Biiyaʼ guiraʼ ni nuu lu sitiu riʼ

guyé lu índice

Historia 89: Jesús rusiá ra yuʼduʼ

Historia 89: Jesús rusiá ra yuʼduʼ

GUIZÁʼ cadxiichi Jesús raríʼ njaʼ. Nannuʼ xiñee la? Purtiʼ ca hombre nuu ndaaniʼ yuʼduʼ stiʼ Dios ni nuu guidxi Jerusalén que guizáʼ rachelucaʼ xpueltu binni. Nuucabe gáxhacabe bueltu guiráʼ binni zeeda para guni adorar ra yuʼduʼ°riʼ.

Bitiixhi Jesús mexaʼ ra nexheʼ bueltu stícabe

Ruuyuʼ guiráʼ yuzehuiiniʼ ca ne dendxuʼ ne ca paloma ca la? Ca hombre riʼ cutoocaʼ laacame ndaaniʼ yuʼduʼ ca. Nannuʼ xiñee la? Purtiʼ ca israelita que riquiiñecabe ca maniʼ riʼ para gusigáʼdecabe Dios.

Ley stiʼ Dios que na de que ora ti israelita guni xiixa ni malu la? naquiiñeʼ guutibe ti maniʼ para gusigáʼdebe Dios. Ne laacabe maʼ nánnacabe póraruʼ zanda gusigáʼdecabe laabe. Peru, paraa guidxélacabe maniʼ para gusigáʼdecabe yaʼ.

Caadxi de laacabe maca nápacaʼ maniʼ. Peru stale de ca israelita que, qué gápadicaʼ. Ne xcaadxi de laacabe nabézacabe zítupeʼ de Jerusalén ne qué zanda guedanécabe ti maniʼ ndaaniʼ yuʼduʼ riʼ. Ngue runi ca binni que reedacabe ndaaniʼ yuʼduʼ que para sícabe ca maniʼ riʼ. Peru ca hombre que nabé caru rutoocabe laacame. Ne ribáʼnacabe ca binni que. Ne nánnacabe cadi naquiiñeʼ diʼ gutoocabe ndaaniʼ yuʼduʼ stiʼ Dios.

Ndiʼ nga ni jma ruchiichi Jesús. Nga runi bitiixhibe ca mexaʼ stiʼ ca hombre que dede bireeche xpuéltucaʼ. Jesús laaca runi ti chicote de doo ne riladxinébeni ca maniʼ ca de ndaaniʼ yuʼduʼ que. Rábibe cani cutoo paloma que: ¡Lacuee laacame de raríʼ! Lagusaana de gúnitu ralidxi Bixhozeʼ ti luguiaa para gutáletu jma bidxichi.

Caadxi de cani zinanda Jesús que nuuné laabe raríʼ ndaaniʼ yuʼduʼ stiʼ Jerusalén. Guizáʼ ridxagayaacabe ora ruuyacabe ni cayuni Jesús. Óraque rietenaláʼdxicabe ni na ndaaniʼ Biblia de Xiiñiʼ Dios: Guendarannaxhii ni nápabe ralidxi Dios ziáʼquini luguiabe casi bele.

Ca dxi nuu Jesús Jerusalén lu saa ni láʼ Pascua que la? rúnibe stale milagru. Despué riree Jesús de Judea ne ribiguétabe Galilea. Peru laabe ridíʼdibe Samaria. Guidúʼyanu xi raca raqué.

Juan 2:13-25; 4:3, 4.



Guendarinabadiidxaʼ

  • Xiñee cutoocabe ca maniʼ°riʼ ndaaniʼ yuʼduʼ stiʼ Dios pue.
  • Xiñee guizáʼ ridxiichi Jesús.
  • Casi rihuinni lu dibuju riʼ, xi cayuni Jesús, ne xi rábibe cani cutoo paloma que gúnicaʼ.
  • Xi rietenalaʼdxiʼ ca xpinni Jesús ora ruuyacabe ni rúnibe.
  • Paraa ridiʼdiʼ Jesús ora ribiguétabe Galilea.

Ti guendarinabadiidxaʼ

  • Biindaʼ Juan 2:13-25.

    Jesús bidxiichiné cani cutoo ndaaniʼ yuʼduʼ que, pur nga runi, ñee jneza nga gutoono o siinu xiixa ndaaniʼ Yoo stiʼ Reinu la? (Juan 2:15, 16; 1 Cor. 10:24, 31-33.)