Biiyaʼ guiraʼ ni nuu lu sitiu riʼ

guyé lu índice

Historia 81: Gúpacabe confianza Dios

Historia 81: Gúpacabe confianza Dios

BIAʼ cincuenta mil binni de cani riree de Babilonia que rizacaʼ zítupeʼ para chuʼcaʼ Jerusalén. Peru ora rindácabe raqué la? ruuyacabe puru si guié nuu guidxi que. Guirutiʼ nabeza raqué. Ca israelita ca nápacaʼ xidé gucuicaʼ guiráʼ ni sti biaje.

Tobi de cani rúnicabe nga ti altar, luni nga ruuticabe manihuiiniʼ para gusigáʼdecabe Jiobá. Qué nindaa diʼ bizulú ca israelita que bicuicaʼ yuʼduʼ que. Peru ca xhenemígucabe ni nabeza xcaadxi guidxi que la? gucaláʼdxicaʼ nuchíbicaʼ laacabe para nibezadxícabe. Ne dede ra bidxélacabe ximodo guni rey stiʼ Persia ti ley para gucueeza dxiiñaʼ cayuni ca israelita que.

Maʼ gudiʼdiʼ diecisiete iza dede dxi biree ca israelita que de guidxi Babilonia. Dios biseenda ca ni riguixhená stiʼ, Ageo ne Zacarías para gábicabe ca binni que guzulú gucuicaʼ sti biaje. Ca binni que gúpacabe confianza de que Jiobá zacané laacabe ne bizuubacabe diidxaʼ. Laacabe bibiguetaʼ bicuícabe yuʼduʼ que neca lu ley que na cadi gúnicabe ni.

Pur nga runi Tatenai tobi de ca xaíque stiʼ ca persa la? beeda ne gunabadiidxaʼ laacabe tu bidii derechu laacabe gucuícabe yuʼduʼ que. Ca israelita que gudxi laacabe de que dede guidxi Babilonia rey Ciro gudxi laacabe: Laché Jerusalén ne lagucuí yuʼduʼ stiʼ Jiobá, Dios stitu.

Ciro maʼ guti, peru Tatenai ruseenda ti carta guidxi Babilonia ne rinabadiidxabe pa dxandíʼ Ciro guníʼ cuí yuʼduʼ ca. Qué nindaa diʼ rey stiʼ Persia ricabi laabe ne na de que dxandíʼ ni guníʼ Ciro ca. Nga runi rey ca rucaa: Lagudii lugar ca israelita ca gucuicaʼ yuʼduʼ stiʼ Dios sticaʼ, ne cayuneʼ mandar laatu gacanetu laacabe. Biaʼsi yenécabe tapa iza para bilúxecabe yuʼduʼ que, ne ca israelita que guizáʼ riéchecaʼ.

Ridiʼdiʼ stale iza. Yanna maʼ raca cuarenta y ocho iza de biluxe yuʼduʼ que. Ca binni de Jerusalén nabé pobre nuucaʼ, guidxi que ne yuʼduʼ stiʼ Dios que guizáʼ feu rihuínnicaʼ. Dede guidxi Babilonia nuu Esdras ora ránnabe de que naquiiñeʼ gacachaahuiʼ yuʼduʼ stiʼ Dios. Ngue runi, nannuʼ xi rúnibe la?

Esdras riguuyabe Artajerjes, rey stiʼ guidxi Persia, ne rey chaʼhuiʼ riʼ rusigáʼdebe Esdras stale cosa para chiné Jerusalén. Esdras rábibe ca israelita ni nuu Babilonia que gacané laabe, ne biaʼ xhoopaʼ mil riníʼ de que zie. Rinécabe stale plata ne oro ne xcaadxi cosa sicarú.

Esdras guizáʼ riuu xizaa, purtiʼ nuu gubaanaʼ neza chécabe que. Ca hombre ca zándaca cuaanacaʼ plata que ne ca oro stícabe, ne guuticaʼ laacabe. Ngue runi Esdras rucasaabe ca binni que, casi ruuyuʼ lu dibuju riʼ. Óraque riniʼnécabe Jiobá gapa laacabe lu neza chécabe para guibiguétacabe Jerusalén.

Cayuni orar Esdras ne caadxi binni

Jiobá rapa laacabe, ne tapa beeu de ziguizácabe que la? rindácabe guidxi Jerusalén. Ñee cadi rusihuinni ndiʼ de que Jiobá zanda gapa cani gapa confianza laabe la?

Esdras, capítulo 2 hasta 8.



Guendarinabadiidxaʼ

  • Panda binni riree de Babilonia ne rizacaʼ zítupeʼ para chuʼcaʼ Jerusalén, ne xi ridxélacabe ora rindácabe raqué.
  • Xi rizulú rucuí ca israelita que, ne xi runi ca xhenemígucabe.
  • Tuu nga Ageo ne Zacarías, ne xi rábicabe ca binni que.
  • Xiñee ruseenda Tatenai ti carta guidxi Babilonia, ne xi ricabi rey que laabe.
  • Xi runi Esdras ora ránnabe de que naquiiñeʼ gacachaahuiʼ yuʼduʼ stiʼ Dios.
  • Casi rihuinni lu dibuju riʼ, xi rinabaʼ Esdras Jiobá, ximodo ricabi Jiobá laabe, ne xi rusiidiʼ ndiʼ laanu.

Xcaadxi guendarinabadiidxaʼ

  • Biindaʼ Esdras 3:1-13.

    Pa nuunu ti lugar ra gastiʼ nin ti neza binni ridagulisaa de ca xquidxi Dios, xi naquiiñeʼ gúninu. (Esd. 3:3, 6; Hech. 17:16, 17; Heb. 13:15.)

  • Biindaʼ Esdras 4:1-7.

    Xi ejemplu gulaʼquiʼ Zorobabel para xquidxi Jiobá, ora ridaaguʼ ti religión sti religión para guni adorarcaʼ. (Éxo. 34:12; 1 Cor. 15:33; 2 Cor. 6:14-17.)

  • Biindaʼ Esdras 5:1-5, 17 ne 6:1-22.

    Xiñee qué ñanda nucueeza ca ni cucaalú Dios que nibí yuʼduʼ stiʼ. (Esd. 5:5; Isa. 54:17.)

    Ximodo ruguu ejemplu stiʼ ca binnigola judíu que gana ca binnigola zinanda Cristu ca dxi stinu riʼ, para guyúbicabe xneza Jiobá ora gudxiilúcabe ca ni cucaalú laacabe. (Esd. 6:14; Sal. 32:8; Rom. 8:31; Sant. 1:5.)

  • Biindaʼ Esdras 8:21-23, 28-36.

    Ante quixhe íquenu gúninu xiixa, xi naquiiñeʼ gúninu casi biʼniʼ Esdras. (Esd. 8:23; Sal. 127:1; Pro. 10:22; Sant. 4:13-15.)