Biiyaʼ guiraʼ ni nuu lu sitiu riʼ

guyé lu índice

 Ndaa 17

Guníʼ Jesús de Reinu stiʼ Dios

Guníʼ Jesús de Reinu stiʼ Dios

Jesús bisiidiʼ stale cosa ca discípulo stiʼ, peru ni jma bisiidibe nga de Reinu stiʼ Dios

XIÑEE beeda Jesús lu Guidxilayú riʼ. Laca laabe guniʼbe: «Napa xidé [...] chi güe nia binni modo runi mandar Dios, purti para nga bendáʼ» (Lucas 4:43). Guidúʼyanu tapa cosa ni bisiidiʼ Jesús de Reinu stiʼ Dios, tema ni jma guniʼbe dxi bicheechebe diidxaʼ.

1. Jesús nga zeeda gaca Rey que. Laapebe guniʼbe laabe nga Mesías ni nexheʼ gueeda que (Juan 4:25, 26). Laaca guniʼbe laabe nga Rey ni biʼyaʼ profeta Daniel lu visión stiʼ. Gúdxibe ca apóstol stibe (ca xpínnibe ni jma guzané laabe), zedandá ti dxi zabibe casi Rey ne laacaʼ zeeda gácacaʼ ti grupuhuiiniʼ de binni ni zuni mandarné laabe (Mateo 19:28). Ne gulee labe laacaʼ «grupu huiiniʼ de dendxuʼ». Ne laaca guniʼbe de «xcaadxi dendxu» ni cadi naca de grupu ca (Lucas 12:32, NM; Juan 10:16).

2. Reinu stiʼ Dios zuni ni jneza. Jesús guníʼ zabee Reinu stiʼ Dios tobi de ca cosa ni jma feu guca dxiqué: ni biʼniʼ Binidxabaʼ ora guníʼ mal de lá Dios. Ximodo zaca nga yaʼ. Zusisácani, o zusiani lá Dios de guiráʼ ca cosa feu ni caníʼ binni de laa dede dxi bicaalúcabe laa ndaaniʼ jardín ni guyuu Edén que (Mateo 6:9, 10). Laaca bisihuinni Cristu, ora maʼ cayuni mandar Reinu ca maʼ guirutiʼ tu zuni menu binni, purtiʼ laabe bisiidibe hombre ne gunaa, binni ni napa bidxichi ne ni qué gapa, qué nibibe tu nusiidibe. Ne neca ca israelita que nga zeeda gusiidibe, laaca gucanebe ca samaritanu ne ca binni ni cadi naca judíu. Gadxepeʼ gúcabe de ca xaíque yuʼduʼ ni guyuu dxi bibánibe que, purtiʼ laacaʼ nisi riníʼ íquecaʼ mal de ca binni que ne gulicaʼ tu gucanecaʼ.

3. Reinu stiʼ Dios qué zuni mandar lu guidxilayú ni nuu lu náʼ Binidxabaʼ riʼ. Jesús bibani ti tiempu ra gupa ca judíu que guendanagana, purtiʼ biʼniʼ mandar sti guidxi laacaʼ. Peru qué liica ñuu dxi nudiibe lugar niguucabe laabe lu política (Juan 6:14, 15). Dxi caníʼnebe ti hombre ni runi mandar, guniʼbe: «Cadi beda aca diaʼ rey ndaani guidxilayú riʼ» (Juan 18:36). Ne gúdxibe ca discípulo stibe: «Cadi de laacabe laatu» (Juan 15:19). Laaca qué nudiibe lugar ninaazecaʼ guiibaʼ dede nin ora chinaazeʼ ca xhenemígube laabe (Mateo 26:51, 52).

«Biree Jesús, canazá ca guidxi roʼ ne guidxi huiiniʼ, canayuíʼ né binni modo runi mandar Dios.» (Lucas 8:1)

4. Zuni mandar Cristu ne guendarannaxhii. Jesús guníʼ zacané ca xpinni ora guidxagalucaʼ guendanagana, ni zeeda gaca para laacaʼ casi xiixa ni nanaa (Mateo 11:28-30). Ne zaquepeʼ bíʼnibe ni. Bidiibe conseju ni zacané laacaʼ cadi chuʼcaʼ xizaa, cadi guicá íquecaʼ gápacaʼ stale cosa risaca, modo chuʼcaʼ galán ne binni ne modo chuʼcaʼ nayecheʼ (Mateo, capítulo 5 dede 7). Nabé gunnaxhiibe binni ne bidiibe lugar guidxíñacaʼ laabe. Dede ca binni ni qué gapa gastiʼ rudii gana laacaʼ checaʼ ra nuube, purtiʼ nánnacaʼ zusisácabe laacaʼ ne zuni respetarbe laacaʼ. Ñee cadi guiranu nga ñuuláʼdxinu ñuu ti binni casi laabe ni ñuni mandar laanu la?

Para gusihuinni Jesús xi guiráʼ zuni Reinu stiʼ Dios la? laaca bíʼnibe stale milagru. Xi bisihuinni ca milagru bíʼnibe que yaʼ. Guidúʼyanu.

(Zeedani lu libru stiʼ Mateo, Marcos, Lucas ne Juan.)