Biiyaʼ guiraʼ ni nuu lu sitiu riʼ

guyé lu índice

 LECCIÓN 71

Bilá Jiobá Jesús

Bilá Jiobá Jesús

Guyuu ti guidxi ladu este stiʼ Israel, ca binni de raqué biʼniʼ crecaʼ zanda guluíʼ ca estrella laacaʼ pa ladu checaʼ. Ti gueelaʼ, biiyaʼ caadxi hombre de neza Oriente ti biaaniʼ guibáʼ ni ruluíʼ ti estrella ni riniibi, ngue runi yenándacabe ni. Yené «estrella» que laacabe Jerusalén. Guidubi neza zinabadiidxaʼ ca hombre que binni: «¿Paraa nuu hombrehuiiniʼ ni chigaca rey stiʼ ca judíu? Racaláʼdxidu gusisácadu laabe».

Binadiaga Herodes, rey stiʼ Jerusalén, caníʼcabe de rey cubi riʼ. Guizáʼ guyuube xizaa ne gunabadiidxabe ca xaíque stiʼ ca sacerdote: «¿Paraa chigale rey ca?». Laacaʼ bicábicaʼ laabe: «Guníʼ ca profeta zálebe Belén». Ngue runi biseendacaabe ca hombre de ladu este stiʼ Israel que ne gúdxibe laacaʼ: «Laché Belén ne laguyubi hombrehuiiniʼ ca. Despué, laguibiguetaʼ ra nuaaʼ para gábitu naa paraa nuube, naa laaca nuaaʼ gusisacaʼ laabe». Peru cadi dxandíʼ diʼ ni nabe que.

Bizulú biniibi «estrella» que sti biaje, ne yenanda ca hombre que ni dede yendacaʼ Belén. Óraque bizuhuaadxí «estrella» que ique ti yoo, guyuu ca hombre que ndaaniʼ yoo que ne bidxélacabe Jesús né jñaa, María. Bisisácacabe hombrehuiiniʼ que ne bidiicabe laa stale regalu: oro, incienso ne mirra. Peru ¿ñee Jiobá ngue biseendaʼ ca hombre que ra nuu Jesús la? Coʼ.

Dxi queca, lu ti bacaandaʼ gudxi Jiobá José: «Racalaʼdxiʼ Herodes guuti Jesús. Gucuaa xheelaluʼ ne xiiñiluʼ, ne yené laacabe Egipto. Laguiaana raqué ne cadi guibiguétatu dede ora gabeʼ laatu maʼ zanda guireetu». Ngue runi biree José ne familia stiʼ zecaʼ Egipto.

Laaca gudxi Jiobá ca hombre que cadi guibiguétacaʼ ra nuu Herodes. Ora gunna Herodes maʼ qué nibiguetaʼ ca hombre que, guizáʼ bidxiichi. Ne cumu qué nidxélabe Jesús la? biʼniʼ mandarbe gatiʼ guiráʼ hombrehuiiniʼ de Belén ni napa biaʼ ca iza napa  Jesús. Peru qué nizaaca Jesús gastiʼ purtiʼ nuube Egipto, zitu de raqué.

Gudiʼdiʼ si ti tiempu, guti Herodes. Ne óraque gudxi Jiobá José: «Maʼ zanda guibiguétatu. Guirutiʼ zuniná laatu». Ngue runi bibiguetaʼ José, María ne Jesús guidxi Israel ne yendézacabe Nazaret.

«Zaca [cumplir] diidxaʼ guiniéʼ [...], ne dxandipeʼ zareendú ni biseendaʼ stiidxaʼ guni» (Isaías 55:11).