Biiyaʼ guiraʼ ni nuu lu sitiu riʼ

guyé lu índice

Historia 84: Ti ángel riganna María

Historia 84: Ti ángel riganna María

MARÍA nga gunaa sicarú riʼ. Israelita laabe ne nabézabe guidxi Nazaret. Dios nanna de que laabe guizáʼ nacháʼhuibe. Ngue runi biseendabe ángel stibe ni láʼ Gabriel para guiniʼné María. Nannuʼ xi rábibe María la? Chiguidúʼyanu.

Gabriel bigapadiuxi laabe ne na: Dichosa lii lade guiráʼ xixé gunaa. Jiobá nuuné lii. María riuu xizaa purtiʼ qué huayuuyabe binni ca ne qué guiénebe xi caníʼ. Peru Gabriel rabi laabe cadi chuʼbe xizaa.

María

Cadi guidxíbiluʼ María na ángel que rabi laabe. Nayecheʼ nuuné Jiobá lii, nga runi chigúnibe ti guendaridxagayaa para lii. Purtiʼ qué zandaa diʼ zápaluʼ ti baʼduhuiiniʼ. Ne naquiiñeʼ cuee laluʼ laabe Jesús.

Baʼduhuiiniʼ riʼ zaca nandxóʼ ne zábicabe laabe Xiiñiʼ Dios ni nuu guibáʼ. Jiobá zuni laabe rey cásica guca David. Peru laabe qué ziuu dxi guiaanadxibe de guni mandarbe.

Peru María rinabadiidxaʼ laabe, ximodo gaca ndiʼ yaʼ, purtiʼ binidxaapaʼ naa ne cadi nabezaniadiaʼ hombre. Ximodo nga gapaʼ ti baʼduhuiiniʼ.

Poder stiʼ Dios ziuu luguialuʼ, na Gabriel rabi laabe. Nga runi baʼduhuiiniʼ ca zábicabe laabe Xiiñiʼ Dios. Ne rábibe María: Rietenalaʼdxuʼ Elisabet xpariénteluʼ la? Stale binni guníʼ de que laabe maʼ bióʼxhobe para gápabe xiiñibe, peru qué zandaa diʼ zápabe tobi. Maʼ biiyaluʼ la? para Dios gastiʼ ni nagana.

Óraque na María: Raríʼ nuaa para guneʼ ni na Jiobá. Gacaʼ casi naluʼ ca. Binadiaga si ángel que ni guniʼbe la? bireeca zeʼ.

María guyeca yeganna Elisabet. Ora runadiaga Elisabet stídxibe la? riniibica baʼduhuiiniʼ nuu ndaanibe que ne riecheʼ. Elisabet ridxá de espíritu santu ne rábibe María: Dichosa lii lade guiráʼ xixé gunaa. María biaananebe Elisabet chonna beeu, oraqueruʼ bibiguétabe Nazaret.

Qué zandaa diʼ María zachaganáʼ ti hombre láʼ José. Peru ora ranna José de que María chigapa ti baʼduhuiiniʼ la? laabe ridxíbibe guichaganabe laa. Óraque na ángel que rabi José: Cadi guidxíbidiluʼ guichaganaluʼ María, purtiʼ Dios nga bidii laabe baʼduhuiiniʼ ca. Nga runi María ne José richaganacaʼ, ne ribézacaʼ gale Jesús.

Lucas 1:26-56; Mateo 1:18-25.



Guendarinabadiidxaʼ

  • Tuu nga gunaa cá lu dibuju riʼ.
  • Xi rabi Gabriel María.
  • Ximodo rabi Gabriel María de que zapa ti baʼduhuiiniʼ neca laa caʼruʼ guichaganáʼ.
  • Xi raca ora riganna María Elisabet.
  • Xi riníʼ ique José ora ránnabe de que María chigapa ti baʼduhuiiniʼ, peru xiñee bichaa modo guníʼ íquebe que.

Xcaadxi guendarinabadiidxaʼ

  • Biindaʼ Lucas 1:26-56.

    Cumu María gulené donda°la? xi zaca ne óvulo stibe ora Dios dede guibáʼ cuʼ xquendanabani Xiiñiʼ ndaaniʼ ni casi na Lucas 1:35. (Ageo 2:11-13; Juan 6:69; Heb. 7:26; 10:5.)

    Ximodo rusisácacabe Jesús ante gale. (Luc. 1:41-43.)

    Xi ejemplu sicarú bisaana María para ca xpinni Cristu ni cacaa xiixa guenda ni risaca lu xhiiñaʼ Dios yanna°riʼ. (Luc. 1:38, 46-49; 17:10; Pro. 11:2.)

  • Biindaʼ Mateo 1:18-25.

    Neca qué niree lá Jesús Emmanuel, ximodo bisihuínnibe lu xquendanabánibe ni riníʼ lá riʼ yaʼ. (Mat. 1:22, 23; Juan 14:8-10; Heb. 1:1-3.)