Biiyaʼ guiraʼ ni nuu lu sitiu riʼ

guyé lu índice

 Ndaa 8

Gucuaa ca israelita guidxi Canaán

Gucuaa ca israelita guidxi Canaán

Josué gucané ca israelita que guicaacaʼ guidxi Canaán. Jiobá gudixhe chuʼ juez para gulá xquidxi de lu náʼ ca xhenemígucaʼ

GAYUAA iza ante chuʼ ca israelita que ndaaniʼ guidxi Canaán, maca gudxi Jiobá Abrahán zudiibe guidxi que ca xiiñiʼ. Yanna maʼ cabezasícabe ora gabi Josué laacabe maʼ zanda guicaacabe layú ni guníʼ Dios gudii laacabe que.

Dios guníʼ naquiiñeʼ guinitilú ca binni de Canaán purtiʼ nabé malu laacaʼ: biiticaʼ binni ne bíʼnicaʼ stale cosa dxabaʼ. Ngue runi, gúdxibe ca israelita que xi naquiiñeʼ gúnicaʼ para gunduuxecaʼ guiráʼ ca binni ni nabeza ndaaniʼ ca guidxi ni nuu Canaán que.

Peru ante chúʼcabe ndaaniʼ guidxi que, biseendaʼ Josué chupa hombre para chiguuyaʼ ximodo nuu guidxi que. Ca hombre que guyuucaʼ ndaaniʼ guidxi Jericó ne biaanacaʼ ralidxi ti gunaa láʼ Rahab. Neca nánnabe israelita ca hombre que, peru bidiibe lugar gucaachilucaʼ ralídxibe. Xiñee yaʼ. Purtiʼ maʼ binadiágabe guiráʼ milagru biʼniʼ Jiobá para bilá xquidxi, ngue runi laaca maʼ nápabe fe Dios. Rahab gunabaʼ ca hombre que gudii stiidxacaʼ zulacaʼ laabe ne binnilídxibe ora gunduuxecaʼ guidxi que.

Gudiʼdiʼ si dxi, guyuu ca israelita que Canaán ne bicaalucaʼ guidxi Jericó. Bisaba Jiobá ca lindaa stiʼ guidxi que ne ca binni ridinde stiʼ Israel binduuxecaʼ ni, peru bilá Rahab ne binnilidxi. Zaqué nga bizulú Josué ne ca binni nanda guiibaʼ stiʼ gudindenecaʼ ca guidxi que xhoopaʼ iza para gunda gucuaacaʼ stale de ca layú ni guníʼ Dios chigudii laacaʼ que. Despué gulaa ca layú biʼniʼ ganárcabe que lu ca tribu stiʼ Israel.

Dxi mayaca guiluxe Josué dxiiñaʼ bidii Dios laa, bitagulisaa guidubi naca guidxi que. Ne bisietenaláʼdxibe laacaʼ guiráʼ ni biʼniʼ Jiobá pur ca bixhozególacaʼ ne guluube gana laacaʼ para cadi gusaana de gúnicaʼ ni na Dios. Peru guti si Josué ne ca xcompañeru, bisaana ca israelita que Jiobá ne bizulú biʼniʼ adorarcaʼ xcaadxi dios ni cadi naquiiñeʼ ñuni adorarcaʼ. Lu xhonna gayuaa iza despué de guti Josué ne ca xcompañeru, stale biaje qué ñuni ca israelita que ni na ca ley bidii Dios laacaʼ. Ne ora qué ruzuubacabe diidxaʼ, Jiobá rudii lugar guquiichináʼ ca filisteu ne xcaadxi xhenemígucabe laacabe. Peru cada guinábacaʼ gacané Jiobá laacaʼ la? ribibe ti juez para gulá laacaʼ. Biaʼsi doce juez nga biquiiñeʼ Jiobá para bilá laacabe.

Libru stiʼ Jueces ruzeeteʼ primé juez gúpacabe nga Otniel ne últimu juez gúpacabe nga Sansón, ti hombre jma nadipaʼ ne qué huayuuruʼ stobi casi laa. Guiráʼ cani ruzeeteʼ libru stiʼ Jueces ni bizaaca dxiqué rusiidicani laanu ti cosa nabé risaca: pa guzúʼbanu stiidxaʼ Jiobá zacaanu stale ndaayaʼ, peru pa coʼ la? zápanu stale yuubaʼ.

(Zeedani lu libru stiʼ Josué, Jueces ne Levítico 18:24, 25.)