Biiyaʼ guiraʼ ni nuu lu sitiu riʼ

guyé lu índice

Historia 107: Cuchácabe guié Esteban

Historia 107: Cuchácabe guié Esteban

HOMBRE ni zuxibi racá nga Esteban. Laabe nga ti discípulo ni qué nucheené Jesús. ¡Peru biiyaʼ xi cayúnicabe laabe! Ca hombre riʼ cuchacaʼ guié laabe. Xiñee guizáʼ raca nanaláʼdxicabe Esteban dede rúnicabe ndiʼ laabe pue. Guidúʼyanu.

Cuchácabe guié Esteban

Dios huayacané Esteban para guni stale milagru. Ca hombre ca qué riuláʼdxidicaʼ ni rúnibe riʼ, nga runi ridindenécabe laabe purtiʼ cusiidibe ca binni que ni dxandíʼ. Peru Dios rudii laabe stale guendananna, ne laabe rusihuínnibe de que ca hombre que cadi cusiidicaʼ ni dxandíʼ. Ni rúnibe riʼ la? jma ruchiichini ca hombre que ne rinaazecabe laabe ne rábicabe caadxi binni guiníʼ mal de Esteban.

Xaíque stiʼ ca ni ruzaaquiʼ gu’xhu’ que rinabadiidxaʼ laabe: Ñee dxandíʼ nga ni caníʼcabe ca la? Esteban ricabi laabe ne ti libana ni zeeda ndaaniʼ Biblia. Ra zilúxebe libana que la? guniʼbe de que guyuu hombre malu ni guca nanalaʼdxiʼ ca ni riguixhená stiʼ Dios dxiqué. Óraque riniʼbe: Laatu laaca nácatu casi laacabe. Biititu Jesús, Xiiñiʼ Dios ne cadi cuzuubatu diidxaʼ ca ley stibe.

¡Jmaruʼ si ridxiichi ca xaíque stiʼ ca religión que pur ni riniʼbe ca! Dede rixidxi láyacabe tantu ridxiichicabe. Peru ora rindisaʼ ique Esteban la? riníʼ: ¡Laguuyaʼ! Cayuuyaʼ Jesús zuhuaa ladu derechu stiʼ Dios guibáʼ, ca hombre que ruseegucaʼ diágacaʼ ne runinacaʼ laabe. Rixubiyúcabe laabe ne ribeecabe laabe de ndaaniʼ guidxi que.

Raqué ribeecabe xhábacabe ne rudiicabeni Saulo para gápani. Ñee ruuyuʼ Saulo lu dibuju riʼ la? Óraque caadxi de laacabe ruchá guié Esteban. Laabe ruzuxíbibe, casi rihuínnibe raríʼ, ne riníʼnebe Dios: Señor cadi udxiibaluʼ donda riʼ luguiácabe. Esteban nanna de que caadxi de ca hombre que cayúnicabe ni pur cani gudxi ca xaíque stiʼ ca religión que laacabe. Riníʼsibe ngue la? rátibe.

Ora tuuxa guni lii xiixa, ñee riuuluʼ guquíxuni laacabe la? o rinábaluʼ lu Dios guniná laacabe. Nin Esteban, nin Jesús qué ñúnicaʼ zacá. Laacabe gúcacabe nachaʼhuiʼ dede ne tu bininá laacabe. Guyúbinu modo gúninu zacaca.

Hechos 6:8-15; 7:1-60.



Guendarinabadiidxaʼ

  • Tuu nga Esteban, ne xi huayacané Dios laabe gúnibe.
  • Xi riníʼ Esteban ni guizáʼ ruchiichi ca xaíque stiʼ ca religión que.
  • Despué de ribeecabe Esteban de ndaaniʼ guidxi que, xi rúnicabe laabe.
  • Tuu nga hombre zuhuaa gaxha de ra nexheʼ ca lari ca, casi ruuyuʼ lu dibuju ca.
  • Xi rinabaʼ Esteban Jiobá ante gati.
  • Ximodo zanda gúninu casi bi’ni’ Esteban ora chuʼ tu guni laanu xiixa.

Xcaadxi guendarinabadiidxaʼ

  • Biindaʼ Hechos 6:8-15.

    Xi ca guendarusiguii huaquiiñeʼ ca xaíque stiʼ ca yu’du’ ca ti ganda gucueezaca’ guendarucheeche diidxaʼ stiʼ ca testigu stiʼ Jiobá. (Hech. 6:9, 11, 13.)

  • Biindaʼ Hechos 7:1-60.

    Xi gucané Esteban para gunda guniʼbe pur diidxaʼ cubi ne galán stiʼ Dios nezalú Sanedrín que, ne xi zanda guizíʼdinu de ni bíʼnibe ca. (Hech. 7:51-53; Rom. 15:4; 2 Tim. 3:14-17; 1 Ped. 3:15.)

    Ximodo naquiiñeʼ gácanu ne ca binni ni cucaalú dxiiñaʼ stinu. (Hech. 7:58-60; Mat. 5:44; Luc. 23:33, 34.)