Dios laabe: «Zácaluʼ ti guidxi naroʼbaʼ. Ne pur lii zudieeʼ cosa galán guiráʼ xixé binni guidxilayú».

Qué ganna Abrahán paraa chiguseendaʼ Jiobá laa, peru nápabe confianza Jiobá. Bizuubaʼ Abrahán stiidxaʼ Dios, ngueca biʼniʼ xheelabe, Sara; bixhózebe, Taré, ne Lot, sobrínube. Guluucabe listu guiráʼ cosa stícabe ne bireecabe zécabe.

 Napa Abrahán 75 iza dxi yendá né familia stiʼ lu ca layú ni racalaʼdxiʼ Jiobá gúʼyacabe. Guidxi que láʼ Canaán. Raqué biʼniʼ Jiobá laabe promesa riʼ: «Guidubi layú cayuuyaluʼ riʼ nga ni chigudieeʼ ca xiiñiluʼ». Peru maʼ huaniisi Abrahán ne Sara ne qué gápacaʼ xiiñicaʼ. Yanna, ¿ximodo guni cumplir Jiobá promesa stiʼ yaʼ?

«Bini cre [Abrahán], nga runi bizuuba stiidxaʼ [Dios]. Biree de xquidxi sin ganna paraa cheʼ, ucuaa neza, uyé guidxi ni gudxi Dios laa zudii laa ne ca xiiñiʼ» (Hebreos 11:8).