Biiyaʼ guiraʼ ni nuu lu sitiu riʼ

guyé lu índice

 NDAA 2

Tuu nga Dios

Tuu nga Dios

1. Xiñee naquiiñeʼ guni adorarnu Dios

Dios nga bizáʼ guiráʼ xixé cosa ni nuu. Qué ñuu ra nuzulú xquendanabánibe nin ra guilúxeni (Salmo 90:2). De laabe nga zeeda ca diidxaʼ sicarú ni cá lu Biblia (1 Timoteo 1:11). Cumu laabe bidiibe laanu guendanabani la? laasibe nga naquiiñeʼ guni adorarnu ne gúninu ni nabe. Biindaʼ Apocalipsis 4:11.

2. Ximodo nga Dios

Nin ti binni qué huayuu dxi guʼyaʼ Dios purtiʼ espíritu laa, ne jma risácabe que laanu purtiʼ de beelaʼ laanu (Juan 1:18; 4:24). Peru tobi de ca modo ni zacané laanu gunibiaʼnu Dios nga guidúʼyanu cani bizaʼbe. Guiráʼ xixé cuananaxhi ne guiráʼ guiéʼ sicarú ni bizaʼbe rusihuínnicani pabiáʼ nadxiibe laanu ne pabiáʼ nuu xpiaanibe. Ne pur modo naroʼbaʼ guibaʼ ne Guidxilayú rihuinni pabiáʼ naroʼbaʼ poder nápabe. Biindaʼ Romanos 1:20.

Sti modo zanda gunibiaʼnu Dios nga guidúʼndanu Biblia. Luni rieeteʼ ximodo laabe ne xi rúnibe pur binni, xi riuuláʼdxibe, xi qué riuuláʼdxibe, ne xi rúnibe ora gucheené binni laabe. Biindaʼ Salmo 103:7-10.

3. Ñee napa Dios ti lá la?

Jesús guníʼ: «Bixhozeʼ, bisisaca lá lu jma» (Juan 12:28). Nga runi, neca riquiiñeʼ binni stale título para guiníʼ lá Dios la? peru nápabe ti labe. Ne lu stale diidxaʼ gadxé gadxé modo riníʼcabe ni. Casi lu didxazá la? riníʼcabe ni Jiobá, peru laaca nuu tu riniʼni Yavé. Biindaʼ Salmo 83:18 (nuu Biblia zeeda ni lu 82:19).

Lu stale Biblia huachaacabe lá Jiobá ne rucaacabe ni Dios o Señor. Peru lu primé diidxaʼ gucuá Biblia, biquiiñecabe  lá Dios biaʼ gadxe mil biaje. Dxi bisiidiʼ Jesús binni de Dios nabé biquiiñeʼ labe. Biindaʼ Juan 17:26TNM.

Biiyaʼ videu ni láʼ Ñee napa Dios lá la?

4. Ñee rizaalaʼdxiʼ Dios laanu la?

Cásica nadxii hombre riʼ xiiñiʼ, Dios laaca nadxii laanu ne racalaʼdxiʼ guibáninu galán despué

Pa dxandíʼ nadxii Jiobá laanu, xiñee rudiibe lugar chuʼ stale guendananá yaʼ. Nuu tu laa na runinabe laanu para gúʼyabe pabiaʼtiʼ zuni huantarnu. Peru cadi dxandíʼ diʼ nga. Biindaʼ Santiago 1:13.

Jiobá rudii lugar laanu cuinu xi gúninu lu xquendanabáninu. Nga runi ni jma jneza gúninu nga quixhe íquenu gúninu ni nabe (Josué 24:15). Peru nuu stale binni runi cosa malu purtiʼ si zanda guni ni, ne pur nga nuu stale cosa ni cayuniná binni. Nga runi, riuu Jiobá triste ora guʼyaʼ cayaca ni cadi jneza. Biindaʼ Génesis 6:5, 6.

Cumu nadxii Jiobá laanu ne racaláʼdxibe guibáninu galán la? mayaca cueebe guiráʼ yuubaʼ ne guiráʼ guendaquéiquiiñeʼ ni nuu. Ne laabe nánnabe xiñee cudiibe lugar tiidiʼ binni yuubaʼ. Ndaa 8 stiʼ folletu riʼ zusiene caadxi de laacani. Biindaʼ 2 Pedro 2:9 ne 3:7, 13.

5. Ximodo zanda guidxíñanu Dios

Jiobá cayabi laanu zanda guidxíñanu ra nuu ora guni orarnu laa. Laabe rizaaláʼdxiibe cada tobi de laanu (1 Juan 5:14). Ne laaca nuube listu para gutiidiláʼdxibe stóndanu ne rudiibe cuenta ora rúninu stipa pur gúninu ni nabe, neca nuu tiru qué randa rúninu ni. Nga runi, neca binni ruchee laanu zanda gaca xhamígunu laabe. Biindaʼ Salmo 103:12-14 ne Santiago 4:8.

Cumu Jiobá nga bidii laanu guendanabani la? laasibe nga jma naquiiñeʼ gannaxhinu (Marcos 12:30). Ora rizíʼdinu de Dios ne ruzúʼbanu stiidxabe, rusihuínninu nadxiinu laabe. Pa gúninu zacá, jma zaca xhamígunu laabe. Biindaʼ 1 Timoteo 2:3, 4 ne 1 Juan 5:3.