Biiyaʼ guiraʼ ni nuu lu sitiu riʼ

guyé lu índice

 NDAA 14

Xiñee nexheʼ chaahuiʼ dxiiñaʼ runi ca xpinni Dios

Xiñee nexheʼ chaahuiʼ dxiiñaʼ runi ca xpinni Dios

1. Xiñee gudixhe chaahuiʼ Dios dxiiñaʼ biʼniʼ guidxi Israel ni guyuu dxiqué

Dios biquiiñeʼ ca xiiñiʼ Abrahán para biʼniʼ ti guidxi ne bidiibe laacaʼ ley ni naquiiñeʼ chinándacaʼ. Guidxi ca guleelabe laa Israel, ne laacabe nga biaana gúʼyacabe gaca adorar Dios jneza ne gaca ni na stiidxabe (Salmo 147:19, 20). Pur nga, zanda cueendú stale binni de guiráʼ guidxi ni galán. Biindaʼ Hechos 3:25.

Dios gulí ca israelita para gácacaʼ testigu stiʼ. Ni bizaacacabe que rusihuínnini ricaa binni stale ndaayaʼ ora guni ni na ca ley stiʼ Dios (Deuteronomio 4:6). Pur laacabe zanda gunibiáʼ xcaadxi binni Dios ni dxandíʼ. Biindaʼ Isaías 43:10, 12.

2. Xiñee nexheʼ chaahuiʼ dxiiñaʼ ni runi cani dxandíʼ xpinni Cristu

Dxi maʼ qué niguu Jiobá ndaayaʼ Israel, guidxi ni gulibe que la? gulibe ca xpinni Cristu para chuʼ lugar sticaʼ (Mateo 21:43; 23:37, 38). Yanna riʼ, cani dxandíʼ xpinni Cristu nga cayuni ni na Jiobá casi testigu stibe, ne maʼ cadi ca israelita. Biindaʼ Hechos 15:14, 17.

Jesús gudixhe chaahuiʼ dxiiñaʼ ni guni ca discípulo stiʼ para gucheechecaʼ diidxaʼ lu guidubi naca Guidxilayú ne gacanecaʼ binni gaca xpínnibe (Mateo 10:7, 11; 24:14; 28:19, 20). Yanna, ra mayaca guinitilú ca cosa ni nuu lu Guidxilayú riʼ nga jma cayaca dxiiñaʼ riʼ. Tiempu riʼ nga cutagulisaa Jiobá millón de binni de guiráʼ guidxi para chuʼcaʼ ndaaniʼ religión ni rusiidiʼ ni dxandíʼ (Apocalipsis 7:9, 10). Cumu nexheʼ chaahuiʼ dxiiñaʼ runi cani dxandíʼ xpinni Cristu la? randa racanésaacaʼ ne riguusaacaʼ gana laacaʼ. Ne tobi si ni riziidicabe de Dios lu ca guendaridagulisaa stícabe. Biindaʼ Hebreos 10:24, 25.

 3. Ximodo bizulú guyuu ca testigu stiʼ Jiobá yanna riʼ

Bizulúcabe lu iza 1870, dxi biene ti grupu huiiniʼ de Binni ni Ruundaʼ Biblia stale cosa ni dxandíʼ de Dios, ni maʼ xadxí de qué huayénecaʼ. Laacabe biénecabe Jesús nga gudixhe chaahuiʼ dxiiñaʼ gaca ndaaniʼ neza binni ridagulisaa que para ganda guireeche diidxaʼ, ngue runi bizulú bicheechecabe diidxaʼ ndaaniʼ stale guidxi para gusiidicabe binni de Reinu stiʼ Dios. Ne lu iza 1931 biree lácabe testigu stiʼ Jiobá. Biindaʼ Hechos 1:8; 2:1, 4, 11, ne 5:42.

4. Ximodo nexheʼ chaahuiʼ dxiiñaʼ ni runi ca testigu stiʼ Jiobá

Lu primé siglu que, guiráʼ ca neza binni ridagulisaa ni guyuu lu guidubi naca Guidxilayú guleenducaʼ stale cosa galán, purtiʼ guyuu ti grupu de binnigola ni guzaniruʼ ládecaʼ, ca binnigola que gúpacaʼ Jesús casi Xaíque stiʼ neza binni ridagulisaa (Hechos 16:4, 5). Zacaca yanna riʼ, nuu ti Grupu ni Zaniruʼ lade ca testigu stiʼ Jiobá, ca binnigola ni nuu lu grupu riʼ maʼ biziidicabe stale de lu Stiidxaʼ Dios. Laacabe ruuyacabe dxiiñaʼ raca ndaaniʼ ca Betel ni nuu lu guidubi naca Guidxilayú. Ndaaniʼ ca yoo Betel ca ribiʼxhiʼ diidxaʼ, raca imprimir ne riguiizicaʼ libru ne revista lu jma de xhoopaʼ gayuaaʼ diidxaʼ. Ca binnigola ni nuu lu Grupu ni Zániruʼ ca riquiiñecaʼ Biblia para uguucaʼ gana jma de ti gayuaa mil neza binni ridagulisaa ne para gábicaʼ laacabe xi gúnicabe, ne ndaaniʼ ca neza binni ridagulisaa ca laaca nuu hombre ni maʼ biziidiʼ stale de lu Biblia ni nadxii ca xpinni Dios ne rápacaʼ laacabe. Biindaʼ 1 Pedro 5:2, 3.

Ca testigu stiʼ Jiobá nexheʼ chaahuiʼ dxiiñaʼ rúnicaʼ, zacá nga randa rucheechecabe ca diidxaʼ sicarú ni zeeda lu Biblia ne racanécabe binni gaca xpinni Cristu. Ne cásica biʼniʼ ca apóstol que, laaca rucheechecabe diidxaʼ de yoo pur yoo (Hechos 20:20). Laaca ruundanécabe ca binni ni riuulaʼdxiʼ guiziidiʼ ni dxandíʼ de Biblia. Peru cadi nacasícabe ti guidxi, sínuque laaca nadxiisaacabe casi ti familia ni rapa Jiobá, Bixhózecabe ni nuu guibáʼ (2 Tesalonicenses 1:3). Ne cumu runi ca xpinni Dios stipa pur gusiéchecaʼ laabe ne gacanecaʼ binni la? nga runi laacabe nga familia ni jma nayecheʼ nuu lu Guidxilayú. Biindaʼ Hechos 20:35 ne 1 Pedro 2:9.