Biiyaʼ guiraʼ ni nuu lu sitiu riʼ

guyé lu índice

Historia 108: Neza ni ze’ Damasco

Historia 108: Neza ni ze’ Damasco

NANNUʼ tuu nga nexhe layú ca la? Nga nga Saulo. Laabe nga ni gúpabe xhaba cani bichá guié Esteban que. ¡Biiya’ biaani’ cuzaani’ ca! Xi cayaca pue.

Guti si Esteban la? Saulo yeyubi ca xpinni Cristu para guninabe laaca’. Riuube ralídxica’, ribeebe laaca’ ne ruseguyoobe laaca’. Stale de ca discípulo que ruxooñeca’ ne rieca’ sti guidxi ne raqué rucheechecabe «stiidxa Cristu». Peru Saulo riebe sti guidxi riyúbibe ca xpinni Cristu. Yanna ma’ zebe Damasco. Neza zebe la? raca xiixa guendaridxagayaa:

Málasi, ti biaani’ de guibá’ ruzaani’ Saulo. Laabe riábabe layú, casi ruuyu’ lu dibuju ri’. Óraque binadiágabe ti ridxi ni na: ¡Saulo, Saulo! Xiñee cayuninalu’ naa pue. Ca hombre ziné Saulo que ruuyacabe biaani’ que ne runadiágacabe ridxi sti’ ni caní’ que, peru qué ganda guiénecabe ni.

Bisucheepaʼ ti biaaniʼ lú Saulo

Tu lii ya’ Señor, na Saulo.

Naa nga Jesús, ni cayuninalu’ ca, na ridxi que. Jesús rini’be sicarí’ purti’ ora runiná Saulo ca xpínnibe la? Jesús racaná casi ora ñúnicabe ni laabe.

Saulo rinabadiidxa’ laabe: Xi naquiiñe’ gune’ ya’ Señor.

Biasa ne guyé Damasco, na Jesús rabi laabe. Racá zábicabe lii xi gu’nu’. Ora Saulo riasa ne ruxhalelú la? qué randa ruuya’ gasti’. ¡Richeepa’ lube! Ngue runi, ca hombre que rigápica’ nabe ne rineca’ laabe Damasco.

Jesús rini’né ti discípulo ni nuu Damasco ne rábibe laa: Biasa Ananías, ne guyé neza ni lá’ Derecha. Ralidxi Judas gunabadiidxa’ pur ti hombre lá’ Saulo. Naa ma’ gulié’ laabe para gácabe xpinne’.

Ananías ruzuuba’ diidxa’. Ora ruuyabe Saulo la? ribaquinabe luguiá’ ne rini’be: Señor biseenda naa ti ganda gu’yu’ sti biaje ne guidxalu’ de espíritu santu. Oraqueca riaba casi jlaza lú Saulo, ne laa ribigueta’ ruuya’.

Saulo guizá’ biquiiñebe para guiní’nebe binni de sti guidxi ni na Stiidxa’ Dios. Ne runibiá’cabe laabe casi apóstol Pablu, ne zazí’dirunu jma de laabe. Peru yanna primeru guidúʼyanu xi rucaa Dios guni Pedru.

Hechos 8:1-4; 9:1-20; 22:6-16; 26:8-20.



Guendarinabadiidxaʼ

  • Xi runi Saulo despué de ruuticabe Esteban.
  • Xi guendaridxagayaa rizaaca Saulo ora ze’ Damasco.
  • Xi runi mandar Jesús guni Saulo.
  • Xi rabi Jesús Ananías, ne ximodo ruuya’ Saulo sti biaje.
  • Ne xi lá beeda gunibiá’cabe Saulo, ne ximodo nga nabé biquiiñebe.

Xcaadxi guendarinabadiidxaʼ

  • Biinda’ Hechos 8:1-4.

    Ra guzanándacabe ca xpinni Cristu que dxiqué, ximodo gucaneni guireeche ca ni runi crécabe ne ximodo zacaca cayaca yannari’. (Hech. 8:4; Isa. 54:17.)

  • Biinda’ Hechos 9:1-20.

    Xi chonna dxiiña’ gupa Jesús para Saulo. (Hech. 9:15; 13:5; 26:1; 27:24; Rom. 11:13.)

  • Biinda’ Hechos 22:6-16.

    Ximodo zanda gácanu casi Ananías, ne xiñee naquiiñepe’ gácanu casi laabe. (Hech. 22:12; 1 Tim. 3:7; 1 Ped. 1:14-16; 2:12.)

  • Biinda’ Hechos 26:8-20.

    Modo bichaa Pablu que, ximodo ruguu ndi’ gana ca ni napa xheela’ ni cadi cayuni ni na Dios. (Hech. 26:11; 1 Tim. 1:14-16; 2 Tim. 4:2; 1 Ped. 3:1-3.)