Biiyaʼ guiraʼ ni nuu lu sitiu riʼ

guyé lu índice

 LECCIÓN 86

Bisibani Jesús Lázaro

Bisibani Jesús Lázaro

Gupa Jesús chonna xhamigu ni guleza ndaaniʼ guidxi Betania. Biree lácabe Lázaro, María ne Marta, bizaʼnaʼ guiónnacabe. Ti dxi laga nuu Jesús sti ladu guiiguʼ Jordán, biseendatidxi María ne Marta laabe ti cosa ni naquiiñeʼ gánnabe: «Guizáʼ huará Lázaro, gudáʼ nagueenda». Peru qué ñé diʼ Jesús oraqueca. Gulézabe chupa gubidxa ne despué gúdxibe ca discípulo stibe: «Chuu Betania. Nisiaasiʼ Lázaro, chaaʼ chigucuaaneʼ laabe». Ca apóstol que gúdxicaʼ laabe: «Pa nisiaasisibe, ziándabe njaʼ». Cumu qué ñene ca apóstol que ni guníʼ Jesús la? gúdxibe laacaʼ: «Maʼ guti Lázaro».

Para dxi yendá Jesús Betania, maʼ napa tapa gubidxa de bicaachicabe Lázaro. Stale binni yeganna Marta ne María. Ora gunna Marta maʼ yendá Jesús Betania, biree guxooñeʼ yechagalú laabe, ne gudxi laabe: «Señor, pa ñuuluʼ raríʼ la? qué ñati diʼ bizanaʼ». Para bicabi Jesús laabe: «Zabani bizáʼnaluʼ». ¿Runi creluʼ naa la? Para bicabi Marta laabe: «Nannaʼ zabánibe dxi guiasa ca gueʼtuʼ ca». Óraque bicabi Jesús laabe: «Naa nga rusibaneʼ gueʼtuʼ ne naa nga rudieeʼ guendanabani».

Despué de ngue, guyé Marta yetidxi María: «Maʼ nuu Jesús raríʼ». Nagueendaca biree María zeʼ ra nuu Jesús ne yenanda ca binni que laabe. Casi yendabe ra nuu Jesús bizuxíbibe xañee ne cayuunabe. Gúdxibe Jesús: «Señor, pa ñuuluʼ raríʼ la? qué ñati diʼ bizanaʼ». Bidii Jesús cuenta naná nuu ladxidóʼ Marta ne bizulú cayuunaʼ. Guiráʼ cani nuu raqué biiyacaʼ cayuunaʼ Jesús ne nacaʼ: «Nabé gunnaxhii Jesús Lázaro». Peru guyuu tu gunabadiidxaʼ: «¿Xiñee qué nulabe xhamígube yaʼ?». ¿Xi biʼniʼ Jesús óraque yaʼ?

Guyé Jesús ra baʼ bicaachicabe Lázaro, casi ti cueva ni, ne daʼguʼ ti guié ngola ruaa ni. Gunábabe cani nuu raqué: «Lacuee guié ca de raca». Para gudxi Marta laabe: «Maʼ candáʼ yuudxube, purtiʼ maʼ tapa gubidxa de gútibe». Neca zaqué guleecabe guié que, ne bizulú biʼniʼ orar Jesús: «Bixhozeʼ, rudieeʼ xquíxepeʼ lii purtiʼ cucaadiágaluʼ naa. Nannaʼ rucaadiágaluʼ naa, peru canieniáʼ lii nezalú guiráʼ binni riʼ ti  guni crecaʼ lii biseendaluʼ naa». Óraque bicaabe ti ridxi: «¡Lázaro, gudáʼ!». Málasi bizaaca xiixa ni nabé bidxagayaa binni: Biree Lázaro de ndaaniʼ baʼ que, renda lari guidubi naca. Para guníʼ Jesús: «Lacuee lari ca ládibe ne lagudii lugar chebe».

Stale binni biiyaʼ ni guca riʼ ne bizulú gúpacaʼ fe Jesús, peru guyuu xcaadxi ni yetidxi ca fariseu ni guca que. Dede dxi que, biyubi ca fariseu modo guuticaʼ Lázaro ne Jesús. Judas Iscariote, tobi de ca 12 apóstol stiʼ Jesús, nagaʼchiʼ guyé ra nuu ca fariseu ne gunabadiidxabe laacaʼ: «¿Pabiáʼ quíxhetu naa pa gacaniáʼ laatu guinaazetu Jesús yaʼ?». Guniʼcaʼ zudiicaʼ laabe 30 moneda de plata, gucuaabe bueltu que ne biyúbibe modo guinaazeʼ ca fariseu que Jesús.

«Dios [ni dxandíʼ] naca para laanu ti Dios ni rulá ca xpinni, ne Jiobá, Señor ni jma nandxóʼ nga zanda gulá binni de guendaguti» (Salmo 68:20).