Biiyaʼ guiraʼ ni nuu lu sitiu riʼ

guyé lu índice

 Ndaa 19

Cani guníʼ Jesús zazaaca dxiqué laaca cayaca cani yanna

Cani guníʼ Jesús zazaaca dxiqué laaca cayaca cani yanna

Jesús guníʼ ximodo zanna binni maʼ bizulú cayuni mandar ne mayaca guiluxe ca cosa malu nuu lu guidxilayú riʼ

TI DXI zubané Jesús tapa de ca discípulo stiʼ lu dani Olivo, de raqué nabé sicarú rihuinni guidxi Jerusalén ne yuʼduʼ stiʼ. Laga nuucabe stúbicabe raqué, gunabaʼ ca discípulo que laabe gusiénebe laacaʼ caadxi cosa ni maca bizeetebe. Cadi tan xadxí de guniʼbe zanitilú yuʼduʼ que ne maca guniʼbe zaluxe guiráʼ ca cosa malu cayaca lu guidxilayú riʼ (Mateo 13:40, 49). Ngue runi gunabadiidxacabe laabe: «Padxí nga nouʼ gaca irá ni guʼdxu laadu que. Ne xi seña ihuinni dxi mayaca gueedu ne iluxe guidx[i]layú riʼ» (Mateo 24:3).

Ra bicabi Jesús laacabe que bisiene xi zazaaca ante guinitilú Jerusalén ne yuʼduʼ stiʼ. Peru guiráʼ cani guniʼbe que cadi raqué si zaca cani, sínuque napa xidé guizaaca cani lu guidubi naca Guidxilayú. Ni naquiiñeʼ guni binni para ganna padxí maʼ nuu Jesús ládecaʼ nga gatanacaʼ ti gúʼyacaʼ ti seña o caadxi cosa ni chigaca lu guidubi naca Guidxilayú lu ti tiempu si. Seña ca zusihuinni maʼ biʼniʼ Jiobá Jesús Rey lu Reinu stiʼ ne maʼ cadi candaa zabee gobiernu ca guiráʼ guendaquéiquiiñeʼ ni cayaca yanna riʼ. Gobiernu ca zacané guibiguetaʼ guibani binni galán lu guidubi naca Guidxilayú. Guiráʼ ni guníʼ Jesús zazaaca que, zusihuínnicani mayaca guinitilú guidxilayú riʼ. Xii nga guidxilayú ni chiguinitilú ca yaʼ. Laani nga guiráʼ ca gobiernu políticu, ca religión ni cadi dxandíʼ ne ca binni ni cadi cayuni ni jneza. Gaca si nga zuzulú ti guidxilayú cubi.

Jesús guníʼ ora maʼ guzulú guni mandar guibáʼ, ziuu guendaridinde, guendarindaana, xu ne guendahuará lu guidubi naca Guidxilayú. Ne chaahuiʼ chaahuiʼ ziuu stale binni ni maʼ qué zaná guni ni na ley. Ne cani dxandíʼ xpínnibe zucheechecaʼ diidxaʼ nacubi ne galán stiʼ Reinu stiʼ Dios ndaaniʼ guiráʼ ca guidxi roʼ ca. Guiráʼ ca cosa riʼ o seña ca zalúxecani ora gueeda dxi jma nagana que ne nabé naná zácani para binni, purtiʼ qué huayuu dxi guizaaca ti cosa casi laani (Mateo 24:21).

Ximodo zanda ganna ca xpinni Cristu maʼ zeeda dxiña ca dxi ca yaʼ. Jesús gudxi ca discípulo stiʼ: «Laicaa ejemplu sti yaga duʼgaʼ» (Mateo 24:32). Ora ribee yaga duʼgaʼ rama riʼniʼ ne bandaga la? ranna binni maʼ zeeda dxiña tiempu nandáʼ. Zacaca, ora gaca guiráʼ cani guníʼ Jesús que lu ti tiempu si, zudiʼnu cuenta mayaca gunitilube guiráʼ ca cosa malu cayaca lu guidxilayú riʼ. Peru Jesús guníʼ Bixhoze si nga nanna padxí ne pora guzulú ca dxi jma nagana ca. Ngue runi gudixhenabe ca discípulo stibe sicaríʼ: «Lagataná [...] purti qué ganna tu padxí ganda ora guendaʼ» (Marcos 13:33).

(Zeedani lu capítulo 24 ne 25 stiʼ Mateo, capítulo 13 stiʼ Marcos ne capítulo 21 stiʼ Lucas.)

^ párrafo 14 Para gánnaluʼ jma de cani guníʼ Jesús la? zanda gúʼyaluʼ ni na libru Xipeʼ ndiʼ cusiidiʼ Biblia ni zeeda lu yaza 86 dede 95, ni biʼniʼ ca testigu stiʼ Jiobá.