Biiyaʼ guiraʼ ni nuu lu sitiu riʼ

guyé lu índice

Historia 79: Daniel nuu lade lión

Historia 79: Daniel nuu lade lión

¡BIIYAʼ! Ruluíʼ si nuu Daniel lu ti ra nagana. Peru ca lión ca cadi cayúnidicaʼ laabe gastiʼ. Nannuʼ xiñee la? Tu guluu laabe lade guiráʼ lión riʼ pue. Guidúʼyanu.

Yanna la? Darío nga naca rey stiʼ Babilonia. Darío riuláʼdxibe Daniel pur modo laa purtiʼ nachaʼhuiʼ ne nanna stale, ngue runi rúnibe Daniel xaíque lu reinu stibe. Pur ndiʼ la? xcaadxi hombre que raca nanaláʼdxicabe Daniel ne ndiʼ nga ni rúnicabe:

Darío

Riécabe ra nuu Darío ne rábicabe laa: Guiradu racaláʼdxidu rey gucaaluʼ ti ley ni guiníʼ de que pur treinta dxi guirutiʼ napa xidé guni orar nin ti dios ne nin ti hombre, mas que lii si. Pa tuuxa qué guzuubaʼ diidxaʼ la? napa xidé gusábacabe laa ra daguyoo ca lión ca. Darío qué ganna diʼ xiñee racalaʼdxiʼ ca hombre ca ley riʼ. Peru guyuuláʼdxibe modo na ca hombre que ne bicaabe ley ca. Yanna maʼ guirutiʼ zanda guchaa ley riʼ.

Ora Daniel runadiaga ndiʼ la? riebe ralídxibe ne runi orarbe cásica huayúnibe. Ca hombre malu riʼ nánnacabe de que Daniel qué zusaana diʼ de guni orar Jiobá. Riéchecaʼ purtiʼ yanna huaxa maʼ qué zuchiiñabe laacaʼ.

Ora rudii Darío cuenta xi ndiʼ cayaca la? guizáʼ riuube triste. Peru maʼ qué zanda guchaabe ley que ne nápabe xidé guni mandarbe gusábacabe Daniel ra daguyoo ca lión ca. Rey que rábibe Daniel: Ribezaʼ gulá Dios ni cayuni adorarluʼ ca lii.

Darío nuu xizaa dede qué ñanda ñásibe gueelaʼ que. Sti siadóʼ que la? riguuyabe ra nuu ca lión que. Lu dibuju riʼ zanda guʼyuʼ laabe. Rey que rucaaridxi: ¡Daniel hombre runi ni ná ti Dios ni nabani! Ñee gunda bilá Dios stiluʼ lii de lade ca lión ca la?

Daniel nuu ra deguyoo lión

Dios biseenda ti ángel stiʼ, ne biseegube ruaa ca lión ca para cadi gúnicaʼ naa gastiʼ, na Daniel rabi laabe.

Rey que guizáʼ riéchebe. Ne runi mandarbe guiree Daniel lade ca lión que ne uguucabe ca hombre qué iquiiñeʼ que raqué. Zeruʼ ca hombre que lu bi biruxhaʼ ca lión que laacaʼ ne runidecaʼ dxitaládicabe.

Óraque rey Darío rucaabe ca diidxaʼ riʼ guidubi naca reinu stibe: Lagapa respetu Dios stiʼ Daniel purtiʼ laabe rúnibe milagru. Laabe bilabe Daniel de lade ca lión ca.

Daniel 6:1-28.



Guendarinabadiidxaʼ

  • Tuu nga Darío, ne ximodo ruuyabe Daniel.
  • Xi rucaa tuudxi hombre ni nanaláʼdxicaʼ Daniel guni Darío.
  • Xi runi Daniel ora ránnabe de ley cubi que.
  • Xiñee riuu Darío triste dede qué randa rásibe, ne xi rúnibe sti siadóʼ que.
  • Xi ricabi Daniel Darío.
  • Xi raca ne ca hombre qué iquiiñeʼ ni gucalaʼdxiʼ ñuuti Daniel que, ne xi rucaa Darío para guiráʼ ca binni de guidubi naca reinu stiʼ.

Xcaadxi guendarinabadiidxaʼ

  • Biindaʼ Daniel 6:1-28.

    Ximodo rietenaláʼdxinu ni gucalaʼdxiʼ ca hombre que ñúnicaʼ Daniel ne ni huayuni cani cayacalaʼdxiʼ gucueeza xhiiñaʼ ca testigu stiʼ Jiobá yanna riʼ. (Dan. 6:7; Sal. 94:20; Isa. 10:1; Rom. 8:31.)

    Ximodo zanda guzuubanu stiidxaʼ ca xaíque guidxi casi biʼniʼ Daniel que. (Dan. 6:5, 10; Rom. 13:1; Hech. 5:29.)

    Ximodo zanda gúninu ni na Jiobá sin cueezadxinu cásica biʼniʼ Daniel. (Dan. 6:16, 20; Fili. 3:16; Apo. 7:15.)