Biiyaʼ guiraʼ ni nuu lu sitiu riʼ

guyé lu índice

 LECCIÓN 81

Discursu ni bidii Jesús lu dani

Discursu ni bidii Jesús lu dani

Despué de gulí Jesús 12 apóstol stiʼ, biete de lu ti dani ne guyé ra nuu stale binni ni cabeza gucaadiaga laa. Ca binni que zeedacaʼ de Galilea, Judea, Tiro, Sidón, Siria ne de sti ladu guiiguʼ Jordán. Yenécabe binni huará o cani riguite demonio íquecaʼ, ne bisianda Jesús de guirácabe. Guribe cueʼ dani que ne guníʼnebe laacaʼ. Bisiénebe laacaʼ xi caquiiñeʼ gúninu pa racaláʼdxinu gaca xhamígunu Dios. Caquiiñeʼ gudiʼnu cuenta caquiiñeʼ gacané Jiobá laanu ne naquiiñeʼ guizíʼdinu gannaxhiinu laabe. Peru qué zanda diʼ gannaxhiinu Dios pa cadi nadxiinu binni. Naquiiñeʼ gácanu nachaʼhui né guiráʼ binni, dede né ca enemigu stinu.

Jesús guníʼ: «Cadi ca amigu si stiluʼ naquiiñeʼ gannaxhiiluʼ, laaca naquiiñeʼ gannaxhiiluʼ ca enemigu stiluʼ ne guni perdonarluʼ laacaʼ de guidubi ladxidoʼloʼ. Pa chuʼ tu guidxiichiné lii la? nagueendaca gunabaʼ perdón laa. Biʼniʼ tratar binni casi racaláʼdxiluʼ guni tratárcabe lii».

 Laaca bidii Jesús conseju galán de ca cosa ni nápanu. Guniʼbe: «Jma risaca gaca xhamígunu Jiobá qué gápanu bueltu. Purtiʼ zanda gaxha gubaanaʼ laanu bueltu stinu, peru guirutiʼ zanda gaxha laanu amistad ni nápanenu Jiobá. Nga runi, cadi chuʼluʼ xizaa de ni goloʼ, ni gueluʼ ne ni gáculuʼ. Biiyaʼ ca pajaruhuiiniʼ ca. Rapa Dios laacame ne rudii ni gócame. Neca chuʼluʼ xizaa, cadi pur nga zabániluʼ jma. Bietenalaʼdxiʼ: Nanna Jiobá xi guiráʼ caquiiñeluʼ».

Qué huayuudxí gunadiágacabe guiníʼ ti binni casi guníʼ Jesús. Nin cani rusiidiʼ de Ley qué nusiidicaʼ casi bisiidiʼ Jesús. ¿Xiñee guca Jesús ti maestru ni jma nanna gusiidiʼ yaʼ? Purtiʼ guiráʼ ni bisiidibe zeeda ni de Jiobá.

«Laudxiiba ayubu stinne xa yanni tu purti nasisi ni, cadi nanaa ni casi ni nua tu ca. Laudii lugar usiide laatu purti qué zaca nia laatu naduxhuʼ ne qué zadinde nia laatu» (Mateo 11:29-30).