Biiyaʼ guiraʼ ni nuu lu sitiu riʼ

guyé lu índice

Historia 99: Nuucabe luguiáʼ ndaaniʼ ti cuartu

Historia 99: Nuucabe luguiáʼ ndaaniʼ ti cuartu

MAʼ gudiʼdiʼ chupa gubidxa, maʼ jueves huaxhinni ndiʼ. Jesús ne ca doce apóstol stiʼ beedacabe ra cuartu riʼ para gócabe guendaroxhí stiʼ Pascua. Hombre ziree ra puertaʼ ca nga Judas Iscariote. Zitídxibe ca ni ruzaaquiʼ guʼxhuʼ ca ximodo guinaazecabe Jesús.

Guendaroxhí stiʼ Señor

Judas gudxi laacabe ti dxi ante: Xi gudiitu naa pa gacaniáʼ laatu igaa Jesús yaʼ. Treinta moneda de plata, na ca ni ruzaaquiʼ guʼxhuʼ que rabi laabe. Yanna, Judas maʼ chidaaguʼ laacabe para chiné laacabe ra nuu Jesús. ¡Guizáʼ feu njaʼ!

Guendaroxhí stiʼ Pascua que riluxe. Peru Jesús rizulú sti guendaroxhí jma risaca. Rudiibe ca apóstol stibe ti pan ne rábibe laacaʼ: Lagó, purtiʼ ndiʼ riniʼni xcuerpuaʼ ni chigudiéʼ pur laatu. De raqué ricaabe ti vasu vinu ne rábibe laacaʼ: Laguéʼ, purtiʼ ndiʼ riníʼ rini stinneʼ ni chiguxhiéʼ pur laatu. Guendaroxhí riʼ ndaaniʼ Biblia lani: Guendaroxhí stiʼ Señor.

Ca israelita que gudoxhícabe lu Pascua que ti guietenaláʼdxicabe dxi gudiʼdiʼ ángel stiʼ Dios ndaaniʼ guidxi Egipto ne biiti primé xiiñiʼ ca binni que. Yanna, ni racalaʼdxiʼ Jesús nga guietenalaʼdxiʼ ca xpínnibe de laabe ne de que laabe gútibe pur laacaʼ. Ne para nga nga raca guendaroxhí riʼ ti biaje lu ti iza.

Despué de Guendaroxhí stiʼ Señor la? Jesús gúdxibe ca apóstol stibe gácacaʼ nadxibalú ne guquídxicaʼ fe sticaʼ. Biluxe guníʼsibe ngue la? ruundacabe para Jiobá ne rireecabe de raqué. Zándaca maʼ galagueelaʼ ngue. Paraa riécabe yaʼ.

Mateo 26:14-30; Lucas 22:1-39; Juan, capítulo 13 hasta 17; 1 Corintios 11:20.



Guendarinabadiidxaʼ

  • Casi ruuyuʼ lu dibuju ca, xiñee nuu Jesús ne ca doce discípulo stiʼ ndaaniʼ cuartu ca.
  • Tuu nga ziree ra puertaʼ ca ne xi zigúnibe.
  • Xi guendaroxhí risaca bizulú Jesús despué de biluxe guendaroxhí stiʼ Pascua que.
  • Xi rietenalaʼdxiʼ ca israelita que lu Pascua que, ne xi chigusietenalaʼdxiʼ guendaró risaca riʼ ca xpinni Jesús yaʼ.
  • Despué de Guendaroxhí stiʼ Señor que, xi gudxi Jesús ca apóstol stiʼ ne xi rúnicaʼ.

Xcaadxi guendarinabadiidxaʼ

  • Biindaʼ Mateo 26:14-30.

    Ximodo rusihuinni Mateo 26:15 de que ni biʼniʼ Judas que, guirutiʼ tu nucaa laabe ñúnibe ni sínuque laapebe bíʼnibe ni.

    Xi chupa cosa guleendú rini ni bixhii Jesús. (Mat. 26:27, 28; Jer. 31:31-33; Efe. 1:7; Heb. 9:19, 20.)

  • Biindaʼ Lucas 22:1-39.

    Ximodo nga guyuu Binidxabaʼ luguiáʼ Judas. (Luc. 22:3; Juan 13:2; Hech. 1:24, 25.)

  • Biindaʼ Juan 13:1-20.

    Pur ca diidxaʼ ni cá lu Juan 13:2, zanda gaʼniʼ donda Judas pur ni biʼniʼ la? Xi rizíʼdinu de ndiʼ yaʼ. (Gén. 4:7; 2 Cor. 2:11; Gál. 6:1; Sant. 1:13, 14.)

    Xi ejemplu de guendaridxagayaa biluíʼ Jesús, ni laaca naquiiñeʼ gúninu. (Juan 13:15; Mat. 23:11; 1 Ped. 2:21.)

  • Biindaʼ Juan 17:1-26.

    Ximodo ndiʼ gaca ca xpinni Cristu «tobi si» casi gunábabeni yaʼ. (Juan 17:11, 21-23; Rom. 13:8; 14:19; Col. 3:14.)