Biiyaʼ guiraʼ ni nuu lu sitiu riʼ

guyé lu índice

 Ndaa 4

Biʼniʼ Dios ti pactu ne Abrahán

Biʼniʼ Dios ti pactu ne Abrahán

Abrahán bizuubaʼ stiidxaʼ Dios. Pur fe gúpabe, guníʼ Jiobá zaguu ndaayaʼ laabe ne zutale ca xiiñibe

GUDIʼDIʼ si biaʼ chonna gayuaa cincuenta iza de biaba Nisaguié naroʼbaʼ que, bibani ti hombre láʼ Abrahán ndaaniʼ ti guidxi láʼ Ur. Ca binni de guidxi que nabé gúpacaʼ bidxichi, ne ra guyuu ni nga nuu guidxi Irak yanna. Abrahán nabé gupa fe Dios, peru gudíʼdibe lu guendanagana ni bicaa laabe gusihuínnibe pabiáʼ naguidxi fe stibe. Guidúʼyanu xi bizaaca.

Jiobá gudxi laabe gusaanabe xquídxibe ne chindézabe sti guidxi: Canaán. Bizuubabe diidxaʼ sin niníʼ íquebe ni chupa biaje. Yenebe xheelabe Sara, sobrínube Lot ne guiráʼ ca binni nuu ndaaniʼ lídxibe. Guzácabe zitu dede yendácabe Canaán. Dxi yendácabe raqué, bibánicabe cheríʼ chericaʼ ndaaniʼ yoo de lari. Biʼniʼ Jiobá ti pactu ne Abrahán ne guniʼbe pur laa zaguu ndaayabe guiráʼ ca familia ni nuu lu Guidxilayú riʼ. Ne laaca gúdxibe laa zadale ca xiiñiʼ dede gueeda gácacaʼ ti guidxi roʼ ne zudiibe laacaʼ guidxi Canaán.

Beeda gapa Abrahán ne Lot stale dendxuʼ ne yuze. Abrahán guca nachaʼhuiʼ ne Lot, ngue runi bidiibe lugar gulí ti layú ni jma guyuulaʼdxiʼ para ca maniʼ stiʼ. Lot gulí cheʼ gaxha de guiiguʼ Jordán, purtiʼ nabé nápani guixi, ne gulézabe gaxha de guidxi Sodoma. Peru ca binni que nabé bíʼnicaʼ stale cosa ni qué iquiiñeʼ ne pur guiráʼ ngue bichiichicabe Jiobá.

Bixeleʼ si Abrahán de Lot, Jiobá gudxi Abrahán zapa stale xiiñiʼ casi ca beleguí ni nuu guibáʼ. Abrahán gupa fe Jiobá, peru xheelabe Sara qué huayanda gaca xiiñiʼ. Dxi maʼ nápabe 99 iza ne Sara napa biaʼ 90 iza, gudxi Dios laabe zápacabe ti xiiñicabe. Ne zaqué guca ni: Sara gupa ti baʼduhuiiniʼ ne gulee lácabe laa Isaac. Neca gúparuʼ Abrahán xcaadxi xiiñiʼ la? peru de Isaac nga gueeda ni chigulá ni bizeeteʼ Dios ndaaniʼ jardín ni guyuu Edén que.

Yanna xi gúcaxa de Lot yaʼ. Biaʼ tiempu bibánibe ndaaniʼ guidxi Sodoma, qué ñúnibe guiráʼ ca guendaquéiquiiñeʼ biʼniʼ ca binni que, purtiʼ gúcabe ti binni nachaʼhuiʼ. Ngue runi dxi gudixhe ique Jiobá gunitilú guidxi Sodoma, primeru biseendaʼ chupa ángel chitidxi Lot xi chigaca. Ca ángel que gúdxicaʼ laabe guxooñenebe binnilídxibe de guidxi que, ne cadi naquiiñeʼ gudxiguetalú nin tobi de laacabe. Óraque bisaba Dios gui ne azufre de guibáʼ ne binitilú guiráʼ ca binni malu de guidxi Sodoma ne ca binni de guidxi Gomorra. Lot ne guiropaʼ xiiñiʼ bilacaʼ. Peru xheelabe bidxiguetalú, zándaca cayá ca cosa ni bisaana ndaaniʼ guidxi que. Cumu qué nuzuubabe diidxaʼ la? gútibe.

(Zeedani lu Génesis 11:10–19:38.)