Biiyaʼ guiraʼ ni nuu lu sitiu riʼ

guyé lu índice

 NDAA 3

Ñee dxandíʼ de Dios zeeda ca diidxaʼ sicarú ni cá lu Biblia la?

Ñee dxandíʼ de Dios zeeda ca diidxaʼ sicarú ni cá lu Biblia la?

1. Tu guníʼ xi guicá lu Biblia

Biblia ruzeeteʼ zedandá dxi guibáninu sin qué chuʼ dxi gátinu lu Guidxilayú riʼ (Salmo 37:29). Laani nápani 66 libru huiiniʼ, ne biaʼ 40 hombre nga gulí Dios gucaa ni. Ca primé gaayuʼ libru stini bicaa Moisés cani raca chonna mil gaayuʼ gayuaa iza, ne últimu libru stini bicaa apóstol Juan ni raca ti mil gaʼ gayuaa iza. Guiráʼ cani cá lu Biblia de Dios zeeda cani. Biquiiñebe espíritu santu stibe para gábibe ca hombre que xi gucaacaʼ (2 Samuel 23:2). Ca hombre riʼ bicaacaʼ ni guníʼ Dios ne cadi ni na íquecaʼ. Nga runi, zanda guininu Jiobá nga guníʼ xi guicá lu Biblia. Biindaʼ 2 Timoteo 3:16 ne 2 Pedro 1:20, 21.

Biiyaʼ videu ni láʼ Tu guníʼ xi guicá lu Biblia

2. Xiñee zanda guni crenu dxandíʼ cani rusiidiʼ Biblia

Laanu nánnanu dxandíʼ de Dios zeeda Biblia, purtiʼ qué ruchee diʼ ni ora guiniʼni xi chiguizaaca despué, ti cosa ni qué zanda ganna binni (Josué 23:14). Dios si ni jma nandxóʼ nga zanda guni ni. Biindaʼ Isaías 42:9 ne 46:10.

Pa de Dios zeeda xiixa libru la? nanna dxíchinu nabe risácani. Maʼ huasaananécabe binni mil millón de Biblia lu stale gayuaa diidxaʼ. Ne neca maʼ xadxí gucuá libru riʼ, qué rucheeni ora maʼ caniʼni de ciencia. Nécapeʼ cuarenta hombre nga bicaa ni, qué rirenda diʼ cani cá luni. * Lu guidubi naca Biblia rihuinni pabiáʼ nadxii Dios binni ne dede yanna nápani poder para guchaani guidubi naca xquendanabani binni. Nga runi, stale millón de binni nanna dxíchicaʼ Biblia ca nga Stiidxaʼ Dios. Biindaʼ 1 Tesalonicenses 2:13.

Biiyaʼ videu ni láʼ Xiñee zanda guni crenu dxandíʼ ni rusiidiʼ Biblia

 3. Xidé caníʼ Biblia

Lu Biblia jma nga rieeteʼ de ti cosa nabé sicarú, ruzeeteʼ ni pabiáʼ galán modo naguixhe Dios guibani binni. Laaca caniʼni xi guiráʼ naguixhe ique Dios guni né binni guidxilayú. Ne rusiene ni xi pur bisaana de nibani binni ndaaniʼ Paraísu dxi bizulú guyuu binni lu Guidxilayú ne laaca rusiéneni ximodo zabiguetaʼ Paraísu que. Biindaʼ Apocalipsis 21:4, 5.

Lu Stiidxaʼ Dios zeeda ley, conseju ne xcaadxi cosa ni zacané laanu guibáninu galán. Laaca rábini laanu pabiáʼ nachaʼhuiʼ Dios né binni guidxilayú, ne nga rusihuinni ximódopeʼ laabe. Nga runi, zanda gacané Biblia laanu gunibiaʼnu laabe. Ne laaca rusiidiʼ ni laanu ximodo zanda gaca xhamígunu laabe. Biindaʼ Salmo 19:7, 11; Santiago 2:23, ne 4:8.

4. Xi zacané laanu guiénenu cani zeeda lu Biblia

Folletu riʼ zacaneni laanu guiene chaahuinu cani rusiidiʼ Biblia ra gúninu cásica biʼniʼ Jesús. Ora bizeetebe xiixa textu biquiiñebe xcaadxi versículo para bisiénebe cani zeeda lu Biblia. Biindaʼ Lucas 24:27, 45.

Nanna dxíchidu ziuuláʼdxiluʼ gánnaluʼ jma de ca diidxaʼ sicarú ni napa Dios para laanu. Nuu binni qué riuulaʼdxiʼ ganna de laacani ne nuu xcaadxi dede ridxiichicaʼ ora chuʼ tu guiniʼné laacaʼ de laacani. Peru cadi gudiiluʼ lugar cuee ca binni riʼ gana lii. Biblia peʼ na: cani guiziidiʼ de Dios zabánicaʼ sin qué chuʼ dxi gáticaʼ. Biindaʼ Juan 17:3.

 

^ párrafo 3 Biiyaʼ folletu ni láʼ Cani zeeda lu Biblia.