Biiyaʼ guiraʼ ni nuu lu sitiu riʼ

guyé lu índice

 CAPÍTULO 2

Dios guníʼ xi guicá lu Biblia

Dios guníʼ xi guicá lu Biblia

1, 2. ¿Xiñee naca Biblia ti regalu ni jma galán?

¿XIMODO runi sentirluʼ ora rudii ti xhamíguluʼ lii ti regalu ni cadi cabézaluʼ? Pa ñanda si nuxhéleluʼ ni nagueendaca ¿njaʼ? Guizáʼ riécheluʼ purtiʼ bietenalaʼdxiʼ xhamíguluʼ lii, ne rudiiluʼ xquixe peʼ laabe.

2 Biblia nga regalu ni jma galán maʼ bidii Dios laanu. Nápani información ni qué zadxélanu sti lugar. Rábini laanu bizáʼ Dios guibáʼ ne Guidxilayú, ne laaca bizaʼbe primé hombre ne primé gunaa. Lu Biblia zeeda stale conseju ni racané laanu ora gápanu problema. Ne laaca rusiidini laanu racalaʼdxiʼ Dios gaca Guidxilayú riʼ ti lugar galán ne cusiénebe laanu ximodo chigúnibe ni.

3. ¿Xi zaziidiluʼ ra guni estudiarluʼ Biblia?

3 Ra guni estudiarluʼ Biblia, zaziidiluʼ racalaʼdxiʼ Dios gaca xhamíguluʼ laa. Ra jma gunibiaʼluʼ laabe, zuni sentirluʼ nuuluʼ jma gaxha de laabe.

4. ¿Xii nga ni jma ridxagayaaluʼ de Biblia?

4 Maʼ guca traducir Biblia lu jma de 3,000 idioma, ne maʼ guca imprimir stale millón de laani. Lu guidubi Guidxilayú, gaʼ de cada chii binni ruundaʼ Biblia lu idioma ni gulené. Ne cada semana riaaziʼ jma de ti millón de Biblia. Rihuinni dxíchica gástiruʼ sti libru casi Biblia.

5. ¿Xiñee zanda guininu «Dios nga guníʼ xi guicá» lu Biblia?

5 Dios «nga guníʼ xi guicá» lu Biblia (biindaʼ 2 Timoteo 3:16). Peru zándaca chuʼ tu guiníʼ: «Pa hombre bicaa Biblia, ¿ximodo nánnanu Stiidxaʼ Dios ni yaʼ?». Sicaríʼ ricabi  Biblia pregunta riʼ: «Gucané espíritu santu ca hombre riʼ para guiniʼcaʼ xii nga racalaʼdxiʼ Dios» (2 Pedro 1:21). Gucané Dios ca hombre ca. Zanda guchaaganu ni ora guinabaʼ ti jefe secretariu stiʼ gucaa ti carta. ¿Tu stiʼ carta ca yaʼ? Stiʼ jefe ca, cadi stiʼ secretariu ca. Zacaca nga Biblia, stiʼ Dios ni, ne cadi stiʼ ca hombre ni biquiiñeʼ Dios para gucaa ni. Gucané Dios laacabe para gucaacabe modo riníʼ ique luni. Nga runi, zanda guininu «dxandíʼ stiidxaʼ Dios» Biblia (1 Tesalonicenses 2:13). (Biindaʼ nota 2, «“Dios nga guníʼ xi guicá” lu Biblia»).

Maʼ nuu Traducción del Nuevo Mundo lu stale idioma.

TI LIBRU NI QUÉ RUCHEE

6, 7. ¿Xiñee zanda guininu cadi gadxé gadxé ni rusiidiʼ Biblia?

