Biiyaʼ guiraʼ ni nuu lu sitiu riʼ

guyé lu índice

 Ndaa 2

Gulee Dios laacabe ndaaniʼ Paraísu

Gulee Dios laacabe ndaaniʼ Paraísu

Ti ángel ni bicaalú Dios bicaabe Adán ne Eva gucheecaʼ. Dede dxiqué guyuu guendaruchee ne guendaguti

ANTE chuʼ binni guidxilayú, maca bizáʼ Dios ca ángel ni nuu guibáʼ. Tobi de ca ángel que nga beeda gaca Binidxabaʼ o Diablu, ne laa bicaalú Dios ne bisiguii Eva para gó cuananaxhi ni gudxi Dios laa cadi gó que.

Binidxabaʼ biquiiñeʼ ti beendaʼ para guiniʼné Eva, ne bicaabe gunaa que guiníʼ ique cucueeza Dios laa ne xheelaʼ de guicaacaʼ xiixa ni nabé sicarú. Laaca gudxi Binidxabaʼ laabe, qué záticabe pa gócabe cuananaxhi ni gudxi Dios laacabe cadi gócabe que; casi ora niníʼ Binidxabaʼ cusiguii Dios laacabe. Galán modo guníʼ Binidxabaʼ zabánicabe pa qué guzuubacabe stiidxaʼ Dios ne na rabi laacabe ziene chaahuicabe stale cosa ne zanda gúnicabe ni gápacabe gana. Peru cadi dxandíʼ guiráʼ ni guniʼbe que ne ngue nga primé biaje guyuu tu bisiguii lu Guidxilayú. Ni nuu Binidxabaʼ guiníʼ íquecabe nga pa napa Dios derechu de guni mandar guibáʼ ne Guidxilayú, pa jneza guiráʼ ca ley stibe, ne pa caquiiñepeʼ gúnicabe ni nácani.

Biaba Eva lu trampa stiʼ Binidxabaʼ. Ne bizulú guyuulaʼdxiʼ cuananaxhi que dede gudó ni. De raqué bidiibe ni xheelabe ne laa laaca gudó ni. Neca ruluíʼ qué risaca ni bíʼnicabe que, peru zaqué bisihuínnicabe cucaalúcabe Dios ne bicheenécabe laa. Nanna dxíchicabe cadi cuzuubacabe stiidxaʼ Dios ni bizáʼ laacabe, ni bidii laacabe guiráʼ ni nápacabe dede ne guendanabani sin donda stícabe que.

«Ni za de gunaa ca zucaache íqueluʼ ne lii zuninaluʼ xatini ñeebe.» (Génesis 3:15)

Dios guníʼ zusabanáʼ laacabe pur ni bíʼnicabe que. Primeru guniʼbe zuseendabe ti xpínnibe, ti binni ni gueeda de ti gunaa, para gunitilú beendaʼ que o Binidxabaʼ. Despué guniʼbe zati Adán ne Eva, peru bilaseláʼdxibe ca xiiñicaʼ ni chigápacaʼ ne qué ninabe ñuutibe laacaʼ oraqueca. Xi zuni Dios pur laacabe yaʼ. Jiobá guníʼ zuseendaʼ tuuxa para guxhiá guiráʼ ni guizaaca binni pur ni guca ndaaniʼ jardín ni guyuu Edén que. Peru, tuu nga binni ni chigulá ca, ne ximodo gaca ni gudixhe Dios gueeda gúnibe yaʼ. Laga zicá Biblia, chaahuiʼ chaahuiʼ bizulú bihuinni cani.

Despué gulee Dios Adán ne Eva ndaaniʼ Paraísu que. Bireesicabe de raqué bizulú bíʼnicabe dxiiñaʼ nadipaʼ lu layú para gúpacabe ni gócabe. Ca dxi que nga beeda gapa Eva primé xiiñiʼ ni biree lá Caín. Despué gúpacabe jma xiiñicabe, hombre ne gunaa, ne ládecaʼ zeeda Abel ne Set, bixhozegola Noé.

(Zeedani lu capítulo 3 dede 5 stiʼ Génesis ne Apocalipsis 12:9.)