Biiyaʼ guiraʼ ni nuu lu sitiu riʼ

guyé lu índice

Historia 111: Gusi ti hombrehuiini’

Historia 111: Gusi ti hombrehuiini’

¡BIIYA’! Xi cayaca rarí’ pue. Ñee gucanape’ hombrehuiini’ nexhe layú ca la? ¡Biiya’, tobi de ca hombre ziree ndaani’ yoo ca nga Pablu! Ñee laaca ruuyu’ Timoteu racá la? Nou’ de ra ventana ca nga biaba hombrehuiini’ ca la?

Bisibani Pablu Eutico

Ya, ngape’ nga ni guca. Pablu cudiibe ti libana para ca discípulo stibe guidxi Troas. Laabe nánnabe de que zandaa para gú’yabe laaca’ sti biaje purti’ zareebe ziebe lu barcu sti dxi que. Nga runi, neca ma’ galaa gueela’ laabe caní’rube.

Hombrehuiini’ ri’ lá’ Eutico. Laabe gúsibe zúbabe ra ventana ca. Biábabe de ruaa ventana ni nuu de lu guionna pisu ca. Nga runi ruuyu’ ca binni ca nuuca’ xizaa. Ora ca hombre ca rindísaca’ hombrehuiini’ ri’, ruuyaca’ ma’ gútibe.

Ora biiya’ Pablu de que ma’ guti hombrehuiini’ ri’ la? rá’tabe luguiá’ ne riguiidxibe laa. Ne óraque rini’be: Cadi chuutu xizaa. ¡Laabe nuube galán! ¡Ne dxandí’! ¡Ti milagru ndi’! ¡Pablu ma’ bisibani laabe! Guizá’ rieche’ guirá’ binni que.

Guirácabe riguí’bacabe sti biaje ne roxhícabe. Pablu bizulú guní’ sti tiru dede birá gueela’. Peru Eutico ma’ qué ñásiru’. Óraque Pablu, Timoteu ne cani ziné laabe que riguí’bacabe lu ti barcu. Ñee nannu’ paraa riécabe la?

Pablu caluxe guionna viaje sti’ de gucheechebe diidxa’ ne laabe ribiguétabe ralídxibe. Bindaabe chonna iza ndaani’ guidxi Efeso lu viaje bí’nibe ri’. Nga runi lu guionna viaje ri’ bindaabe jma que lu guiropa que.

Bireesibe Troas la? barcu que gulezadxini caadxi dxi Mileto. Cumu Efeso nga nuu gaxha de guidxi ri’ la? Pablu bisendacaabe ca hombre jma huaniisi de cani ridagulisaa Efeso para guiní’nebe laaca’. Despué la? ca binni que guizá’ triste riuuca’ ora ruuyaca’ ma’ ze’ Pablu lu barcu.

Barcu que ribigueta’ Cesarea. Laga riaana Pablu ralidxi discípulo Felipe la? ti hombre riguixhená lá’ Ágabo riní’ de que ora chindá Pablu Jerusalén zuseguyoocabe laa. Ne ngape’ nga ni raca, cásipe’ guní’ Ágabo que. Chupa iza de nuseguyoocabe Pablu Cesarea ruseendacabe laabe guidxi Roma para guni juzgar César laabe, gobiernu sti’ guidxi que. Guidúʼyanu xi raca lu viaje°ri’.

Hechos, capítulo 19 hasta 26.



Guendarinabadiidxaʼ

  • Tu hombrehuiini’ nexhe’ layú ca, ne xi gúcabe.
  • Xi runi Pablu ora bí’yabe guti hombrehuiini’ ca.
  • Paraa rie Pablu, Timoteu ne cani riné laacabe que, ne xi raca ora ribezadxícabe Mileto.
  • Xi rabi hombre riguixhená ni lá’ Ágabo que Pablu, ne ximodo raca cásipe’ modo rini’be.

Xcaadxi guendarinabadiidxaʼ

  • Biinda’ Hechos 20:7-38.

    Ximodo ndi’ qué zápanu «donda pa initilú» binni, casi na Pablu lu Hechos 20:26, 27. (Eze. 33:8; Hech. 18:6, 7.)

    Xiñee naquiiñe’ iquiiñe’ ca binnigola ca Stiidxa’ Dios ora gusiidica’ stuudxi. (Hech. 20:17, 29, 30; Tito 1:7-9; 2 Tim. 1:13.)

  • Biinda’ Hechos 26:24-32.

    Cumu Pablu de Roma laa la? ximodo gucané ndi’ laabe para gucheechebe diidxa’ ni gucuaabe de Jesús que. (Hech. 9:15; 16:37, 38; 25:11, 12; 26:32; Luc. 21:12, 13.)