Biiyaʼ guiraʼ ni nuu lu sitiu riʼ

guyé lu índice

 NDAA 6

Ñee zadxiña dxi guiasa gueʼtuʼ la?

Ñee zadxiña dxi guiasa gueʼtuʼ la?

1. Ñee ziuu dxi guiasa gueʼtu la?

Dxi nuu Jesús lu Guidxilayú riʼ, guti Lázaro xhamígube. Lázaro guleza Betania, ti guidxi huiiniʼ nuu gaxha de Jerusalén. Ora yendá Jesús mápeca tapa gubidxa de gútibe. Marta ne María, ca bizaʼnaʼ gueʼtuʼ que, yenecaʼ Jesús ra gaʼchiʼ Lázaro ne nin qué nindaa gurízisi binni raqué. Ñee ruxuíʼluluʼ pabiáʼ nayecheʼ guyuu Marta ne María ora gundisaʼ Jesús bizáʼnacaʼ de lade gueʼtuʼ la? Biindaʼ Juan 11:21-24, 38-44.

Lade ca diidxaʼ sicarú ni zeeda lu Biblia nga rieeteʼ ziasa binni ni maʼ guti. Marta maca nanna naguixhe ique Jiobá guindisaʼ ca binni ni maʼ guti para guibánicaʼ sti biaje lu Guidxilayú. Biindaʼ Job 14:14, 15.

2. Ximodo nuu ca binni ni maʼ guti

Dios gudxi Adán: «Yu dé lii ne yu dé ca zabiguétaluʼ» (GÉNESIS 3:19)

Guiranu guyanu de «yu stiʼ guidxilayú» (Génesis 2:7; 3:19). Cadi nácadinu ti espíritu ni nuu lu ti cuerpu de beela. Cumu de yu guyanu la? qué ribánidinu despué de gátinu. Ora rati yuba ique binni, rixiá guirá ni riníʼ ique. Ca gueʼtuʼ ca maʼ qué runi sentircaʼ gastiʼ ne maʼ qué racanacaʼ. Nga runi, qué niníʼ Lázaro pa guyé paxaraa ora biasa de lade gueʼtuʼ. Biindaʼ Eclesiastés 9:5, 6, 10.

Nuu binni runi cré napa Dios ti lugar ra runi castigar binni lu guí ora gati, peru cadi dxandíʼ nga, casi maʼ bidúʼyanu, qué ganna diʼ ca gueʼtuʼ ca gastiʼ. Nga runi, cadi dxandíʼ diʼ nga ni rusiidiʼ binni ora riníʼ raca castigar binni malu  ora rati. Ni rusiidicabe ca rusihuínnini malu Dios, peru laabe qué riuuláʼdxibe guni crenu ruzaaquibe binni. Biindaʼ Jeremías 7:31.

Biiyaʼ videu ni láʼ ¿Ximodo nuu ca binni ni maʼ guti?

3. Ñee zanda guinínenu ca binni ni maʼ guti la?

Ca gueʼtuʼ ca qué runadiágacaʼ ne qué riniʼcaʼ (Salmo 115:17). Peru nuu caadxiʼ ángel malu randa riníʼnecaʼ binni ne rúnicaʼ casi ora laacaʼ nga ca binni ni maʼ guti (Judas 9). Nga runi, ribixhilaʼdxiʼ Jiobá ora guyúbinu guinínenu ca gueʼtuʼ ca. Biindaʼ Deuteronomio 18:10, 11.

4. Tuu nga ca binni ni chiguiasa de lade gueʼtuʼ

Millón de binni ni nuu ndaaniʼ ca baʼ ca zabánicaʼ sti biaje lu Guidxilayú riʼ, dede né ca binni ni qué ñunibiáʼ ca ley stiʼ Dios ne pur ngue bíʼnicaʼ cosa malu. Biindaʼ Hechos 24:15.

Ca binni ni guiasa dxi ca zanda guiziidicaʼ de Dios ne gusihuínnicaʼ nápacaʼ fe Jesús ra guzuubacaʼ diidxaʼ (Apocalipsis 20:11-13). Pa gúnicabe ni jneza zabánicabe nayecheʼ ndaaniʼ Guidxilayú riʼ sin qué chuʼ dxi gáticabe. Biindaʼ Juan 5:28, 29.

5. Xi rizíʼdinu de Jiobá ora gánnanu ziasa gueʼtuʼ

Dios biseendaʼ Xiiñiʼ para gudii xquendanabani pur laanu ne pur laani zanda guiasa binni de lade gueʼtuʼ. Ra biʼniʼ Jiobá zacá bisihuínnibe nadxiibe binni ne nacháʼhuibe né laacaʼ. Yanna lii yaʼ, tu laa ñuuláʼdxiluʼ ñuuyaluʼ dxi guiasa ca gueʼtuʼ ca. Biindaʼ Juan 3:16 ne Romanos 6:23.