Biiyaʼ guiraʼ ni nuu lu sitiu riʼ

guyé lu índice

Historia 114: Ra guiluxe guirá’ guendaquéiquiiñe’

Historia 114: Ra guiluxe guirá’ guendaquéiquiiñe’

XI ruuyu’ lu dibuju ri’. Stale binni dxi’ba’ caballu quichi’. Peru biiya’ de paraa zeedacame. ¡Ca caballu ca zeeda guxooñeca’ de guibá’ lade ca za ca! Ñee nuu caballu guibá’ la?

Naca Jesús Rey guibáʼ

Co’, cani cahuinni rarí’ cadi dxandí’ caballu di’ laaca’. Nánnanu ni purti’ ca caballu ca qué zanda guxooñecame lade za, cadi dxandí’ la? Peru Biblia ruzeete’ de caadxi caballu guibá’. Nannu’ xiñee la?

Purti’ dxiqué biquiiñecabe caballu ora chitíndecabe lu guerra. Nga runi, Biblia riní’ de que tuudxi binni riete de guibá’ dxí’baca’ caballu ti gului’ca’ de que Dios napa ti guerra para guirá’ binni de Guidxilayú. Paraa chigaca ndi’ ya’. Lu Armagedón, ne zunitilube ca guendaquéiquiiñe’ nuu lu Guidxilayú ri’.

Jesús Nga chisániru’ lu guendaridinde ni chigaca lu Armagedón ri’. Bietenala’dxi’, Jiobá gulí Jesús para gaca rey sti’ gobiernu Stibe. Pur nga runi, ique Jesús nga nuu corona ca. Ne espada ca rusihuinni de que chiguutibe guirá’ ca xhenemigu Dios. Ñee guendaridxagayaa nga gánnanu de que Dios chiguuti ca binni malu ca la?

Biyubi Historia 10. Xi ruuyu’ luni. Nisaguié naro’ba’ ni biiti guirá’ binni malu que, nja’. Tu bisaba Nisaguié naro’ba’ ca ya’. Jiobá Dios. Yanna biiya’ lu Historia 15 ca. Xi cayaca luni. Jiobá cuzaaqui’ Sodoma ne Gomorra.

Gudi’di’ lu Historia 33. Biiya’ xi cayaca ca caballu ne ca carru ni ritindené ca egipciu ca. Tu bisaba nisa ca luguiácabe ya’. Jiobá. Bí’nibe ni para gulabe xquídxibe. Biyubi Historia 76. Racá zuuyu’ de que Jiobá dede bidii lugar guinitilú xquidxi purti’ gúcaca’ malu.

Nga runi, qué zadxagayaadinu ora Jiobá guseenda dede guibá’ ca binni nanda guiiba’ sti’ para gunduuxe’ guirá’ ca guendaquéiquiiñe’ nuu lu Guidxilayú ri’. Xi chigaca despué ya’. Gú’yanu xi raca.

Apocalipsis 16:16; 19:11-16.



Guendarinabadiidxaʼ

  • Xiñee riní’ Biblia de caadxi caballu ni zeeda de guibá’.
  • Xi lá’ guerra chiguedané Dios luguiá’ ca binni malu de Guidxilayú ri’, ne xi para guerra ri’.
  • Casi rihuinni lu dibuju ri’, tuu ndi’ chisániru’ lu guerra ri’, xiñee nuu ti corona íquebe, ne xi riní’ espada zinebe ca.
  • Ra guietenalá’dxinu ca historia 10, 15 ne 33, xiñee cadi naquiiñe’ guidxagayaanu ora gánnanu de que Dios chigunitilú ca binni malu ca.
  • Ximodo rusihuinni ca historia 36 ne 76 de que Dios zunitilú ca binni malu ca, neca guini’ca’ de que cayuni adorarca’ Dios.

Xcaadxi guendarinabadiidxaʼ

  • Biinda’ Apocalipsis 19:11-16.

    Ximodo rusihuinni Stiidxa’ Dios de que hombre dxi’ba’ caballu ca nga Jesucristu. (Apo. 1:5; 3:14; 19:11; Isa. 11:4.)

    Ximodo bisihuinni rini né’ xhaba Jesús de que dxandí’ bi’ni’ ganarbe guendaridinde que. (Apo. 14:18-20; 19:13; Isa. 63:1-6.)

    Turu’ zándaca guyuu lade ca binni nanda guiiba’ zinanda Jesús dxi’ba’ caballu quichi’ sti’ que. (Apo. 12:7; 19:14; Mat. 25:31, 32.)