Biiyaʼ guiraʼ ni nuu lu sitiu riʼ

guyé lu índice

 Ndaa 25

Ca carta ni caníʼ de fe, xpiaʼ binni ne de guendarannaxhii

Ca carta ni caníʼ de fe, xpiaʼ binni ne de guendarannaxhii

Santiagu, Pedru, Juan ne Judas bicaacaʼ caadxi carta para uguucaʼ gana ca xpinni Cristu

SANTIAGU ne Judas biʼchiʼ Jesús laacaʼ, ne Pedru ne Juan apóstol stibe laacaʼ. Guidápacabe bicaacabe gadxe carta ni zeeda lu Stiidxaʼ Dios ni gucuá lu diidxaʼ griegu, cada carta ca ziné lá tu bicaani. Bicaacabe cani para gacanécabe ca xpinni Cristu ti cadi gucheenecaʼ Dios ne cadi gusaana de guyúbicaʼ Reinu stiʼ Dios.

Gusihuínninu nápanu fe. Cadi caquiiñeʼ si guininu nápanu fe, sínuque caquiiñeʼ gusihuínninu dxandíʼ nápanu ni. Santiagu guníʼ: «Qué iquiiñeʼ modo runi cre nu pa qué guni nu jneza» (Santiago 2:26). Cani gusihuinni napa fe ora gudxiilú guendanagana la? jma naguidxi raca fe sticaʼ. Laaca zanda guinábacaʼ gudii Dios laacaʼ guendabiaaniʼ ne galán guni crecaʼ zudiibe ni laacaʼ. Pa guzuubaluʼ stiidxaʼ Jiobá la? ziuuláʼdxibe cani gúniluʼ (Santiago 1:2-6, 12). Dios racané ca binni ni gusihuinni ruzuubaʼ stiidxabe ne qué rucheené laabe. Nga runi Santiagu guníʼ: «Laidxiña gaxha de Dios, ne laa zadxiña gaxha de laatu» (Santiago 4:8).

Ca xpinni Cristu naquiiñeʼ guyúbicaʼ modo gaca fe sticaʼ naguidxi, ti ganda gucaanacaʼ intiica cosa dxabaʼ uquiinde laacaʼ gúnicaʼ ne cadi gudiicaʼ lugar chuʼ tuuxa gucaa laacaʼ gúnicaʼ xiixa ni cadi jneza. Judas bibani lade binni ni riuulaʼdxiʼ guni ni cadi jneza, ngue runi guníʼ: «Cadi idxibi tu ucaa lú tu cani na cadi jneza modo runi cre tu Cristu» (Judas 3).

Naquiiñeʼ gápanu xpiaʼnu nayá. Jiobá rinabaʼ gaca guiráʼ ca xpinni nayá lu guiráʼ xixé ni gúnicaʼ. Pedru bicaa: «Laaca lagaca nayá lu guiráʼ ni gúnitu, purtiʼ cá: “Naa naca nayaguieʼ, zacaca laatu naquiiñeʼ gácatu nayaguieʼ”» (1 Pedro 1:15, 16NM). Ni zacané ca xpinni Dios gácacaʼ nayá nga chinándacaʼ ejemplu stiʼ Cristu, purtiʼ laa nga gudixhe ti ejemplu ni zanda chinándanu, casi na apóstol ca (1 Pedro 2:21). Neca ziuu ora zaca nagana para laanu guzúʼbanu stiidxaʼ Dios, peru ni jma risaca nga gápanu xquendabiaaninu o ladxidoʼno nayá (1 Pedro 3:16, 17). Pedru bizeeteʼ naquiiñeʼ gaca xpiaʼ ca xpinni Cristu nayá, ne pur ni gúnicaʼ gusihuínnicaʼ runi adorarcaʼ Dios laga cabézacaʼ guedandá dxi cuidxi Dios cuenta binni, ne gueeda guidxilayú cubi ni chigudiibe laanu ra qué ziuu «enda nadxabaʼ» (2 Pedro 3:11-13).

«Laidxiña gaxha de Dios, ne laa zadxiña gaxha de laatu.» (Santiago 4:8)

Gusihuínninu nadxiisaanu. Apóstol Juan guníʼ: «De Dios nga reeda enda ranaxhii». Jiobá bisihuinni nabé nadxii laanu ra biseendaʼ Xiiñiʼ para gudii xquendanabani ti quixe «irá ni huachéʼ né nu laabe». Xi naquiiñeʼ gucaa ni bíʼnibe ca laanu gúninu yaʼ. Juan bisiene: «Hermanu ni nadxiee caʼ, pa nadxii Dios laanu biaʼ cá la? laca naquiiñe ganaxhii saa nu» (1 Juan 4:8-11). Ti modo zanda gusihuínninu nadxiinu ca xpinni Cristu nga guidxaagalunu laacaʼ ralídxinu (3 Juan 5-8).

Yanna, ximodo rusihuinni ca xpinni Cristu nadxiicaʼ Jiobá yaʼ. Apóstol Juan cayabi laanu: «Sicarí nga ganaxhii nu Dios: guni nu ni na. Ne cadi nagana ni na be guni nu» (1 Juan 5:3; 2 Juan 6). Cani guzuubaʼ stiidxaʼ Dios nanna dxíchicaʼ qué zusaana Dios de gannaxhii laacaʼ «laga cabeza[caʼ] enda nabani ni qué zaluxe» (Judas 21).

(Zeedani lu Santiago, 1 ne 2 Pedro, 1, 2 ne 3 Juan ne Judas.)