Biiyaʼ guiraʼ ni nuu lu sitiu riʼ

guyé lu índice

 CAPÍTULO 7

Yeguuya caadxi astrólogo Jesús

Yeguuya caadxi astrólogo Jesús

MATEO 2:1-12

  • YENÉ TI «BELEGUÍ» CAADXI ASTRÓLOGO JERUSALÉN NE DESPUÉ RA NUU JESÚS

Beeda caadxi astrólogo de Oriente. Ti astrólogo nga ti binni ni ná zanda gusiene xiñee rizaaca binni caadxi cosa ra guni estudiar posición stiʼ ca beleguí (Isaías 47:13). Dxi nuu ca hombre riʼ xquídxicaʼ biiyacaʼ ti «beleguí» ne guzacaʼ gayuaa kilómetru zinándacaʼ ni. Peru qué niné diʼ «beleguí» riʼ laacabe Belén, sínuque yeneni laacabe Jerusalén.

Ne ora yendá ca astrólogo que Jerusalén, gunabadiidxacaʼ: «¿Paraa nuu ni gule para gaca rey stiʼ ca judíu? Purtiʼ bidúʼyadu beleguí stibe ora nuudu Oriente, ne ziúpadu para gusisácadu laabe» (Mateo 2:1, 2).

Ora gunna Herodes, rey de Jerusalén, guizáʼ bidxiichi. Para bitagulisaa ca sacerdote principal ne ca escriba ne gunabadiidxaʼ laacabe paraa nexheʼ gale Cristu. Ne bicábicabe casi zeeda lu Stiidxaʼ Dios: «Ndaaniʼ guidxi Belén» (Mateo 2:5; Miqueas 5:2). Binadiaga si Herodes ndiʼ, nagaʼchiʼ biseendacaa ca astrólogo que ne gudxi laacabe: «Laché ne laguyubi hombrehuiiniʼ ca guiráʼ ladu. Ora maʼ bidxélatu laabe la? guedatídxitu naa, ti chaaʼ ne gusisacaʼ laabe» (Mateo 2:8). Peru ni nuu Herodes guni nga guuti hombrehuiiniʼ que.

Ora biree ca astrólogo que zecaʼ, biiyacaʼ zániru xa «beleguí» ni bíʼyacaʼ Oriente que lucaʼ. Ndiʼ rusiidiʼ laanu, cadi normal diʼ «beleguí» bíʼyacabe que. Guzanándacabe «beleguí» que dede ra biaanadxini ra nabeza José, María ne hombrehuiiniʼ que.

Ne ora biuucabe ndaaniʼ yoo que, biiyacabe María ne Jesús. Óraque bizuxíbicabe ne bisisácacabe hombrehuiiniʼ que ne bisigáʼdecabe laa oro, inciensu ne mirra. Ora gucaláʼdxicabe nibiguéʼtacabe ra nuu Herodes, gudxi Dios laacabe lu ti bacaandaʼ cadi gúnicabe ni. Ngue runi, gucuaacabe sti neza para bibiguéʼtacabe xquídxicabe.

¿Tu biquiiñeʼ «beleguí» que para guluíʼ ca astrólogo que paraa checaʼ yaʼ? Casi maʼ bizíʼdinu, qué niné diʼ «beleguí» que laacabe primeru Belén, ra nuu Jesús, sínuque yeneni laacabe Jerusalén. ¿Tu guniʼnécabe raqué yaʼ? Guniʼnécabe Herodes. Gucalaʼdxiʼ rey riʼ ñuuti Jesús, ne ñúnibe ni pa ñaca qué ñabi Dios ca astrólogo que cadi guiniʼcaʼ paraa nuu hombrehuiiniʼ que. Rihuinni ca Binidxabaʼ, enemigu stiʼ Dios, nga biquiiñeʼ «beleguí» que para guuti Jesús.