Biiyaʼ guiraʼ ni nuu lu sitiu riʼ

guyé lu índice

 NDAA 11

Ximodo racané ca ley stiʼ Dios laanu

Ximodo racané ca ley stiʼ Dios laanu

1. Xiñee caquiiñeʼ chuʼ tu gusiene laanu xi gúninu

Ximodo racané cani rusiidiʼ Biblia laanu chuʼnu cuidadu para cadi guizaacanu xiixa (SALMO 36:9)

Jiobá, Bixhózenu ni bizáʼ guiráʼ xixé cosa, jma nuu xpiaanibe que laanu. Laaca nabé nadxiibe laanu ne rizaaláʼdxibe laanu. Cadi bizáʼdibe laanu para gúninu guiráʼ cosa ca laasinu sin iquiiñenu laabe (Jeremías 10:23). Cásica caquiiñeʼ ti xcuidihuiiniʼ gabi bixhoze laa xi guni, laanu laaca caquiiñeʼ gabi Jiobá laanu xi gúninu (Isaías 48:17, 18). Dios nga bisigaʼdeʼ laanu ca ley ni zeeda lu Biblia ni rabi laanu xi gúninu. Biindaʼ 2 Timoteo 3:16.

Ca ley stiʼ Jiobá rusiidiʼ cani laanu ximodo guibáninu jma galán ne ruluíʼ cani laanu ximodo zanda guicaanu ca ndaayaʼ ni qué zará ni chiguicaa binni despué. Cumu laabe nga bizaʼbe laanu la? ribézabe chuʼnu nayecheʼ ora gúninu ni nabe. Biindaʼ Salmo 19:7, 11 ne Apocalipsis 4:11.

2. Ximodo racané Stiidxaʼ Dios laanu

Caadxi de ca cosa jma risaca ni rusiidiʼ Biblia rabi cani laanu xi racalaʼdxiʼ Dios gúninu lu stale cosa. Peru ca ley ca rábicani laanu xipeʼ naquiiñeʼ gúninu o xi cadi naquiiñeʼ gúninu lu xiixa cosa (Deuteronomio 22:8). Galán iquiiñenu xquendabiaaninu para ganda guiénenu xi cayabi Biblia laanu gúninu lu cada cosa (Proverbios 2:10-12). Guidúʼyanu ti ejemplu, Biblia na Dios nga bisigaʼdeʼ laanu guendanabani. Xi rusiidiʼ ndiʼ laanu yaʼ. Rusiidiʼ ni laanu xi naquiiñeʼ gúninu ora maʼ cayúninu dxiiñaʼ, ora maʼ nuunu ralídxinu ne ora maʼ ziuunu de viaje purtiʼ rusietenaláʼdxini laanu chuʼnu cuidadu laanu para cadi guizaacanu xiixa. Biindaʼ Hechos 17:28.

 3. Gunáʼ nga guiropaʼ mandamientu jma risaca

Jesús bizeeteʼ chupa mandamientu. Primé mandamientu ca rusihuínnini xi pur nuu binni lu Guidxilayú: para gunibiacaʼ Dios, gannaxhiicaʼ laabe, ne gúnicaʼ ni nabe sin gucheenecaʼ laabe. Cadi naquiiñeʼ guiaandaʼ laanu mandamientu riʼ lu guiráʼ ni gúninu (Proverbios 3:6). Cani chinanda mandamientu riʼ zaca xhamígucaʼ Dios, dxandipeʼ ziuucaʼ nayecheʼ ne zábanicaʼ sin qué chuʼ dxi gáticaʼ. Biindaʼ Mateo 22:36-38.

Guiropa mandamientu ca racaneni laanu guidxaaganu xcaadxi binni sin chuʼdindenenu laacaʼ (1 Corintios 13:4-7). Ora gúninu ni na mandamientu riʼ lu xquendanabáninu cayúninu cásica runi Dios né binni. Biindaʼ Mateo 7:12 ne 22:39, 40.

4. Ximodo racané ca ley stiʼ Dios laanu

Ca ley stiʼ Dios racanécani gannaxhiisaa ca familia ne chuʼcaʼ tobi si (Colosenses 3:12, 14). Tobi de laacani rápani ca familia, purtiʼ rusiidiʼ ni cadi naquiiñeʼ guibiá guendaxheelaʼ. Biindaʼ Marcos 10:7-9.

Ora chinándanu cani rusiidiʼ Biblia racanécani laanu gápanu ni iquiiñenu lu xquendanabáninu ne gatadxí ladxidoʼno. Casi stale lugar ra runi binni dxiiñaʼ jma nga ruyúbicabe binni ni runi cani rusiidiʼ Biblia, purtiʼ nánnacabe qué ribáʼnacaʼ ne rúnicaʼ xhiiñacaʼ jneza (Proverbios 10:4, 26; Hebreos 13:18). Laaca rusiidiʼ Stiidxaʼ Dios laanu chuʼnu nayecheʼ né cani nápanu para guibáninenu. Ne jma guisaca para laanu gaca xhamígunu Dios que guicá íquenu ca cosa ni nuu lu Guidxilayú riʼ. Biindaʼ Mateo 6:24, 25, 33 ne 1 Timoteo 6:8-10.

Ora guibáninu modo na ca ley stiʼ Dios racanécani laanu chuʼnu nazaacaʼ. Casi ley stiʼ Dios ni na cadi naquiiñeʼ xhudxi binni, rápani laanu para cadi gaca huaranu ne cadi guizaacanu xiixa accidente ra zanda gátinu (Proverbios 14:30; 22:24, 25; 23:20). Jiobá na cadi malu diʼ gueʼ binni nisadxuʼniʼ, peru jma galán gúʼyanu pabiáʼ zanda guideʼnu (Salmo 104:15; 1 Corintios 6:10). Ca ley stiʼ Dios racanécani laanu, purtiʼ rucaa cani laanu guidúʼyanu ximodo xpiaʼnu ne cani riníʼ íquenu (Salmo 119:97-100). Peru cani dxandíʼ xpinni Cristu qué runi respetársidu ca ley zeeda lu Biblia purtiʼ si racanécani laadu; sínuque rinándadu ni na cani para gusisácadu Jiobá, Bixhózedu ni nuu guibáʼ. Biindaʼ Mateo 5:14-16.