6 Dede dxi bizulú gucuá Biblia dede ra bilúxeni gudiʼdiʼ  jma de 1,600 iza. Ne gadxé gadxé iza bibani ca hombre bicaani. Caadxi de laacaʼ guyecaʼ scuela ne xcaadxi coʼ. Tobi de laacabe guca doctor. Ne xcaadxi gúcacaʼ campesinu, pescador, pastor, profeta, juez ne rey. Peru qué ruchaa ni rusiidiʼ Biblia neca gadxé gadxé hombre bicaani. ¿Xiñee zanda guininu zacá yaʼ? Purtiʼ ti mensaje si zeeda lu Biblia dede ra bizulú hasta ra biluxe. *

7 Lu ca primé capítulo stiʼ Biblia rusiene ximodo bizulú ca problema ni nuu lu Guidxilayú. Ne lu ca últimu capítulo stini, cayabi laanu ximodo chiguni chaahuiʼ Dios ca problema ne zacá gaca Guidxilayú riʼ ti paraísu. Laaca ruzeeteʼ Biblia stale mil iza de historia stiʼ binni ne rusihuínnini siempre runi cumplir Dios guiráʼ ni riníʼ.

8. ¿Gunáʼ nga ca ejemplu ni rusihuinni biaʼsi ni rusiidiʼ Biblia ora guzeeteni xiixa tema de ciencia?

8 Qué nicá diʼ Biblia para gusiidini binni de ciencia, nin para iquiiñeʼ binni ni casi ti libru ra scuela. Peru biaʼsi ni rusiidini ora caniʼni de ciencia. Ne cumu Dios guníʼ xi guicá lu Biblia la? qué ridxagayaanu guzeeteni ca tema riʼ. Guzéʼtenu ti ejemplu, cusiene libru stiʼ Levítico xi gudxi Dios ca israelita xi naquiiñeʼ gúnicaʼ para cadi guireeche guendahuará. Gucuá ca diidxaʼ riʼ ante ganna binni runi huará ca bacteria ne ca virus laacaʼ. Ne laaca biaʼsi ni cá lu Biblia purtiʼ ruzeeteni zaʼbiʼ Guidxilayú riʼ lu bi (Job 26:7). Tiempu biʼniʼ cré stale binni planu Guidxilayú riʼ la? maca riete lu Biblia redondo ni (Isaías 40:22).

9. Ra guca ca hombre ni bicaa Biblia sinceru ne honradu, ¿xi rusihuínnini?

9 Ora ruzeeteʼ Biblia de historia la? siempre biaʼsi ni  rusiidini. Peru stale libru de historia cadi biaʼsi ni rusiidiʼ, purtiʼ cadi dxandíʼ guiráʼ ni bicaa ca hombre ni guníʼ ca historia que. Guzéʼtenu ti ejemplu, cadi guiráʼ biaje guníʼcabe ra biniti xquídxicabe lu ti guerra. Peru ca hombre bicaa Biblia bicaacaʼ guiráʼ ni bizaacacaʼ dede né ora runiti guidxi Israel lu ti guerra. Ne laaca bicaacaʼ ra bicheecaʼ. Guzéʼtenu ti ejemplu, lu Salmo 51, guníʼ rey David biʼniʼ cometer caadxi pecadu nabé naroʼbaʼ. Cumu guca ca hombre ni bicaa Biblia sinceru ne honradu la? rusihuínnini Dios nga guníʼ xi guicá lu Biblia ne zanda guni crenu dxandíʼ guiráʼ ni cá luni.

TI LIBRU NI NAPA STALE CONSEJU GALÁN

10. ¿Xiñee dede yanna racané ca conseju zeeda lu Biblia laanu?

10 Dios nga guníʼ xi guicá lu Biblia «ne nuu ni para gusiidini laanu, para gábini laanu paraa cucheʼnu, para guni corregirni guiráʼ cosa ne para gusiidini binni según ni jneza» (2 Timoteo 3:16). Dede yanna racané ca conseju zeeda lu Biblia laanu purtiʼ Jehová guníʼ xi guicá luni. Cumu laabe bizaʼbe laanu la? riénebe guiráʼ ni riníʼ íquenu ne ni runi sentirnu. Jma runibiaʼbe laanu que laca laanu ne racaláʼdxibe guibáninu nayecheʼ. Nánnabe xi runi convenir ne xi qué runi convenir laanu.

11, 12. a) ¿Gunáʼ nga caadxi de ca conseju galán ridxélanu lu Mateo 5 hasta 7? b) ¿Xiruʼ zanda guidxélanu lu Biblia?

