Biiyaʼ guiraʼ ni nuu lu sitiu riʼ

guyé lu índice

Historia 93: Jesús ruyaanaʼ stale binni

Historia 93: Jesús ruyaanaʼ stale binni

GUIZÁʼ feu nga ni guca xa, maʼ biiticabe Juan ni ruguunisa que. Herodías, xheelaʼ rey que guca nanalaʼdxiʼ laabe. Ne bidxélabe modo guni mandar rey que igá yanni Juan.

Ora Jesús runadiaga ni guca riʼ la? guizáʼ riuube triste. Riebe ti lugar ra chuʼbe laasibe. Peru ca binni que rinándacaʼ laabe. Ora ruuyaʼ Jesús guiráʼ binni que la? nabé riabe laacaʼ. Ngue runi, riníʼnebe ca binni que de reinu stiʼ Dios, ne bisiándabe cani huará que.

Ca discípulo stibe riecaʼ ra nuube ne rábicaʼ laabe: Maʼ huadxí ndiʼ ne stúbinu raríʼ. Gudxi ca binni ca checaʼ yanna ti ganda chisícabe ni gócabe ndaaniʼ ca guidxihuiiniʼ ca.

Ruyaanaʼ Jesús stale binni

Laacabe qué ziédicabe, na Jesús rabi laacabe. Laatu lagudii ni gócabe. Oraqueruʼ biiyadxibe Felipe ne gunabadiidxabe: Paraa guidxélanu stale guendaró para ugaanda gó guiráʼ xixé binni riʼ pue.

Stale bidxichi nga zaquiiñeʼ para ganda guidxela stale guendaró ne ugaanda guicaacabe ti ndaa ti ndaa, na Felipe rabi laabe. Andrés riníʼ: Raríʼ nuu ti hombrehuiiniʼ ni napa gaayuʼ pan ne chupa benda. Nin qué zugaanda nga para guiráʼ binni°riʼ.

Lagabi ca binni ca cuícabe lu ca guixihuiiniʼ ca, na Jesús rabi laacabe. Óraque rudiibe xquíxepeʼ Dios pur guendaró que ne ruzulú rindaabe cani. Ca discípulo que rutiidicabe ca pan que ne ca benda que lu ca binni que. Nuu 5.000°hombre ne stálepeʼ gunaa ne baʼduhuiiniʼ. Guirácabe rócabe dede ridxá ndaanicabe. Ne ora ca discípulo que rutópacabe cani biaana que la? ruchatípacabe doce dxumi.

Jesús rábibe ca discípulo stibe quíbacaʼ ndaaniʼ ti canuá para tiidicabe guiiguʼ stiʼ Galilea. Gueelaʼ que biaba ti nisaguié ne ti bi yooxhoʼ, ne ca ola que dede cuniibi cani canuá que cheríʼ cherica. Ca discípulo que guizáʼ ridxíbicaʼ. Ne ruuyacabe tuuxa zedazá lu nisa ne zidxiña ra nuucabe. Bidxíbicabe stálepeʼ purtiʼ qué gánnacabe xi cayuuyacabe.

Cadi guidxíbitu na Jesús rabi laacabe. ¡Naa ndiʼ! Laacabe qué°guirá guidxagayaacabe. Ngue runi na Pedru rabi laabe: Pa lii nga la? Señor, gulidxi naa guendaʼ ra nuuluʼ ne sayaʼ lu nisa ca. Jesús ricabi laabe: ¡Gudáʼ! Óraque riete Pedru de ndaaniʼ canuá que ne ziguizá lu nisa que. Pedru bidxibi ne bizulú biaaziʼ, peru Jesús bilá laabe.

Despué la? sti biaje ca ruyaanaʼ Jesús stale binni. Biaje riʼ la? rúnibeni ne gadxe pan ne chupa bendahuiiniʼ. Ne zaqueca riuu stálepeʼ guendaró para guirácabe. ¡Galán nga gúʼyanu ximodo rizalaʼdxiʼ Jesús ca binni ca! ¡Ora laabe guni gobernarbe la? maʼ qué ziuudinu xizaa de gastiʼ!

Mateo 14:1-32; 15:29-38; Juan 6:1-21.



Guendarinabadiidxaʼ

  • Xi bíʼnicabe Juan ni ruguunisa que, ne ximodo biʼniʼ sentir Jesús.
  • Ximodo ruyaanaʼ Jesús guiráʼ xixé binni nanda laabe que, ne pabiáʼ guendaró biaana.
  • Xiñee guizáʼ ridxibi ca discípulo que, ne xi rizaaca Pedru yaʼ.
  • Ximodo ruyaanaʼ Jesús guiráʼ ca binni que ra guiropa biaje.
  • Xiñee guizáʼ galán zaca ora Jesús guni gobernar Guidxilayú casi Rey ni gulí Dios.

Xcaadxi guendarinabadiidxaʼ

  • Biindaʼ Mateo 14:1-32.

    Xi ruluíʼ relatu stiʼ Mateo 14:23-32 de modo xpiaʼ Pedru pue.

    Ximodo caníʼ Biblia de que Pedru biziidiʼ guiníʼ ique chaahuiʼ ante guiníʼ ne guni xiixa. (Mat. 14:27-30; Juan 18:10; 21:7; Hech. 2:14, 37-40; 1 Ped. 5:6, 10.)

  • Biindaʼ Mateo 15:29-38.

    Ximodo bisihuinni Jesús respetu pur guiráʼ cani bidii bixhózebe yaʼ. (Mat. 15:37; Juan 6:12; Col. 3:15.)

  • Biindaʼ Juan 6:1-21.

    Ximodo zanda gúʼyanu ca gobiernu ca casi biiyaʼ Jesús laacabe yaʼ. (Juan 6:15; Mat. 22:21; Rom. 12:2; 13:1-4.)