Biiyaʼ guiraʼ ni nuu lu sitiu riʼ

guyé lu índice

Historia 86: Zinándacabe ti beleguí

Historia 86: Zinándacabe ti beleguí
Ca hombre ni ruundaʼ beleguí

ZANDA guʼyuʼ beleguí culuíʼ naʼ tobi de ca hombre ca la? Ora laacabe bireecabe Jerusalén la? bibiguetaʼ biiyacabe beleguí que. Laacabe zeedacabe neza ra rindani Gubidxa ne ruundacabe ca beleguí ca. Nácabe de que beleguí ca ziné laacabe ra nuu tuuxa risaca.

Ora bidxíñacabe Jerusalén la? gunabadiidxacabe: Paraa nuu baʼduhuiiniʼ chigaca rey stiʼ ca Judíu ca pue. «Judíu» nga sti lá ni ricaa ca israelita ca. Biiyadu beleguí stibe neza ra rindani Gubidxa, na ca hombre que, ne zeeda guni adorardu laabe.

Ora rey stiʼ Jerusalén ni láʼ Herodes gunna ndiʼ la? guizáʼ bidxibi. Laabe qué nádibe chuʼ stobi lugarbe. Laabe gunabadiidxabe guiráʼ ca hombre ni jma risaca ni ruzaaquiʼ guʼxhuʼ que: Paraa chigale rey ni nácabe ca pue. Laacabe bicábicabe: Stiidxaʼ Dios na de que Belén.

Gunna si Herodes ngue la? gúdxibe ca hombre zeeda neza ra rindani Gubidxa que: Lachiyubi baʼduhuiiniʼ ca, ne ora guidxélatu laabe la? guedatídxitu naa. Naa laaca racalaʼdxeʼ guneʼ adorar laabe. Peru ni racaláʼdxibe nga guutibe baʼduhuiiniʼ que.

Óraque beleguí que guzaniruʼ nezalúcabe hasta Belén, ne gulezadxí ni ra nuu baʼduhuiiniʼ que. Ora riuu ca hombre que ndaaniʼ yoo que la? ridxélacabe María ne xiiñibe Jesús. Ne rusigáʼdecabe Jesús guiráʼ ni zinécabe. Peru Jiobá gudixhená laacabe lu ti bacaandaʼ cadi guibiguétacabe Jerusalén ra nuu Herodes. Nga runi ricaacabe sti neza para guibiguétacabe xquídxicabe.

Ora Herodes runadiaga de que ca hombre que maʼ zeecaʼ la? guizáʼ ridxiichibe. Ne runi mandarbe gati guiráʼ baʼduhuiiniʼ ni napa chupa iza ne ni chigusaaruʼ. Peru Jiobá gúdxibe José lu ti bacaandaʼ cheʼ Egipto. Despué ora runadiaga José de que maʼ guti Herodes la? rinebe María ne Jesús sti biaje guidxi Nazaret, ne raríʼ nga riniisi Jesús.

Tu raʼbuʼ bicaa beleguí cubi que guzaaniʼ yaʼ. Bietenalaʼdxiʼ, ca hombre que guyécabe primeru Jerusalén ora biiyacabe beleguí que. Binidxabaʼ gucalaʼdxiʼ ñuuti Xiiñiʼ Dios, ne laabe nánnabe de que Herodes rey stiʼ Jerusalén laaca zuyubi modo guuti baʼduhuiiniʼ que. Ngue runi, Binidxabaʼ nga bicaa beleguí que guzaaniʼ.

Mateo 2:1-23; Miqueas 5:2.



Guendarinabadiidxaʼ

  • Tuu nga ca hombre rihuinni lu dibuju riʼ, ne xiñee culuíʼ náʼ tobi de laacabe beleguí ni nabé cuzaaniʼ ca.
  • Xiñee ridxibi rey Herodes, ne xi rúnibe.
  • Paraa riné beleguí que ca hombre que, peru xiñee ricaacabe sti neza para guibiguétacabe xquídxicabe.
  • Xi runi mandar Herodes ne xiñee.
  • Xi rabi Jiobá José guni.
  • Tu bicaa beleguí cubi que guzaaniʼ, ne xiñee.

Ti guendarinabadiidxaʼ

  • Biindaʼ Mateo 2:1-23.

    Panda iza napa Jesús ne paraa nabézabe ora yeganna ca hombre ni ruunda ca beleguí que laabe. (Mat. 2:1, 11, 16.)