Biiyaʼ guiraʼ ni nuu lu sitiu riʼ

guyé lu índice

Historia 109: Pedru riganna Corneliu

Historia 109: Pedru riganna Corneliu

LU dibuju riʼ rúʼyanu zuhuaa apóstol Pedru, ne nezadéchebe zuhuaa tuudxi xhamígube. Peru, xiñee zuxibi hombre ca nezalú Pedru pue. Naquiiñe’ gaca ndiʼ la? Ñee nannuʼ tu laabe la?

Cadxaagalú Corneliu Pedru

Hombre ca nga Corneliu. Ti xaíque stiʼ ca hombre ridinde de guidxi Roma. Corneliu qué runibiáʼdibe Pedru, peru gúdxicabe laabe guni invitarbe Pedru ralídxibe. Guidúʼyanu ximodo guca ndiʼ.

Ca primé xpinni Cristu que judíu laacaʼ, peru Corneliu cadi judíu diʼ laa. Peru, nadxiibe Dios, runi orarbe laa ne rúnibe stale ni galán para ca binni que. Ti huadxí ti ángel stiʼ Dios málasi bihuinni ra nuube ne rabi laabe: Dios riulaʼdxiʼ modo lii, ne laabe zacábibe ca oración stiluʼ. Biseendayubi ti hombre láʼ Pedru. Nuube guidxi Jope, ralidxi Simón, ni nabeza gaxha de nisadóʼ.

Oraqueca runi Corneliu ni gudxi ángel que laa. Sti dxi que, nuu Pedru ique lidxi Simón. Dios bi’ni’ guiníʼ ique Pedru de que cayuuyaʼ ti lari naroʼbaʼ ni zeeda yete de guibáʼ. Ne luni nuu gadxé gadxé maniʼ. Ley stiʼ Dios que na de que ca maniʼ riʼ cadi nayádicame para gó binni laacame, peru riree ti ridxi raqué na: Biasa Pedru. Biiti ne gudó.

¡Coʼ! na Pedru. Qué huayuu dxi gahuaʼ ni cadi nayá. Peru ridxi que rabi laabe: Bisaana de guiniʼluʼ cadi nayá ni Dios caníʼ de que nayá. Chonna biaje raca ndiʼ. Laga caníʼ ique Pedru xi riníʼ ni gúcabe riʼ la? riuu ca hombre ni biseenda Corneliu chiyubi laabe que.

Pedru biete de ique yoo que ne riníʼ: Naa nga hombre cuyúbitu ca. Xi pur beedatu raríʼ. Ora ca hombre que rusiénecaʼ Pedru de que ti ángel gudxi Corneliu guni invitar Pedru ralidxi la? Pedru riníʼ de que ziné laacabe. Sti dxi que, Pedru ne ca xhamigu rigánnacabe Corneliu guidxi Cesarea.

Corneliu gulidxi ca binnilidxi ne ca ni jma xhamígube. Ora riuu Pedru la? Corneliu ruzuxibi xañeebe, casi rihuinni lu dibuju riʼ. Peru Pedru rabi laabe: Biasa, purtiʼ laaca hombre naa casi lii. Dxandíʼ, Biblia ruluíʼ de que cadi jneza diʼ nga guzuxíbinu xañee ti hombre para guni adorarnu laa. Jiobá si nga naquiiñeʼ guni adorarnu.

Pedru rini’né cani nuu raqué de Stiidxaʼ Dios. Cayuuyaʼ de que Dios ricaa guiráʼ binni racalaʼdxiʼ guni ni ná, na Pedru rabi laacabe. Laga caniʼbe la? Dios ruseendaʼ espíritu santu stiʼ, ne ca binni que rini’ca’ gadxé gadxé diidxaʼ. Ca discípulo ni né Pedru que guizáʼ ridxagayaacabe, ruzulúcabe de que Dios jma nuu pur ca judíu ca. Ndiʼ rusiidiʼ laacabe de que Dios qué ruuyadiʼ ti raza si casi ni jma galán o jma risaca que sti raza. Ñee cadi dxandíʼ nga galán guietenaláʼdxinu ndiʼ la?

Hechos 10:1-48; 11:1-18; Apocalipsis 19:10.



Guendarinabadiidxaʼ

  • Lu dibuju riʼ, tuu nga hombre zuxibi ca.
  • Xi rabi ti ángel Corneliu.
  • Xi runi Jiobá guʼyaʼ Pedru ora nuube ique lidxi Simón ni nabeza Jope que.
  • Xiñee rabi Pedru Corneliu de que cadi naquiiñeʼ guzuxíbibe nin guni adorarbe laa.
  • Xiñee ridxagayaa ca discípulo judíu ni né Pedru que.
  • Xi zanda guizíʼdinu de ora yeganna Pedru Corneliu.

Xcaadxi guendarinabadiidxaʼ

  • Biinda’ Hechos 10:1-48.

    Xi ruluíʼ ca diidxaʼ guníʼ Pedru ni cá lu Hechos 10:42 de gucheechenu ca diidxaʼ cubi ne galán stiʼ Reinu. (Mat. 28:19; Mar. 13:10; Hech. 1:8.)

  • Biindaʼ Hechos 11:1-18.

    Ximodo guca Pedru ora biaba espíritu santu stiʼ Jiobá luguiáʼ cani cadi naca judíu que, ne ximodo zanda gúninu zacaca. (Hech. 11:17, 18; 2 Cor. 10:5; Efe. 5:17.)