Biiyaʼ guiraʼ ni nuu lu sitiu riʼ

guyé lu índice

 NDAA 13

Xi rusiidiʼ Biblia zazaaca religión

Xi rusiidiʼ Biblia zazaaca religión

1. Ñee jneza ni rusiidiʼ guiráʼ religión la?

Ndaaniʼ guiráʼ religión nuu binni nachaʼhuiʼ ne ni nayá ladxidóʼ. Galán nga gánnanu rusisaca Dios ca binni riʼ ne rizaaláʼdxibe laacaʼ. Triste guininu ni, peru stale binni riquiiñeʼ religión para gúnicaʼ stale guendaquéiquiiñeʼ (2 Corintios 4:3, 4; 11:13-15). Lu noticia huayunadiáganu nuu stale religión riuucaʼ lu guendaridinde, riuucaʼ lade ca terrorista, ruuticaʼ grupu de binni, ne stale de ca xaíque sticaʼ rilaxoo cani nahuiiniʼ. ¡Nabé huayuniná ca cosa ca binni ni nayá ladxidóʼ! Biindaʼ Mateo 24:3-5, 11, 12.

Religión ni rusiidiʼ ni dxandíʼ rusisácani Jiobá, peru religión ni qué rusiidiʼ ni dxandíʼ ruchiichi ni laabe. Ne puru si ni cadi dxandíʼ rusiidiʼ ni de Dios, de ca gueʼtuʼ, ne xcaadxi cosa ni qué rieeteʼ lu Biblia. Peru Jiobá racalaʼdxiʼ ganna binni gunáʼ nga ni dxandíʼ de laa. Biindaʼ Ezequiel 18:4 ne 1 Timoteo 2:3-5.

2. Xi rusiidiʼ Biblia zazaaca religión

Ca religión ca qué zanda quítecaʼ Jiobá ora riniʼcaʼ nadxiicaʼ laabe, purtiʼ rihuinni dxichica jma nadxiicaʼ guidxilayú stiʼ Binnidxabaʼ (Santiago 4:4). Biblia ribeelá ca religión ni qué rusiidiʼ ni dxandíʼ «Babilonia, guidxi roʼ», lá ca zeeda ni de ti guidxi ni guyuu dxiqué ra biasastí religión ni qué rusiidiʼ ni dxandíʼ gudiʼdiʼ siʼ Nisaguié Naroʼbaʼ ni biaba dxi bibani Noé. Qué zandaa, málasi zunitilú Dios guiráʼ ca religión ni caguite binni ne cayuniná laacaʼ. Biindaʼ Apocalipsis 17:1, 2, 5, 16, 17 ne 18:8.

Jiobá nanna nuu binni nachaʼhuiʼ ndaaniʼ ca religión ni qué rusiidiʼ ni dxandíʼ ni nuu lu Guidxilayú ne cutagulisaabe laacaʼ. Ximodo cayúnibe ni yaʼ. Cayúnibe ni ra cusiidibe laacaʼ ni dxandíʼ. Biindaʼ Juan 6:45.

 3. Xi naquiiñeʼ guni binni ni nayá ladxidóʼ

Religión ni rusiidiʼ ni dxandíʼ racaneni binni chuʼ tobi si

Jiobá rizaalaʼdxiʼ ca binni ni riuulaʼdxiʼ ganna ni dxandíʼ ne riuulaʼdxiʼ guni ni jneza. Nga runi riguube gana laacaʼ gusaanacaʼ religión ni qué rusiidiʼ ni dxandíʼ. Pa dxandíʼ nadxiicabe laabe, zuchaacabe modo nabánicabe para gusiéchecabe laabe. Biindaʼ Apocalipsis 18:4.

Lu primé siglu que, ca binni ni nayá ladxidóʼ, bicaadiágacaʼ né stale guendanayecheʼ ni bisiidiʼ ca apóstol que laacaʼ. Zaqué nga bisiidiʼ Jiobá laacabe modo guibánicabe jma nayecheʼ purtiʼ maʼ nánnacabe xi pur nabánicabe, ne biénecabe zúnibe guiráʼ ni maʼ guniʼbe. Laanu laaca naquiiñeʼ gusihuínninu cayúninu cani maʼ bizíʼdinu lu Stiidxaʼ Dios ra gúninu ni na Jiobá primé lu xquendanabáninu. Biindaʼ 1 Tesalonicenses 1:8, 9 ne 2:13.

Né stale guendanayecheʼ ricaa Jiobá ca binni ni rusaana religión ni qué rusiidiʼ ni dxandíʼ ne ruyúbicaʼ religión ni rusiidiʼ ni dxandíʼ. Ca binni ca raca xhamigu Jiobá laacabe, rannaxhii guiráʼ ca xpinni Cristu ni nuu lu guidubi naca Guidxilayú laacabe ne zanda guibánicabe sin qué chuʼ dxi gáticabe. Ñuuláʼdxiluʼ nicaaluʼ ca ndaayaʼ ca la? Biindaʼ Marcos 10:29, 30 ne 2 Corintios 6:17, 18.

4. Xi zuni Dios para guibani binni nayecheʼ ne chuʼcaʼ tobi si lu guidubi naca Guidxilayú

Ora gunduuxeʼ Jiobá ca religión ni qué rusiidiʼ ni dxandíʼ ca, dxicá nga zaguixhedxibe ladxidóʼ binni guidxilayú. Maʼ qué zaguite ca religión ca binni nin ca maʼ qué zutíndeni laacaʼ. Guiráʼ xixé binni guidxilayú zuni adorarcaʼ tobi lucha Dios ni dxandíʼ. Ñee cadi sicarú ca diidxaʼ ca la? Biindaʼ Apocalipsis 18:20, 21 ne 21:3, 4.