Biiyaʼ guiraʼ ni nuu lu sitiu riʼ

guyé lu índice

 LECCIÓN 85

Bisianda Jesús dxi sábadu

Bisianda Jesús dxi sábadu

Gucananalaʼdxiʼ ca fariseu Jesús ne biyúbicaʼ modo guseguyoocaʼ laabe. Guniʼcaʼ cadi naquiiñeʼ gusianda Jesús dxi sábadu purtiʼ laani nga dxi riziilaʼdxiʼ binni. Ti sábadu biiyaʼ Jesús ti ciegu ni canabaʼ bueltu lu calle. Ngue runi gúdxibe ca discípulo stibe: «Laguuyaʼ ximodo gusianda poder stiʼ Dios hombre riʼ». Óraque biguuchabe nisaxhínnibe yú ne bíʼnibe caadxi beñe. De raqué guxúbibe ni lú hombre que ne gúdxibe laa: «Guyé ne gudiibiʼ luluʼ ndaaniʼ estanque stiʼ Siloam». Biʼniʼ hombre que ni, ne zaqué maʼ gunda biiyaʼ purtiʼ ciegu laa dede dxi gule.

Guizáʼ bidxagayaa ca binni que ne guniʼcaʼ: «Ndiʼ nga hombre ciegu ni rinabaʼ bueltu que njaʼ». Para bicábibe laacaʼ: «Naa nga hombre ca». Gunabadiidxaʼ ca binni que laabe: «¿Xiñee maʼ randa ruuyaluʼ pue?». Óraque gúdxibe laacaʼ xi gúcabe. Yené ca binni que laabe ra nuu ca fariseu para gábibe laacaʼ xi gúcabe.

Para ná hombre que rabi ca fariseu: «Guxubi Jesús beñe luaʼ ne gúdxibe naa chitiibeʼ luaʼ. Bineʼ ni nabe, ne yanna la? maʼ ruuyaʼ». Óraque ná ca fariseu: «Pa rusianda Jesús dxi sábad la? cadi de Dios nga zeeda poder ca». Peru guyuu tu guníʼ: «Pa cadi de Dios nga zeeda poder ca, ¿xiñee cusiándabe binni yaʼ?».

Biseendacaa ca fariseu bixhoze ne jñaa hombre que ne gunabadiidxacabe laacaʼ:  «¿Ximodo ndiʼ maʼ randa ruuyaʼ xiiñitu pue?». Guizáʼ cadxíbicabe ca fariseu purtiʼ maca guniʼcaʼ zaládxicaʼ de ndaaniʼ sinagoga tutiica gapa fe Jesús. Ngue runi bicabi bixhoze ne jñaa hombre que: «Qué gánnadidu gastiʼ. Laguinabadiidxaʼ laabe». Gunabadiidxaʼ ca fariseu hombre que ne laa bicabi laacabe: «Maʼ gudxeʼ laatu guiráʼ ni guca. ¿Xiñee canabadiidxarutu naa pue?». Bidxiichi ca fariseu que ne guládxicaʼ laabe de raqué.

Guca si ngue, yeguuya Jesús hombre que ne gunabadiidxaʼ laabe: «¿Ñee nápaluʼ fe Mesías la?». Para bicabi hombre que: «Pa ñannaʼ tuu nga Mesías ca la? ñapaʼ fe laabe». Óraque gudxi Jesús laabe: «Naa nga Mesías». ¿Cadi dxandíʼ guca Jesús nachaʼhuiʼ ne hombre ciegu riʼ la? Bisiándabe ne gucanebe laa gapa fe.

«Cuchee tu purti qué ganna tu xi na Xquiʼchi Dios nin pabiáʼ nandxóʼ be» (Mateo 22:29).