Biiyaʼ guiraʼ ni nuu lu sitiu riʼ

guyé lu índice

 LECCIÓN 67

Ca muru stiʼ Jerusalén

Ca muru stiʼ Jerusalén

Guibiguétanu caadxi si iza atrá. Nehemías nga ti israelita ni guleza Susa, ti guidxi stiʼ Persia. Bíʼnibe xhiiñaʼ rey Artajerjes. Ti dxi, beeda biʼchiʼ Nehemías de Judá ne gudxi laabe caadxi noticia ni cadi galán: «Ca israelita ni bibiguetaʼ Jerusalén gastiʼ cadi cayapa laacaʼ, purtiʼ ca muru ne ca puertaʼ stiʼ guidxi que caʼruʼ gaca chaahuiʼ cani dede dxi biʼniʼ feu ca babilonio cani». Guizáʼ guyuu Nehemías triste. Nuube gacanebe laacaʼ, ngue runi biʼniʼ orarbe Dios ti gudii rey que lugar chebe Jerusalén.

Gudiʼdiʼ si ti tiempu, biiyaʼ rey que nuu Nehemías triste. Óraque gudxi laabe: «Cadi zacá diʼ lii. ¿Xi cayácaluʼ?». Para bicabi Nehemías laabe: «Guizáʼ feu nuu Jerusalén xquidxeʼ, ¿ximodo ndiʼ qué chuaaʼ triste?». Gunabadiidxaʼ rey que laabe: «¿Xi zanda guneʼ para gacaniáʼ lii yaʼ?». Oraqueca biʼniʼ orar Nehemías ndaaniʼ ladxidóʼ. Ne despué bicábibe rey que: «Rinabaʼ lii rey, gudiiluʼ lugar chaaʼ Jerusalén para guindisaʼ ca muru stini». Bidii rey Artajerjes lugar chebe. Laaca bidii laabe guiráʼ ni iquiiñebe purtiʼ zitu ra chebe. Ne biʼniʼ laabe gobernador stiʼ Judá ne bidii laabe yaga para gaca ca puertaʼ stiʼ guidxi que.

Ora yendá Nehemías Jerusalén, yeguuya ximodo nuu ca muru que. Despué guca reunir ca sacerdote ne ca gobernador ne gúdxibe laacaʼ: «Guizáʼ feu nuu guidxi riʼ. Caquiiñeʼ gúninu dxiiñaʼ». Guyuu ca binni que de acuerdu ne bizulú biʼniʼ chaahuicaʼ ca muru que.

Caadxi de ca enemigu stiʼ ca israelita bizulú biʼniʼ búrlacaʼ laacabe ne guniʼcaʼ: «Ti zorro si zanda gusaba muru ni cayúnitu ca». Peru nin qué nulábicabe laacaʼ ne biʼnirúcabe dxiiñaʼ. Ra zidiʼdiʼ dxi ziyúnicabe muru que jma nasoo ne jma nadipaʼ.

Ngue runi, stale de ca enemigu stícabe de gadxé gadxé lugar guníʼ íquecaʼ gucaalucaʼ Jerusalén. Ora gunna ca judíu ni, guizáʼ bidxíbicaʼ. Peru gudxi Nehemías laacabe: «Cadi guidxíbitu. Nuuné Jiobá laanu». Ne guluube hombre para gapa cani cayuni dxiiñaʼ. Maʼ qué ñanda ñuni ca enemigu que laacabe gastiʼ.

 Biluxe ca muru ne ca puertaʼ stiʼ guidxi que 52 si dxi. Para gusihuínnicabe nayecheʼ nuucabe, biseendacaa Nehemías ca levita gueedacaʼ Jerusalén. Bíʼnibe laacaʼ chupa grupu para gúʼndacaʼ. Ziné Esdras ti grupu que ne laabe zinebe stobi. Gudxíʼbacabe lu escalera stiʼ ti lugar ni rábicabe Puerta de la Fuente. Despué, cada grupu gucuaa gadxé gadxé neza, guzácabe guidubi ruaa muru que dede bidiicabe buelta guidxi que. Ziguxhídxicabe trompeta, címbalo ne arpa, ne ziyuundacabe para Jiobá dede yendácabe ra templu que. Hombre, gunaa ne xcuidi bidiicaʼ sacrificiu Jiobá ne bíʼnicaʼ ti saa. Tantu nayecheʼ guyuucabe dede zitu yendá ridxi stícabe.

«Intiica guiibaʼ gúnicabe para gucaalúcabe lii, qué zabeendunedícabe ni gastiʼ» (Isaías 54:17).