11 Zeeda caadxi conseju guizáʼ galán lu Mateo 5 hasta 7. Luni cayabi Jesús laanu xi caquiiñeʼ gúninu para guibáninu nayecheʼ, ximodo zanda gaca llevarnu bien xcaadxi binni, ximodo naquiiñeʼ guni orarnu ne ximodo naquiiñeʼ guiníʼ ique binni de bueltu. Neca raca biaʼ chupa mil iza de bidii Jesús ca conseju riʼ, dede yanna guizáʼ cayacanécani binni.

 12 Laaca zeeda stale principiu lu Biblia ni racané laanu para guibaninenu familia stinu jma galán, para gúninu dxiiñaʼ stinu jneza ne chuʼnu en paz né xcaadxi binni. Ra tiica nabézanu, tutiica nácanu ne neca gadxé gadxé problema nápanu, siempre zacané ca principiu zeeda lu Biblia laanu (biindaʼ Isaías 48:17). (Biindaʼ nota 3, «Principiu»).

TI LIBRU NI ZANDA GUNI CRENU CA PROFECÍA STIʼ

Bicaa profeta Isaías zanitilú guidxi Babilonia.

13. ¿Xi guníʼ Isaías zazaaca guidxi Babilonia?

13 Maʼ guca cumplir stale de ca profecía ni zeeda lu Biblia. Guzéʼtenu ti ejemplu, guníʼ profeta Isaías zanitilú guidxi Babilonia ne bisiene chaahuibe ximodo chigaca conquistar ni (Isaías 13:19). Napa guidxi Babilonia puertaʼ naroʼbaʼ ne nuu ti guiiguʼ guidubi buelta de laani. Isaías guníʼ zabidxi guiiguʼ que ne ziaanaxeleʼ ca puertaʼ stini. Laaca guniʼbe qué zadinde diʼ ca hombre ni chiguni conquistar Babilonia. Ne laaca guníʼ profeta Isaías, Ciro nga láʼ hombre ni chiguni conquistar guidxi que (biindaʼ Isaías 44:27-45:2). (Biindaʼ nota 4, «Profecía»).

14, 15. ¿Ximodo guca cumplir profecía bicaa Isaías?

14 Biaʼ chupa gayuaa iza despué de bicaa Isaías profecía riʼ, yendá ti ejércitu guidxi Babilonia para guni conquistar ni. ¿Tuu nga xaíque stiʼ ejércitu que yaʼ? Rey stiʼ guidxi Persia. ¿Tu labe yaʼ? Ciro, casi maca bicaa profeta Isaías. Yanna huaxa maʼ nuu guiráʼ ni listu para gaca cumplir xcaadxi cosa ni zeeda lu profecía riʼ.

15 Gueelaʼ guyuu Ciro ne ejércitu stiʼ ndaaniʼ guidxi Babilonia, cayuni ca binni que ti saa. Runi sentírcabe seguru purtiʼ nuu guiiguʼ ne ca muru naroʼbaʼ ni cayapa guidxi que. Peru fuera de guidxi que biʼniʼ Ciro ne ejércitu  stiʼ ti canal para guiete nivel stiʼ guiiguʼ que. Biete si nivel stini, gunda gudiʼdiʼ ca soldadu de Persia que ndaaniʼ ni. Peru ¿ximodo chúʼcabe pa napa guidxi que muru yaʼ? Casi maca biete lu profecía que, biaanaxeleʼ ca puertaʼ stiʼ guidxi Babilonia. Nga runi gunda biʼniʼ conquistar ca soldadu guidxi que sin nidíndecaʼ.

16. a) ¿Xi bicaa Isaías zazaaca Babilonia? b) ¿Xiñee nánnanu guca cumplir profecía bicaa Isaías?

 16 Laaca bicaa Isaías maʼ guirutiʼ tu zabeza ndaaniʼ guidxi Babilonia. Laabe bicaabe: «Qué ziuu dxi cuézacabe luni, neca tidiʼ guiráʼ generación guirutiʼ qué zabeza luni» (Isaías 13:20). ¿Ñee guca cumplir profecía riʼ la? Guca cumplir ni pue. Guyuu guidxi Babilonia biaʼ 80 kilómetru ladu gueteʼ de ra riaana guidxi Bagdad (Irak) yanna. Peru tiempu riʼ puru si escombro nuu raqué. Guirutiʼ nabeza raqué. Casi ná Biblia binduubaʼ Jehová Babilonia «né gubaʼyaʼ ni runitilú» (Isaías 14:22, 23). *

Ni biaana de guidxi Babilonia

17. ¿Xiñee zanda guni crenu guiráʼ ca promesa stiʼ Dios?

