Biiyaʼ guiraʼ ni nuu lu sitiu riʼ

guyé lu índice

 Ndaa 6

Job bizuubaʼ stiidxaʼ Dios

Job bizuubaʼ stiidxaʼ Dios

Binidxabaʼ guníʼ runi Job ni na Dios purtiʼ caguube ndaayaʼ laa, peru Job qué nucheené Jiobá

ÑEE zanda guzuubaʼ binni stiidxaʼ Dios ora tiidiʼ lu guendanagana, neca ruluíʼ qué zabeendú gastiʼ la? Ngapeʼ nga ni bisihuinni ti hombre láʼ Job. Guidúʼyanu xi bíʼnibe.

Job nga tobi de ca xfamilia Abrahán ni guleza lugar ra nuu guidxi Arabia yanna, bibánibe dxi guyuu ca israelita Egipto. Ti dxi bidagulisaa Jiobá ne ca ángel stiʼ guibáʼ ne guníʼcabe de Job. Ne laaca guyuu Binidxabaʼ raqué. Nezalú guirácabe bisisaca Jiobá Job purtiʼ gastiʼ sti binni casi laa ne cani guniʼbe que bisihuínnicani qué ziuu dxi gusaana Job de guni ni nabe. Peru Binidxabaʼ na runi Job ni na Dios purtiʼ cudiibe laa guiráʼ ni napa ne cayápabe laa. Ne guniʼbe zudxiideche Job Jiobá pa guniti guiráʼ ni napa.

Dios bidii lugar gaxha Binidxabaʼ Job guiráʼ ni napa, guutibe ca xiiñiʼ ne guni huarabe laa. Cumu qué ganna Job pa Binidxabaʼ nga cutiidiʼ laa lu guiráʼ guendanagana que la? qué ñénebe xiñee bidii Dios lugar guizaacabe guiráʼ ngue. Neca zaqué qué ñuu dxi nusaana de ñúnibe ni na Jiobá.

Despué guyé chonna hombre ra nuube ni nacaʼ xhamígucaʼ laabe. Casi lu guidubi naca libru stiʼ Job cá guiráʼ ca diidxaʼ ni guníʼ ca hombre que. Ne ca diidxaʼ que gucaláʼdxicabe nucaacabe Job ñuni cré Dios ngue cutiidiʼ laa lu ca guendanagana que pur ca cosa malu ni bíʼnibe nagaʼchiʼ. ¡Aque bisiguii ca hombre que xa! Dede guníʼcabe qué rizaalaʼdxiʼ Dios ca xpinni ne nanna Dios qué zúnicabe ni na. Peru Job qué niná ñuni cré ni guníʼcabe que, ne guníʼ qué zucheené Dios dede ora gati.

Neca guniʼbe zaqué la? jma gucuá íquebe gusihuínnibe qué gápabe donda. Ngue runi, ti hombre jma nahuiiniʼ que laacabe ni láʼ Elihú, ni cucaadiaga guiráʼ ni caníʼcabe gucané laabe guchaabe modo riníʼ íquebe, purtiʼ jma bisisácabe laabe que nusisácabe lá Jiobá ne derechu ni napa de guni mandar. Ne laaca gudindenebe guionnaʼ hombre ni nacaʼ xhamígucaʼ Job.

Últimu maʼ Jiobá peʼ gucané Job guchaa modo riníʼ ique. Biquiiñebe guiráʼ cani maʼ bizaʼbe para bisiidibe laa pabiáʼ nandxoʼbe ne pabiaʼtiʼ nga binni nezalube. Job bicaadiaga cani gudxi Jiobá laa ne qué ñuni cré laca laa. Ne cumu «riá [Jiobá] binni, ne rilaselaʼdxi laacaʼ» la? ngue runi bisiándabe Job, bidiibe laa doble de biaʼ biniti ne bidiibe laa xi xhii xiiñiʼ (Santiago 5:11). Ra qué nuchee Job, bisihuinni cadi dxandíʼ ni guníʼ Binidxabaʼ que, ne laaca bisihuínnibe neca tiidiʼ binni lu intiica guendanagana zanda guzuubacaʼ stiidxaʼ Dios sin gucheenecaʼ laabe.

(Zeedani lu libru stiʼ Job.)