Biiyaʼ guiraʼ ni nuu lu sitiu riʼ

guyé lu índice

Historia 92: Jesús rusibani gueʼtuʼ

Historia 92: Jesús rusibani gueʼtuʼ

DXAAPAHUIINIʼ ruuyuʼ raríʼ la? nápabe 12 iza. Jesús naaze nabe, jñaabe ne bixhózebe nuucaʼ gaxha de laabe. Nannuʼ xiñee nuucabe nayecheʼ la? Chiguidúʼyanu.

Cusibani Jesús xiiñiʼ Jairo

Bixhoze dxaapahuiiniʼ ca nga ti hombre risaca ni láʼ Jairo. Ti dxi xiiñibe guca huará ne ribáʼquicabe laa lu ti luunaʼ. Peru qué riándadibe laga jma raca huarabe. Jairo ne xheelaʼ nabé riuucaʼ xizaa, purtiʼ ruluíʼ zati dxaapahuiiniʼ ca. Laabe nga tobi lucha xiiñicabe. Ngue runi Jairo riyubi Jesús. Laabe maʼ binadiágabe de ca milagru cayuni Jesús.

Ora ridxélabe Jesús la? ruuyabe guizáʼ stale binni nuu ra nuu. Peru Jairo ridíʼdibe lade guiráʼ ca binni que ne rusuxíbibe xañee Jesús ne rábibe laa: Xiiñeʼ nabé huará, gudáʼ laʼ ne bisianda laabe. Jesús na de que zie.

Laga ziguizácabe la? ca binni que zigulaanaʼ saacabe para guidxíñacabe Jesús. Málasi bizuhuaadxí Jesús. Tu gudaʼnaʼ naa, nabe. Jesús bidiibe cuenta de que biree poder luguiabe ne guyuu tu gudaʼnaʼ laabe. ¡Peru tu yaʼ! Ni gudaʼnaʼ laabe nga ti gunaa ni huará maʼ raca doce iza. ¡Beedabe ne gudáʼnabe xhaba Jesús ne biándabe!

Jairo guizáʼ galán riuu purtiʼ ruuyabe de que para Jesús cadi nagana diʼ nga gusianda tuuxa. Peru reeda ti xpinni Jairo ne na rabi laabe. Cadi guchiichuʼ Jesús. Xiiñiluʼ maʼ guti. Jesús runadiaga ni guniʼbe riʼ ne rábibe Jairo: Cadi chuʼluʼ xizaa, laabe ziuube galán.

Ora rindácabe ralidxi Jairo la? ca binni que nabé cayuunacaʼ ne rúnicaʼ ridxi. Peru Jesús rábibe ca binni que: Cadi gúʼnatu, dxaapahuiiniʼ riʼ caʼruʼ gátidiʼ. Nisiaasibe nga, na Jesús. Ca binni que ruxídxicaʼ de laabe purtiʼ nánnacabe de que dxaapahuiiniʼ que maʼ guti.

Jesús riuunebe bixhoze ne jñaa dxaapahuiiniʼ que ne chonna de ca apóstol stibe ra nexhe dxaapahuiiniʼ que. Rigápibe naʼ ne rábibe laa: ¡Biasa! Ne laa ribiguetaʼ ribani, casi ruuyuʼ lu dibuju riʼ. ¡Riásabe ne rizabe! Nga runi, bixhózebe ne jñaabe cayéchecaʼ stálepeʼ.

Peru cadi deruʼ diʼ dxaapahuiiniʼ riʼ nga gusibani Jesús lade gueʼtuʼ. Primé ni bisibánibe nga xiiñiʼ ti viuda nabeza guidxi Naín. Despué, Jesús laaca bisibánibe Lázaro, bizaʼnaʼ María ne Marta. Ora Jesús guni gobernar casi ti rey stiʼ Dios la? zusibánibe stálepeʼ binni. Ñee cadi naquiiñeʼ gusiecheʼ nga laanu la?

Lucas 8:40-56; 7:11-17; Juan 11:17-44.



Guendarinabadiidxaʼ

  • Tuu nga bixhoze dxaapahuiiniʼ ni cá lu dibuju riʼ, ne xiñee laabe ne xheelabe nuucabe xizaa.
  • Xi runi Jairo ora ridxélabe Jesús.
  • Xi raca laga zeʼ Jesús ralidxi Jairo, peru xi ruseenda tídxicabe Jairo ante chindá.
  • Xiñee ruxidxi ca binni ni nuu ralidxi Jairo que de Jesús.
  • Xi runi Jesús ora riuunebe ca bixhoze dxaapahuiiniʼ que, ne chonna de ca apóstol stibe ndaaniʼ cuartu que.
  • Turuʼ huandisa Jesús de lade gueʼtuʼ, ne xi rusihuinni ndiʼ yaʼ.

Xcaadxi guendarinabadiidxaʼ

  • Biindaʼ Lucas 8:40-56.

    Xiñee zanda guininu de que Jesús biubaláʼdxibe ne biénebe gunaa cuxhii rini que, ne xi zanda guiziidiʼ ca binnigola ni zinanda Cristu de laani. (Luc. 8:43, 44, 47, 48; Lev. 15:25-27; Mat. 9:12, 13; Col. 3:12-14.)

  • Biindaʼ Lucas 7:11-17.

    Ni biʼniʼ Jesús pur viuda de Naín que, xiñee zanda gusiecheʼ ndiʼ cani maʼ guti binnilidxi. (Luc. 7:13; 2 Cor. 1:3, 4; Heb. 4:15.)

  • Biindaʼ Juan 11:17-44.

    Ximodo bisihuinni Jesús de que gastiʼ naca guʼnaʼ tobi ora gati tuuxa ni nadxii. (Juan 11:33-36, 38; 2 Sam. 18:33; 19:1-4.)