Biiyaʼ guiraʼ ni nuu lu sitiu riʼ

guyé lu índice

 Ndaa 9

Gunabaʼ guidxi Israel gapa ti rey

Gunabaʼ guidxi Israel gapa ti rey

Saúl, primé rey stiʼ Israel qué nuzuubaʼ stiidxaʼ Jiobá. Biʼniʼ Dios ti pactu ne David ne gúdxibe laa qué ziuu dxi gusaana de guni mandar

GUTI si Sansón, bibani ti hombre ndaaniʼ guidxi Israel ni biquiiñeʼ Dios casi profeta ne juez, ne hombre riʼ biree lá Samuel. Cumu rapa ca israelita que gana gácacaʼ casi xcaadxi guidxi que la? ngue runi gúdxicabe Samuel racaláʼdxicabe gápacabe ti rey. Jiobá bidxiichiné laacabe pur ni gunábacabe que, peru biʼniʼ ni nácabe ne gúdxibe Samuel cuí Saúl para gaca rey. Dxi gulibe Saúl naca ti hombre ni qué rudxiibaʼ laca laa, peru gudiʼdiʼ si dxi bichá bi yanni ne maʼ qué nuzuubaʼ stiidxaʼ Dios. Cumu biiyaʼ Jiobá maʼ qué zanda guni mandarbe xquidxi la? gudxi Samuel cuí ti hombrehuiiniʼ ni láʼ David para chuʼ lugar stiʼ Saúl. Peru zadiʼdiʼ stale iza para gácabe rey.

Ti dxi yeganna David ca biʼchiʼ ni nuu lade ca binni nanda guiibaʼ stiʼ Saúl, purtiʼ cadindenecaʼ sti guidxi. Ora yendabe raqué biiyabe ca soldadu que cadxíbicaʼ dede cayaca díticaʼ. Xiñee nuucabe zaqué yaʼ. Purtiʼ bicaalú Goliat, ti hombre ngola ni nuu lade ca binni ridinde stiʼ ca filisteu que ca israelita que ne Dios. Nabé bidxiichi David ne guníʼ zadindené Goliat neca nahuiiniruʼ. David gucuaa guixhe bixeendaʼ o guixhe bizeendaʼ stiʼ ne chupa chonna si guié ne biree para guidxelasaané gigante ni nasoo biaʼ chonna metru que. Goliat biʼniʼ burla David, peru David gudxi laabe zuni ganar purtiʼ zacané Jiobá laa. Ne zaqué gúcani, ne ti guié si biitibe Goliat. Óraque gúxhabe espada stiʼ ne bigabe yanni. Ora biiyaʼ xcaadxi soldadu stiʼ ca filisteu que ni bizaaca que bidxíbicaʼ ne bixooñecaʼ.

Rey Saúl bidxagayaa ora biiyaʼ pabiáʼ nadxibalú David, ngue runi bidiibe laa ti lugar jma risaca lade ca binni nanda guiibaʼ que. Peru ra biiyaʼ rey que nabé runi ganar David ca guendaridinde que biale de ndaaniʼ ladxidóʼ guuti laabe. David gupa xidé bixooñeʼ para gunda bilá. Ne neca gudiʼdiʼ iza de cuxooñelube de Saúl la? qué ñuu dxi nucheenebe laa. Xiñee yaʼ. Purtiʼ nánnabe Jiobá nga gulí Saúl para gaca rey. Despué guti Saúl lu ti guendaridinde. Dxiqueruʼ nga maʼ beeda gaca David rey, casi modo maca guníʼ Jiobá ni.

«Zuzuhuaa dxiicheʼ trono stiʼ Reinu stibe, ne qué ziuu dxi guireeni de ra nuuni.» (2 Samuel 7:13)

David gupa gana nucuí ti yuʼduʼ para Jiobá. Peru Dios gudxi laabe cadi laadibe zúnibe ni, sínuque Salomón tobi de ca xiiñibe nga chigucuí ni. Neca qué ñúnibe ni, biʼniné Jiobá laabe ti pactu: lu pactu que guníʼ Jiobá de lade ca xiiñibe zaree guiráʼ rey ni guni mandar Israel. Ne de laabe zaree ni chigulá ni bizeeteʼ Dios ndaaniʼ jardín ni guyuu Edén que. Binni ca nga Mesías, ni gulí Dios para gaca Rey lu Reinu stiʼ o ti gobiernu ni qué ziuu dxi gusaana de guni mandar.

Para gusihuinni David cudii xquíxepeʼ pur ni gudxi Dios laa que, bicaasaa stale cosa ni zaquiiñeʼ para cuí yuʼduʼ que, casi oro ne plata. Laaca biquiiñeʼ Dios laabe para gucaabe stale salmo o diidxaʼ riuundaʼ para gusisaca Jiobá. Dxi mayaca gati David bisisácabe Jiobá pur guiráʼ ni biʼniʼ ne ca diidxaʼ riʼ: «Espíritu stiʼ Jiobá gudxi naa xi guinieeʼ, ne gudíxhebe stiidxabe lu ludxeʼ» (2 Samuel 23:2).

(Zeedani lu 1 ne 2 Samuel, 1 Crónicas, Isaías 9:7, Mateo 21:9, Lucas 1:32 ne Juan 7:42.)