Biiyaʼ guiraʼ ni nuu lu sitiu riʼ

guyé lu índice

 Ndaa 21

Biasa Jesús de lade gueʼtuʼ

Biasa Jesús de lade gueʼtuʼ

Bihuinni Jesús nezalú ca discípulo stiʼ para uguube gana laacaʼ ne gudiibe laacaʼ ti dxiiñaʼ nacubi gúnicaʼ

LU CHONNA gubidxa de guti Cristu, guyé caadxi de ca gunaa ni naca xpínnibe ra baʼ stibe ne ora yendacaʼ maʼ zuxaleʼ ni. Guyuu tuuxa gulee guié ni nuchii ruaa baʼ que ne maʼ guirutiʼ nuu ndaaniʼ ni.

Óraque bihuinni chupa ángel nezalúcabe. Tobi de ca ángel que gudxi laacabe: «Nanna cuyubi tu Jesús de Nazaret [...], peru ma bibani be» (Marcos 16:6). Oraqueca biree ca gunaa que yetidxiguxooñeʼ cani ca apóstol que. Neza zécabe bidxaagacabe Jesús ne gudxi laacabe: «Cadi idxibi tu. Laché, lachitidxi ca biche che ca Galilea ne raqué guʼya ca naa» (Mateo 28:10).

Despué biree chupa de ca discípulo stibe de Jerusalén zecaʼ Emaús, málasi bidxiña ti binni ni qué runibiáʼcabe ra nuucabe ne gunabadiidxaʼ laacabe xidé zeedaníʼcabe. Jesús peʼ ngue bidxiña ra nuucabe, peru qué ñunibiáʼcabe laa purtiʼ gadxé modo bihuinni nezalúcabe. Bihuinni nuucabe triste pur modo guníʼcabe ora gúdxicabe hombre que zeedaníʼcabe de Maestru stícabe. Hombre que bizulú bisiene laacabe guiráʼ ni cuzeeteʼ Xquiʼchiʼ Dios de Mesías que. Zanda guininu biʼniʼ Jesús guiráʼ ni guníʼ ca profeta que de laa. * Ora bidiidacabe cuenta caniʼnécabe Cristu la? binitilú, purtiʼ ca dxi que maʼ espíritu laa.

Oraqueca bibiguetaʼ guiropaʼ discípulo que Jerusalén ne guyecaʼ ra nuu xcaadxi apóstol que, laacaʼ nuucaʼ ndaaniʼ ti yoo ni daʼguʼ dxiichiʼ puertaʼ stiʼ. Laga caníʼcabe ni bizaacacabe que, guiráʼ cani nuu raqué bidxagayaacaʼ ora bíʼyacaʼ bihuinni Jesús nezalucaʼ sti biaje. Óraque gunabadiidxabe laacaʼ: «Xiñee cadi cayuni cre tu». Ne nabe: «Zacá nga cá ni, napa Cristu xidé gatiʼ ne ibani ra guionna gubidxa» (Lucas 24:38, 46).

Pur cuarenta dxi guyuu tu biʼyaʼ laabe stale biaje. Ti biaje biiyaʼ jma de gaayuʼ gayuaa binni laabe. Zándaca dxi que nga bidiibe ca xpínnibe ti dxiiñaʼ nabé risaca: «Laché irá xixé guidxi, lachiusiidi irá xixé binni sa nanda naa, [...] lausiidi laaca guni ca irá ni ma gudxe laatu, ne ganna ca tu qué ziuu dxi ixele de laatu dede dxi iluxe guidxilayú» (Mateo 28:19, 20).

Últimu biaje bidagulisaanebe ca once apóstol ni qué nusaana de ñuni ni nabe, gúdxibe laacaʼ: «Ora ma ucuaa tu Espíritu Santu la? zapa pe tu enda nandxóʼ sti Dios, ne óraque ma zanda iree tu, chi güi tu stiidxa [...] idubi naca guidxilayú» (Hechos 1:8). Óraque bizulú biásabe zebe guibáʼ ne bichii ti za laabe ne maʼ qué ñuuyacabe laabe.

(Zeedani lu capítulo 28 stiʼ Mateo, capítulo 16 stiʼ Marcos, capítulo 24 stiʼ Lucas, capítulo 20 ne 21 stiʼ Juan ne 1 Corintios 15:5, 6.)

^ párrafo 6 Zánnaluʼ de xcaadxi diidxaʼ riguixhená ni caníʼ de Mesías ne ximodo bizaaca cani luguiáʼ Jesús ra gúʼndaluʼ ca yaza 17 dede 19 stiʼ folletu riʼ, ne ca yaza 199 dede 201 stiʼ libru Xipeʼ ndiʼ cusiidiʼ Biblia.