Biiyaʼ guiraʼ ni nuu lu sitiu riʼ

guyé lu índice

 Ndaa 12

Ca conseju stiʼ Dios racanécani laanu lu xquendanabáninu

Ca conseju stiʼ Dios racanécani laanu lu xquendanabáninu

Salomón nga bicaa stale de ca conseju ni zeeda lu libru stiʼ Proverbios ne zanda gacanécani binni purtiʼ zeedacani de Dios

ÑEE jneza nga guzúʼbanu stiidxaʼ Jiobá la? Para gánnanu ni, naquiiñeʼ guidúʼndanu ca conseju ni zeeda lu Stiidxabe. Ñee dxandíʼ racanécani binni la? Ñee zacanécani laanu guibáninu galán la? Lu libru stiʼ Proverbios, bicaa rey Salomón gayuaa de ca conseju ni zanda gacané binni lu stale de cani guni lu xquendanabani. Guidúʼyanu chupa chonna de laacani.

Chuʼnu gaxha de Dios. Para ganda chuʼnu gaxha de Jiobá, caquiiñeʼ guni crenu zanda gacanebe laanu. Salomón guníʼ: «Gulaʼquiʼ guidubi ladxidoʼloʼ lu naʼ Jiobá, ne cadi gúniluʼ ni na si xpiaaniluʼ. Lu guiráʼ ni gúniluʼ guníʼ ique laabe, ne laabe zúnibe ca neza stiluʼ derechu» (Proverbios 3:5, 6). Ximodo rusihuínninu riguíxhenu ladxidoʼno lu naʼ Jiobá yaʼ. Ra gudiʼnu lugar gábibe laanu xi gúninu ne gúninu ni na ca mandatu stibe. Pa gúninu zacá la? zusiéchenu ladxidóʼ Bixhózenu ni nuu guibáʼ ne zusihuínninu nabé rusiguii Binidxabaʼ (Proverbios 27:11).

Binnilidxi binni ne ca xhamigu. Ca dxi riʼ nga jma caquiiñeʼ chinanda ca familia ca conseju stiʼ Dios. Ca hombre ni maʼ bichaganáʼ cayabi Dios laacaʼ: «Biechené xheelaluʼ ni bichaganaluʼ dxi nahuiiniluʼ», ca diidxaʼ ca cusihuínnicani cadi naquiiñeʼ gucheené hombre xheelaʼ (Proverbios 5:18-20). Lu capítulo 31 stiʼ Proverbios cayeeteʼ ti ejemplu sicarú ni zanda chinanda ca gunaa ni maʼ bichaganáʼ ti guni respetar ne gusisaca xheelacaʼ ne ca xiiñicaʼ laacaʼ. Ne ni naquiiñeʼ guni xiiñiʼ binni nga guzuubaʼ stiidxaʼ bixhoze ne jñaa (Proverbios 6:20). Libru riʼ laaca cuzeeteʼ nabé galán gapa binni xhamigu, ne cayábini laanu zácanu casi cani ruyubi puru para laasi pa guixélenu de binni (Proverbios 18:1). Yanna, neca risaca nga gapa binni xhamigu la? naquiiñeʼ guʼyaʼ tu zanda guidxaaga pacaa zucaacabe laa guni xiixa ni cadi jneza (Proverbios 13:20; 17:17).

Modo gápanu xquendanabáninu. Lu libru stiʼ Proverbios zeeda stale conseju ni zanda gacané laanu chuʼnu nazaaca ne cueenu de ndaaniʼ íquenu xiixa ni qué zacané laanu. Laaca cuzeeteni cadi naquiiñeʼ xhúdxinu, guiníʼ íquenu cosa ni zacané laanu ne gácanu ti binni runi dxiiñaʼ (Proverbios 6:6; 14:30; 20:1). Ne laaca cayábini laanu xi guiráʼ guendananá zápanu pa chinándanu ca binni ni riníʼ ique gadxé de cani rusiidiʼ Stiidxaʼ Dios (Proverbios 14:12). Laaca cayábini laanu caquiiñeʼ gápanu ladxidoʼno o modo laanu, «purtiʼ de laani nga zeeda guendanabani» (Proverbios 4:23).

Millón de binni huayacané ca conseju riʼ laacaʼ guibánicaʼ galán, ne maʼ bidiicaʼ cuenta gástiruʼ sti cosa jma galán que guzuubacaʼ stiidxaʼ Jiobá.

(Zeedani lu libru stiʼ Proverbios.)