Biiyaʼ guiraʼ ni nuu lu sitiu riʼ

guyé lu índice

Historia 110: Timoteu racané Pablu

Historia 110: Timoteu racané Pablu

HOMBREHUIINIʼ ni ruuyuʼ raríʼ ne Pablu ca nga Timoteu. Laabe nabézabe ne ca binnilídxibe guidxi Listra. Jñaabe láʼ Eunice ne jñaa bídabe láʼ Loida.

Ne ndiʼ maʼ chonna biaje chiganna Pablu guidxi Listra. Raca ti iza dede dxi primé guyé Pablu ne Bernabé raqué. Yanna Pablu maʼ bibiguetaʼ raqué ne xhamígube Silas.

Timoteu ne Pablu

Nannuʼ xi rabi Pablu Timoteu la? Ñee ñulaʼdxuʼ nineluʼ laadu la? Lii zanda gacaneluʼ laadu gucheechenu diidxaʼ ra nuu binni ni nabeza zitu.

Ñualaʼdxeʼ na Timoteu. Ngue runi, qué nindaadiʼ rusaana Timoteu ca binnilidxi ne rinebe Pablu ne Silas. Peru ante de guiziidinu de viaje stibe la? guidúʼyanu xi guca Pablu. Maʼ gudiʼdiʼ diecisiete iza dede dxi bihuinni Jesús nezalube ora zebe Damasco.

Bietenalaʼdxiʼ, Pablu guyé Damasco para guninabe ca discípulo stiʼ Jesús, peru yanna maʼ laapebe nácabe discípulo. Despué ruyubi tuudxi xhenemígube laabe para guuticaʼ laabe, peru ca discípulo que racanecaʼ laabe guxooñebe. Ruguucabe laabe ndaaniʼ ti dxumi ne rindétecabe laabe lu lindaa stiʼ guidxi que ne zaqué gunda bixooñebe.

Despué la? Pablu ridiʼdiʼ Antioquía para chigucheechebe diidxaʼ. Ne raqué nga biree lá ca discípulo que, cristianu. De raqué ruseendacabe Pablu ne Bernabé chigucheechecaʼ diidxaʼ ca guidxi roʼ nuu zitu que. Tobi de ca guidxi rigánnacabe nga Listra, ra nabeza Timoteu.

Yanna biaʼ ti iza despué Pablu ribiguetaʼ Listra lu guiropa viaje. Ora riné Timoteu Pablu ne Silas, nannuʼ paraa riécabe la? Biiya lu mapa riʼ, ne zacá zánnaluʼ.

Primeru riécabe Iconio, guidxi nuu jma gaxha, de raqué riécabe sti guidxi láʼ Antioquía. Despué riécabe Troas, ne ridíʼdicabe Filipos, Tesalónica ne Berea. Ñee ruuyuʼ Atenas lu mapa riʼ la? Pablu laaca rucheeche diidxaʼ guidxi ca. Despué, riucheechecabe diidxaʼ Corinto ne rindaacabe raqué ti iza arondaʼ. Últimu ra riécabe nga Efeso raqué qué nindaapeʼcabe. Oraqueruʼ riguíʼbacabe lu ti barcu ne ribiguétacabe Cesarea de raqué riécabe Antioquía, ne raqué riaana Pablu.

Ne zacá Timoteu runi viajar gayuaa kilómetru para gacanebe Pablu gucheechecabe diidxaʼ ne gucasaacabe stale binni para guidagulisaa. Ora guiniisiluʼ, zácaluʼ casi Timoteu, ti hombrehuiiniʼ ni qué nucheené Dios la?

Hechos 9:19-30; 11:19-26; capítulo 13 hasta 17; 18:1-22.

Ti mapa

1. Roma; 2. Malta; 3. Berea; 4. Tesalónica; 5. Corinto; 6. Filipos; 7. Atenas; 8. Creta; 9. Troas; 10. Efeso; 11. Mileto; 12. Colosas; 13. Antioquía; 14. Iconio; 15. Listra; 16. Chipre; 17. Antioquía; 18. Cesarea; 19. Jope; 20. Damasco; 21. Jerusalén; 22. Nisadóʼ Naroʼbaʼ (Mediterrániu)



Guendarinabadiidxaʼ

  • Tu hombrehuiiniʼ cá lu dibuju riʼ, paraa nabézabe, ne tu láʼ jñaabe ne jñaa bídabe.
  • Xi ricabi Timoteu ora rinabadiidxaʼ Pablu laabe pa ñuláʼdxibe ninebe laa ne Silas para chigucheechecabe diidxaʼ ra nuu binni ni nabeza zitu.
  • Xi guidxi riree lá ca xpinni Cristu, cristianu.
  • Gunáʼ ndiʼ ca guidxi ni riganna Pablu, Silas ne Timoteu ora rireecaʼ de Antioquía.
  • Ximodo racané Timoteu Pablu, ne xi naquiiñeʼ guinabadiidxaʼ ca ni nahuiiniʼ nuu yanna°riʼ.

Xcaadxi guendarinabadiidxaʼ

  • Biindaʼ Hechos 9:19-30.

    Ximodo bisihuinni Pablu guendanuuxpiaaniʼ ora bidxagalube guendanagana lu guendarucheeche diidxaʼ. (Hech. 9:22-25, 29, 30; Mat. 10:16.)

  • Biindaʼ Hechos 11:19-26.

    Ximodo rusihuinni relatu ni zeeda lu Hechos 11:19-21, 26 de que espíritu stiʼ Jiobá nga ni cusániruʼ guendarireeche stiidxaʼ Dios.

  • Biindaʼ Hechos 13:13-16, 42-52.

    Ximodo ruluíʼ Hechos 13:51, 52 de que ca discípulo que, qué nireedicaʼ gana neca bicaalú binni laacaʼ. (Mat. 10:14; Hech. 18:6; 1 Ped. 4:14.)

  • Biindaʼ Hechos 14:1-6, 19-28.

    Ximodo ruguudxí ladxidoʼno ca diidxaʼ «udixhe cabe irá ca lu ná Señor ni runi cre caʼ» de cadi chúʼpenu xizaa pur ni qué zanda gúninu ora gácanenu cani nacubi ca. (Hech. 14:21-23; 20:32; Juan 6:44.)

  • Biindaʼ Hechos 16:1-5.

    Ra guná Timoteu biuu seña o gaca circuncidar, ximodo ruluíʼ ndiʼ pabiáʼ nga risaca gúninu guiráʼ cosa pur ca diidxaʼ nacubi ne galán stiʼ Dios. (Hech. 16:3; 1 Cor. 9:23; 1 Tes. 2:8.)

  • Biindaʼ Hechos 18:1-11, 18-22.

    Ximodo ruluíʼ Hechos 18:9, 10 de modo bisániruʼ Jesús guendarucheeche diidxaʼ, ne ximodo ruguudxi ndiʼ ladxidoʼno yanna. (Mat. 28:20.)