17 Maʼ guca cumplir stale de ca profecía ni riete lu Biblia. Nga runi, zanda guni crenu ni riníʼ Biblia chigaca lu futuro. Zanda chuʼnu seguru zuni cumplir Jehová  promesa stiʼ ra guni Guidxilayú riʼ ti paraísu (biindaʼ Números 23:19). Cudii Dios laanu ti esperanza de guibáninu para siempre, purtiʼ laa «qué rusiguii» (Tito 1:2). *

ZANDA GUCHAA BIBLIA XQUENDANABÁNILUʼ

18. ¿Xi guníʼ apóstol Pablo de «stiidxaʼ Dios»?

18 Dede biaʼ ra maʼ biindaluʼ, maʼ biziidiluʼ gástiruʼ sti libru casi Biblia. Tobi si ni rusiidiʼ Biblia ne biaʼsi ni nani ora cusiéneni de ciencia ne historia. Laaca rudiini laanu stale conseju ne zeeda stale profecía ni maʼ guca cumplir luni. Peru cadi ngasi, apóstol Pablo bicaa: «Nabani stiidxaʼ Dios ne napa poder». ¿Xi riníʼ ca diidxaʼ riʼ yaʼ? (Biindaʼ Hebreos 4:12).

19, 20. a) ¿Ximodo zanda gacané Biblia lii gunibiaʼluʼ laca lii? b) ¿Ximodo zanda gusihuínniluʼ rusisácaluʼ Biblia?

19 Zanda guchaa Biblia xquendanabániluʼ. Zanda gacaneni lii gunibiaʼluʼ laca lii. ¿Ximodo yaʼ? Zanda gacané Biblia laanu guiénenu xi riníʼ íquenu ne xi sentimientu nuu ndaaniʼ ladxidoʼno. Guzéʼtenu ti ejemplu, zándaca riníʼ íquenu maʼ nadxiinu Dios. Peru ora guni estudiarnu Biblia, rudiʼnu cuenta caquiiñeʼ gusihuínninu nadxiinu laabe pur ca ni rúninu ne ra chinándanu ni rusiidiʼ Biblia.

20 Rihuinni dxichi Dios guníʼ xi guicá lu Biblia. Racaláʼdxibe gúʼndaluʼ, guni estudiarluʼ ne gannaxhiiluʼ Biblia. Bisisaca ni, purtiʼ ti regalu stiʼ Dios ni. Cadi gusaana de guni estudiarluʼ Biblia. Zacá zánnaluʼ xi naguixhe ique Dios, xi racaláʼdxibe para binni. Lu sti capítulo ca zazíʼdinu xcaadxi cosa ni racalaʼdxiʼ Dios para laanu.

^ párrafo 6 Nuu binni riníʼ gadxé gadxé ni rusiidiʼ Biblia, peru cadi dxandíʼ ni. Pa racaláʼdxiluʼ gánnaluʼ jma la? biindaʼ yaza 3 ne 31 stiʼ folletu ni láʼ Cani zeeda lu Biblia, ni biʼniʼ ca testigu stiʼ Jehová.

^ párrafo 16 Pa racaláʼdxiluʼ gánnaluʼ jma de ca profecía ni riete lu Biblia la? biindaʼ artículo ni láʼ «La Biblia, un libro de profecías exactas. Parte 2», ni zeeda lu revista ¡Despertad! beeu junio de 2012, yaza 12 hasta 14, ni biʼniʼ ca testigu stiʼ Jehová.

^ párrafo 17 Guca cumplir tobi de ca profecía riete lu Biblia dxi binitilú Babilonia. Zadxélaluʼ jma información de xcaadxi profecía lu nota 5, «Ca profecía ni caníʼ de Mesías»).